ސްކޫލް ނިންމީންސުރެ ކައިވެންޏަށް އެކި މަސައްކަތްކުރާ މީހުން އެކި ފެންވަރުގެ މީހުން އައީ އެދެމުންނެވެ. ނަމަވެސް ކޮންމެވެސް ސަބަބެއް މެދުވެރިވެ ކައިވެނިކުރުމަށް އޮންނަނީ ކޮންމެވެސް ހުރަހެއް އެޅިފައެވެ. ޢުމުރުގައި ދުވަސް އޮތްކަމަށް ބަލައި އެކަމަކަށް އަޅުގަނޑު އެއްވެސް ވަރަކަށް ކަންބޮޑެއް ނުވަމެވެ.
އެންމެ ކުޑައިރުންސުރެ ﷲ އަށް ބިރުވެތިވުމަށާއި ވަގުތު ޖެހުމުން ނަމާދުކުރުމަށް މަންމް އާއި ބައްޕަ ވަރަށް ބޮޑަށް ބާރުއެޅިއެވެ. އެހެންކަމުން އެކަމުގައި ދެމިހުރެވޭތީ ދުނިޔަވީ އެއްވެސް ކަމެއް ޙާޞިލުނުކުރެވިގެން ކަންބޮޑެއް ނުވެއެވެ. އަބަދުވެސް ޔަޤީންކުރެވުނީ އެކަމުގެ އެންމެ ރަނގަޅުވަގު ޖެހުމުން އެކަމެއްވާނެ ކަމަށެވެ.
އުމުރުން 20 ގެ ފަހުކޮޅު ބައްދަލުވި ފިރިހެނަކާއި ގުޅުން ބަދަހިވެ އޭނާގެ އެދުމަށް ކައިވެނިކުރީމެވެ. މިދައްކަނީ މީގެ 20 ވަރަކަށް އަހަރު ކުރީގެ ވާހަކައެވެ. އެހެންކަމުން އެއިރު ފިރިހެނުން ދައްކާ ވާހަކައިގެ ޙަޤީޤަތް ހޯދަން ޖެހޭނެކަން ފަދަ މުހިންމު ކަމަށް ހޭލުންތެރިއެއް ނޫނެވެ. ތެދަށް ބުނާނަމަ މުޅި މުޖުތަމަޢުވެސް އެކަމަށް މިހާރުވަރަށް ވެސް ހޭލުންތެރިކަމަކަށް ނުބުނެވޭނެއެވެ. އެހެންކަމުން އޭނާ ދެއްކި ވާހަކަތަކުގެ ޙަޤީޤަތް ހޯދަން އަހަރެންވެސް އެއްވެސް މަސައްކަތެއް ނުކުރަމެވެ. އަދި މިހާރުވެސް އެކަމަށް ހޭލުންތެރިވާންޖެހޭ މިންވަރަށް ހޭލުންތެރިކމަކަށްވެސް ނުބުނެވޭނެއެވެ!
އޭނާއަކީ ކުރިން ކައިވެނިކޮށްފައިވާ މީހެއްކަމަށާއި ކައިވެނި ރޫޅުނީ މިވެނި އެވެނި ކަންކަން މެދުވެރިވެގެން ކަމަށް ބުނެ ދެއްކި ވާހަކަތަކުގެ ޙަޤީޤަތް އޮޅުންފިލުވަން އަހަރެންނަށް މަސައްކަތްނުކުރެވުނުކަމާއި އޭނާ އުޅެމުން އައިގޮތް ނުބެލުނުކަން ވެގެން ދިއައީ އަހަރެންގެ ޙަޔާތް ނުވަތަ ދިރިއުޅުން ކަތިލެވުނު ސަބަބަށެވެ.
އެއްރެއެއްގެ 9 ޖަހާ އެހައިކަންހާއިރެވެ. ސައިކަލުގައި މާލެވަށައި ބުރެއްޖަހާލުމަށްފަހު ބޮޑުތަކުރުފާނުމަގުން ގޮސް ރެސްޓޯރަންޓަކަށް ވަނުމުގެ ބޭނުމުގައި ސައިކަލް ޕާކުކޮށްފައި ހިނގައިގަތްތަނާ އެ ސަރަހައްދަށް ކައިރިކުރި ލޯންޗަކުން ފޭބި އަންހެން ކުއްޖެކެވެ. އަހަރެމެން ފެނުމާއިއެކު ދުވަމުން ކަހަލަގޮތަކަށް އައިސް އަހަރެމްނެގެ ކައިރީގައި ހުއްޓުނެވެ. އޭނާއަށް އެއިރުވެސް ހުރީ ވަރަށް ބޮޑަށް ރޮވިފައެވެ. ލޮލުން ކަރުނަވެސް އޮހޮރެއެވެ.
