ނަމާދުވަގުތު ޖެހުމުން މިސްކިތްތަކުގެ ތާޅަފިލިން ގޮވާ ބަންގިއާއި ކުރާ ފަރުޟު ނަމާދުގެ އަޑު އަހަން ގޭގައި ތިބޭ ބަލިމީހުން ވަރަށް ބޮޑަށް ބޭނުންވާކަން ހާމަވެއްޖެއެވެ.
އެނދުމަތިވެފައިވާ 40 މީހަކާއި ސުވާލުކުރުމުން ބުނީ މިސްކިތްތަކުން ގޮވާ ބަންގި އާއި ކުރާ ނަމާދުގެ އަޑު އިވުމުން ވަރަށް ބޮޑަށް ހިތްހަމަޖެހުން ލިބޭ ކަމަށެވެ. އަދި ހިތުން އެނަމާދުގައި ބައިވެރިވާ ކަމަށާއި ބަންގިއަށް ޢިޖާބަވެސްދޭ ކަމަށެވެ. މީގެ އިތުރުން ދަރިންގެ އެހީތެރިކަން ހޯދައިގެން ނަމާދުކުރަންވެސް ހިތްވަރު ލިބޭ ކަމަށެވެ.
"ވައި ހުންނަ ގޮތުން އަޑު ނުއިވޭ ދުވަސްތަކުގައި ވަރަށް ދެރަވާ" ކަމަށްވެސް ބައެއް މީހުން ބުނެފައިވެއެވެ.
27 މީހަކު ބުނީ އެމީހުން ފުރަތަމަ މިސްކިތުގެ ނަމާދު އަހަނީ ކަމަށެވެ. ނަމާދުކުރަނީ މިސްކިތުގެ ނަމާދު ނިންމައި ސަލާމްދިނުމުން ކަމަށެވެ. ބެލެނިވެރިންނާ ސުވާލުކުރުމުން 3 ގެއަކުން ބުނީ ބައްޕައަށް އުނދަގޫވާކަމަށެވެ! "ބައްޕަ އެބުނަނީ އަޑުއަހަން ބޭނުންވާ" ކަމަށް ކަމުގައި ބުނުމުން އިތުރު ޖަވާބެއް ނުދެއެވެ.
ބަލި މީހުންނަށް އުނދަގޫވާކަމަށްބުނެ މާލެ ސިޓީގެ މިސްކިތްތަކުގެ ތާޅަފިލިން އަޑު ކަނޑައިލުމަށް ޚާއްޞަ މަސައްކަތްތަކެއް މިހާރު ދަނީ ކުރަމުންނެވެ. ނަމާދުގެ އަޑު އިވޭނީ 10 ވަރަކަށް މިނިޓަށެވެ. ސިޔާސީ ކެންޕޭނުތަކުގައި 3،4 މަސްވަންދެން ކޮންމެ ރެއަކު 4،5 ގަޑިއިރު އަދި ހަވީރާއި ދުވާލުގެ ވަގުތުތަކުގައިވެސް ލައުޑް ސްޕީކަރާއި ތާޅަފިލި ބޭނުންކުރަނީ އެ ސަރަހައްދުގައި ބަލި މީހުން ނުތިބޭތީ ކަމާއިމެދު ސުވާލު އުފެދެއެވެ.
އެހެންކަމުން މިސްކިތްތަކުގެ ތާޅަފިލިން ނަމާދުގެ އަޑު އިއްވުން ހުއްޓުވަން ކުރިއަށް ގެންދާ މަސައްކަތްތަކުގެ ޙަޤީޤީ މަޤްޞަދާއިމެދު މިހާރު މިވަނީ ވަރަށް ބޮޑެތި ސުވާލުތަކެއް އުފެދިފައެވެ.
