الكَبِيرُ
(ބޮޑު ރަސްކަލާނގެ)
الكبيرގެ މާނައަކީ: މަތިވެރިވެގެންވާ ބޮޑު ރަސްކަލާނގެއެވެ. ސިފަތައް މާތް ރަސްކަލާނގެއެވެ. ހައިބަތު ބޮޑު ރަސްކަލާނގެއެވެ. އެކަލާނގެއާ ނިސްބަތްކުރާއިރު އެއްވެސް އެއްޗެއް ބޮޑުވެގެން ނުވެއެވެ.
ރަށުގެ ބޮޑުވެރިޔާއޭ ބުނެވޭ ބަހަކީ ހަމައެކަނި މަޖާޒީ ކަމެކެވެ. އެކަލާނގެ ފިޔަވައި އެހެން ބޮޑުވެރިޔަކު ނެތެވެ.
ކީރިތި ޤުރްއާނުގައި މިއިސްމުފުޅު ފަސް ފަހަރު ވާރިދުވެފައި ވެއެވެ. އެއީ الرعد سورة އާއި، الحج سورة އާއި، لقمان سورة އާއި، سبأ سورة އާއި غافر سورة ގައެވެ.
الكبير މި އިސްމުފުޅަކީ ހުރިހާ ބާވަތެއްގެ ތަދަކަށް ލައްވާފައިވާ ޝިފާއެއް ކަމުގައި ވާރިދުވެގެން ވެއެވެ. އިބްނު ޢައްބާސް ވިދާޅުވާ ގޮތުގައި ހުން އައުމުން ނުވަތަ ތަނެއްގައި ރިހެން ފެށުމުން ((بِسم اللهِ الكبيرِ أعوذُ باللَّهِ العَظيم مِنْ شَرِّ كُلِّ عِرْقِ نَعَّارٍ وَمِنْ شَرِّ حَرِّ النَّار)) މިފަދައިން ކިޔާ ދުޢާކުރުމަށް ވިދާޅުވިއެވެ.
މިއިސްމުފުޅުން ޛިކުރުކުރުމަކީ ތިމާގެ ޤަދަރު އުފުއްލަވާނެ ކަމެކެވެ. މިއިސްމުފުޅުން ޛިކްރުކުރާ ވެރިންނަށް އެމީހުންގެ ރައްޔިތުން ކިޔަމަން ކޮށްދެއްވާނެއެވެ.
މިއިސްމުފުޅުން ޛިކުރުކުރުމުގައި ދެމިހުރިމީހާ މަތިވެރި ކުރައްވާ މަޝްހޫރު ކުރައްވާނެއެވެ.
ތިމާގެ މަޤާމުން ވަކިކުރެވިފައި ހުރި މީހަކު ހަތްދުވަސް ވަންދެން ރޯދައަށްހުރެ ދުވާލަކު އެއްހާސް ފަހަރު މިއިސްމުފުޅު ކިޔަވައިފިނަމަ އެމަޤާމަކަށް އެމީހަކު އަލުން ލެއްވޭނެއެވެ.
(މިއީ 1992ވަނަ އަހަރު އަލްއުސްތާޛް އިބްރާހީމް ރަޝީދު މޫސާ ލިޔުއްވާފައިވާ އޮނަސައްތަ އިސްމުފުޅު މި ފޮތުން އުސްތާޛްގެ އިޛުނައާއިއެކު ނަގާފައިވާ ބައިތަކެކެވެ. ދެންހުރި ބައިތަށް ގެނެސްދޭންވެސް މަސައްކަތްކުރާނަމެވެ. އޮނަސައްތަ އިސްމްފުޅު މާނައާއިއެކު އެނގުމަކީ ކޮންމެ މުސްލިމަކަށްވެސް ވަރަށް މުހިންމު ކަމެކެވެ.)
