العَلِىّ
(މަތިވެރި ރަސްކަލާނގެ)
العلىّ ގެ މާނައަކީ: އެކަލާނގެ ޚަލްޤުކުރެއްވި ހުރިހާ އެއްޗަކަށްވުރެ މަތިވެރި ރަސްކަލާނގެއެވެ. އެކަލާނގެ މަތިވެރި މަޤާމާ ހަމައަށް އެހެން އެކަކުވެސް އުފުލިގެން ނުދެއެވެ. މަދަޙައާއި ޘަނާގެ މަތިވެރި ބަސްތައް ޙައްޤުވެގެންވަނީ އެކަލާނގެ އަށެވެ.
މިއިސްމުފުޅު الكبيرއާ ވިދިގެން 4 ފަހަރު އަދި العظيمއާ ވިދިގެން 2 ފަހަރު ވާރިދުވެފައި ވެއެވެ.
العلى މިއިސްމުފުޅު އައިސްފައިވަނީ العلو އިންނެވެ. މިއިސްމުފުޅު ޤުރްއާނުގައި 6 ފަހަރު ވާރިދުވެފައި ވެއެވެ. އެއީ البقرة، الحج، لقمان، سبأ، غافر، އަދި شورى ސޫރަތުގައެވެ.
ބަހާއި ޢަމަލުން ﷲ އެންގެވިގޮތަށް އުޅޭ މީހުންނަށް މި މަތިވެރިކަން މާތްﷲ ދެއްވައެވެ. އިބްރާހީމްގެފާނާއި، އިދްރީސްގެފާނަށް މަތިވެރިކަން މާތްﷲ ދެއްވާފައި ވެއެވެ.
ކީރިތި ރަސޫލާ ހުރިހާ ދުޢާފުޅުތަކެއް ފަށްޓަވަނީ މި އިސްމުފުޅުންނެވެ. އެއީ سبحان رَبِّىَ الْعَلِىِّ الأَعْلَى الْوَهَّاب މިފަދައިން ވިދާޅުވެއެވެ. ސަޖިދާގައި سُبْحَانَ رَبِّىَ الأَعْلَى وَبِحَمْدِهِ ވިދާޅުވުމުގެ ސިއްރަކީވެސް މިއެވެ.
މި އިސްމުފުޅުން ޛިކުރުކުރާ މީހާގެ މަޤާމާއި ދަރަޖަ މަތިވެރި ކުރައްވައެވެ. އެމީހަކަށް ޙިކްމަތާއި، ޢިލްމު ދެއްވާނެއެވެ.
ބުނެވޭ ގޮތުގައި މިއިސްމުފުޅުން ދުޢާ ކުރާ މީހުން ޢަޛާބުން ސަލާމަތް ކޮށްދެއްވާނެއެވެ.
(މިއީ 1992ވަނަ އަހަރު އަލްއުސްތާޛް އިބްރާހީމް ރަޝީދު މޫސާ ލިޔުއްވާފައިވާ އޮނަސައްތަ އިސްމުފުޅު މި ފޮތުން އުސްތާޛްގެ އިޛުނައާއިއެކު ނަގާފައިވާ ބައިތަކެކެވެ. ދެންހުރި ބައިތަށް ގެނެސްދޭންވެސް މަސައްކަތްކުރާނަމެވެ. އޮނަސައްތަ އިސްމްފުޅު މާނައާއިއެކު އެނގުމަކީ ކޮންމެ މުސްލިމަކަށްވެސް ވަރަށް މުހިންމު ކަމެކެވެ.)