ކަރުނަފުހެލާފައި ސުވާލުކުރިއެވެ. "ޙަމީދު! މިއީ ކޮން އަންހެނެއް؟" ޙަމީދު ޖަވާބެއް ނުދިނެވެ. އޭނާ ދުރަކަށް ނުދިއައެވެ. ހަމަހުރެގެން ރޮނީއެވެ. އެވަގުތު އަންހެނަކާއި ފިރިހެނަކު އައިސް އެއަންހެންކުއްޖާގެ އަތުގައި ހިފިއެވެ. އަދި އަންހެން މީހާ ބުންޏެވެ. "ބަލަ ކޮން ރުއިމެއްތަ ތިއަރޮނީ؟ ތިއަވާނީ މިހާރު ވެސް އިނދެގެން އުޅޭ އަނބމީހާއަށް! އެހެންވެ ބަސް ހުއްޓި މަންމަންވެފައެހެރީ! ރޯނެކަމެއް ނެތް! ތިއަ ޒާތުގެ ފިރިހެނުންގެ ދުލުން ދުވަހަކުވެސް ތެދެއް ނުބުނާނެ! އަބަދުވެސް އުޅޭނީ 100 އަންހެނުން ހައްދައިގެން. މަޅީގަ ޖައްސައިގެން! ތިމާއަކީ އަލިފެއްކަމަށް ހެދިގެން! ޖަނަވާރުގެ ހަޤީޤަތް ﷲ ލޮލަށް ދެއްކެވިކަމަށްޓަކާ ޝުކުރުކޮށްފަ ގެއަށް ހިނގާ! ތިއަ ޖަނަވާރާމެދު ވިސްނާނެ ކަމެއްވެސް ނެތް! ﷲ އިރާދަފުޅުން މާރަނގަޅު ފިރިއެއް ދެއްވަވާނެ! އެހެން ނޫންނަމަ މިގޮތަށް މިކަންތަކެއް މެދުވެރިއެއްވެސް ނުކުރައްވަވާނެ!"
ފިރިމީހާ އަހަރެންގެ އަތުގައި ހިފައިގެން ހިނގައިގަންނަން މަސައްކަތްކުރިއެވެ. ނަމަވެސް އަހަރެންނަށް ހަމަ ގަނޑުވެފައި ހުރެވުނީއެވެ. އަދި ގޮސް އެކުއްޖާގެ ގައިގައި ބައްދައިލީމެވެ.
ބުނީމެވެ! "ރޯންވީ އަހަރެންނެވެ! ބޮޑު އަނިޔާ މިލުބުނީ އަހަރެންނަށެވެ! ތީނަ ތިއަ ސަލާމަތްވީއެވެ! އަހަރެންނަށް މިވަނީ ދަލުގައި ޖެހެވިފައެވެ! ސަލާމަތްވެވޭނީވެސް ކޯޓުންކޮށްދިން ދުވަހަކުންނެވެ!" އެއިރު އަހަރެންނަށްވެސް ހުރީ ރޮވިފައެވެ. ލޮލުން ކަރުނަ އޮހޮރެއެވެ.
އެހިސާބުން އެ އަންހެންކުއްޖާ އޭނާގެ ގާތް މީހުންނާއިއެކު ދިއައީ އެވެ! ހިނގާފައި އަހަރެން އައީ ގެއަށެވެ! އަދި ފިރިމީހާ ގާތު ގެއަށް ނައުމަށްވެސް ބުނީމެވެ! ނަމަވެސް ގެއަށް ދެވުނުއިރު އޭނާހުރީ އަހަރެންނަށްވުރެ ކުރިން ސައިކަލުގައި ގޮހެވެ. އަހަރެން ހުއްޓުވައި ވަރަށް ގިނަ ވާހަކަތައް ދައްކަން މަސައްކަތްކުރިއެވެ! "އެއީ އަހަރެންނާއިހެދި މޮޔަވެފަ ހުންނަ އަންހެނެއް! އަބަދު ފޯނުވެސް ކުރާނެ! ނުނެގިއްޔާ އޮފީހަށްވެސް އަންނާނެ!" ފަދަ ވާހަކަތައް ދެއްކިއެވެ. ނަމަވެސް އަހަރެންގެ ކަންފަތަށް އެއިން އެއްވާހަކައެއްގެ އަޑު އިވުނު ކަމަކަށް ނުވިއެވެ.
އަހަރެން ރޮމުން ގެއަށް ވަންއިރު މަންމަމެން ސިޓިންގ ރޫމްގައި ތިއްބެވެ! ރޮމުން ވަންނާތީ ކަންބޮޑުވެގެން އައިސް މަންމަ އަހަރެންގެ ގައިގައި އޮޅުލައިގަތެވެ. ފިރިމީހާއަށް އިނގިލި ދިއްކުރަމުން އަހަރެންނަށް ބުނެވުނީ އެންމެ ޖުމުލައެކެވެ. "މިމީހާ މިގެއަށް ވަނަ ނުދޭށެވެ!"
