ދުނިޔޭގައި ތަނަވަސްކަން ނުދެއްވެވުމުން ކަންބޮޑުވެ މާޔޫސްނުވާށެވެ! އެއީ ވެސް ނިޢުމަތެކެވެ. ދުއްވާނެ ސައިކަލެއް ނުލިބިގެންވެސް ކަންބޮޑުނުވާށެވެ! އެއީ ވެސް ހަމަ ނިޢްމަތެކެވެ.
ޤިޔާމަތް ދުވަހު ހިސާބު ބައްލަވާއިރު އެމީހާ ދުނިޔޭގައި އުޅުނުއިރު އަތުގައި ހުރި މުއްސަނދިކަމަކަށް ނުބައްލަވާނެތެވެ. ބައްލަވާނީ ހަމައެކަނި ކޮށްފައިވާ ހެޔޮ ޢަމަލުތަކަށެވެ. ސައިކަލެއް ހުރިނަމަ މިސްކިތަށް ދެވޭނީވެސް ސައިކަލުގައެވެ. ގެއްލިގެން އެދަނީ އެތައް ބައިވަރު ޘަވާބުތަކެކެވެ. ހިނގާފައި މިސްކިތަށް ދާން އަޅާ ކޮންމެ ފިޔަވަޅަކަށާއި މިސްކިތުން ގެއަށް ދާން އަޅާ ކޮންމެ ފިޔަވަޅަކަށް ޘަވާބު ދެއްވަވާނެތެވެ.
ދަލީލު:
ރަސޫލް (ޞޢވ)ގެ މިސްކިތްކޮޅާއި ވަރަށް ދުރުގައި (އެންމެ ދުރު ސަރަހައްދުގަ) ހުރި ގޭގައި އުޅުއްވަވާ ޞަހާބީއަށް ދެނެނެވުނެވެ. "ކަލޭގެފާނު މިސްކިތަށް ވަޑައިގަންނަވަން ޙިމާރެއް ބައްލަވައި ނުގަންނަވަނީ ކީއްވެގެންތޯއެވެ! ގަދަ ހޫނުގައި އަދި ރޭގނޑު އަނދިރީގައި މިސްކިތަށް ވަޑައިގަންނަވަން ފަސޭހަފުޅުވުމަށްޓަކައެވެ."
ޖަވާބުގައި ވިދާޅުވީ "ޙިމާރެއް ބޭނުންފުޅު ނޫންކަމަށްޓަކައެވެ. މިސްކިތަށް ވަޑައިގެންނެވުމަށާއި މިސްކިތުން ގެއަށް ވަޑައިގަތުމަށް ﷲ ޘަވާބު ދެއްވަވާނެ ކަމަށް އުންމީދުކުރައްވަވަމެވެ."
އެހިނދު ރަސޫލް (ޞޢވ) ޙަދީޘްފުޅުކުރެއްވެވީ "ދެކަން ވެސް (ދެކަމަށްވެސް) ޘަވާބު ދެއްވަވާނެ" ކަމަށެވެ.
- އިސްލާމީ ތިލަފަތުގެ ދަރުސަކުން