އަހަރެންނަށް ހޭވެރިކަންވީ އެނދުގައި ބާއްވައިގެން ބޮލަށް ފެންއަޅަނިކޮށެވެ. އެއިރުވެސް އެތަނުގައި ފިރިމީހާ ހުއްޓެވެ. ފެނުމާއިއެކު އަނެއްކާވެސް ހެއަށް ގޮތްވިއެވެ. ދެން ހޭއެރިއިރު ފިމީހާއެއް ނެތެވެ. ތިބީ މަންމަމެންނެވެ. ވާހަކަދެކެވޭވަރުވުމުން ދިމާވިކަންތައް ކިޔައިދީ އިތުރަށް އޭނާ އާއިއެކު ދިރިއުޅެން ބޭނުން ނޫންކަމަށްވެސް ބުނީމެވެ.
ކުރި މަސައްކަތުން ޙަޤީޤަތް އެނގުނުއިރު ފިރިމީހާ އެއަންހެން ކުއްޖާ ގާތު އިންނާނެ ކަމަށްބުނެ އޭނާ ގާތު ރޭކުރަމުން ގެންދާތާ ވެސް އެތައް ދުވަހެކެވެ. އޭނާގެ ޢިއްފަތްތެރިކަންވެސް ނަގާލާފައެވެ.
އުޚުތުންނޭވެ! ކޯޓުން ވަރަށް ފަސޭހައިން އަހަރެން ވަރިކޮށްދިނެވެ. އެބޮޑު މަކަރުވެރި އަނިޔާވެރިޔާގެ ކިބައިން ސަލާމަތްވެވުނެވެ. ނަމަވެސް އެ ބޮޑު މަކަރުވެރި އަނިޔާވެރިޔާއަށް މިވަނީ އަހަރެންގެ ޢިއްފަތްވެސް ދެވިފައެވެ. އަހަރެން ދިނީ ކައިވެންޏަށް ފަހުގައެވެ. ދެން ކިތަންމެ ރަނގަޅު، ކިތަންމެ އިޚްލާޞްތެރި ކިތަންމެ ލޯބިވާ ފިރިއަކު ލިބުނު ނަމަވެސް އެކަން ހަދިޔާ ކުރުމުގެ ނަޞީބު ވަނީ ގެއްލިފައެވެ.
އަހަރެން ކައިވެނިކުރީ ދުވަހަކުވެސް ވަރިވާކަށްނޫނެވެ. މުޅި ޢުމުރު އެކުގައި ހޭދަކުރުމަށެވެ. އަދި އެކުގައި ސުވަރުގޭގައިވެސް ވުމުގެ މަތިވެރި ނިޔަތުގައެވެ. ހުރިހާ އުންމީދުތައް ވެގެންދިއައީ ބިލާހަކަށެވެ. ވަގުތުން ވަރިވާން ނިންމީ އެފަދަ މަކަރުވެރިއަކަށް އިތުބާރުކޮށްގެން ދިރިއުޅެން މަސައްކަތްކޮށްފިނަމަ ދެން ލިބޭނެ އަނިޔާ މާބޮޑުވާނެކަން ޔަޤީންކުރެވުމުންނެވެ.
އަހަރެންގެ ޙަޔާތަށް އައި ހެޔޮ ބަދަލު އެހެން ފަހަރަކުން ހިއްޞާކުރާނަމެވެ. މި ވާހަކަތައް ހިއްޞާ މިކުރީ ކައިވެނީގެ ކުރިން ބަލަން ޖެހޭ އެންމެ މުހިންމު ކަންކަމަށް ނުބަލައި މިހާރުވެސް ގިނަ ބައަކު ކައިވެނިކުރަމުން ގެންދާތީ އެކަމުން ލިބެމުންދާ ހިތްދަތިކަމާއި ވޭންތައް ހިއްޞާކޮށްލުމަށެވެ. އަދި މަކަރުވެރިންގެ ޝިކާރައަކަށްވެ ކައިވެނީގެކުރިން އަތުގައި އޮތް އެންމެ އަގުބޮޑު ހަދިޔާވެސް ދޫކޮށްލަމުން ގެންދާތީ މިކަމަށް އުޚުތުންގެ ސަމާލުކަން އިތުރުކުރަން ހިތްވަރު ދިނުމަށެވެ. ޢިބްރަތެއް ޙާޞިލުކުރެވޭނެ ކަމަށް އުންމީދުކުރަމެވެ.
- މިއަދުނޫހުގެ ކިޔުންތެރިއެއް
