ފާފަކުރަން ބޭނުންވުމުން ބައެއް މީހުން ކޮޓަރއާއި ގެތައް ތަޅުލައެވެ. އަވަސްޓެރިއަކަށް ނަމަވެސް އެނގިދާނެކަމަށް ބިރުން ދުރު ސަރަހައްދުތަކަށްވެސް ދެއެވެ. ޤާނޫނަށް ބިރުން ފާފަކުރުން ހުއްދަ ޤައުމުތަކަށްވެސް ދެއެވެ. ނަމަވެސް މިއިން އެއްވެސް ކަމަކުން ތިމާއަށް ލިބެން އޮތް ފާފައިން ސަލާމަތެއް ނުވެވެއެވެ!
ކިތަންމެ ވަރަކަށް ސިއްރުކޮށްގެން ތިބިނަމަވެސް ކިތަންމެ ވަރަކަށް އެކަހެރިވިޔަސް އެމީހަކުވީ ކޮންމެ ތަނެއްގައި ކޮންމެ ޙާލަތެއްގައިވެސް އެމީހަކާއިއެކުގައި އެމީހާގެ ފަތް ލިޔުއްވަވާ ދެމަލާއިކަތުން ދެކޮނޑުގައިވެއެވެ. އެބޭކަލުންނާއި ވަކިވެ އެބޭކަލުންނަށް ސިއްރުން އެއްވެސް ކަމެއް ނުކުރެވޭނެއެވެ!
އަދި ކީއްހެއްޔެވެ؟ ކޮންމެ ޤައުމެއްގައި ފާފަކުރިނަމަވެސް، ކަނޑުގެ އަޑީގައިކުރިނަމަވެސް ކިތަންމ އުސްޢިމާރާތެއްގެ ކިތަންމެ މަތީގައި ކުރިނަމަވެސް ފާފަތައް ތިއަކުރެވެނީ ހަމަ ﷲ ތަޢާލާގެ ބިމުގައެވެ. އެކަން ﷲ ތަޢާލާ ވަނީ ޤުރްއާނުގައި ވަޙީކުރައްވަވައިފައެވެ. ބިރުވެތިވާށެވެ!
"މަޝްރިޤް އާއި މަޣްރިބް މިލްކުވެވޮޑިގެންވަނީ ﷲ އަށެވެ. ފަހެ، ތިއަބައިމީހުން ކޮންމެ ފަރާތަކަށް އެނބުރުނަސް، އެތަނެއްގައި ﷲ ވޮޑިގެންވެއެވެ. ހަމަކަށަވަރުން، ﷲ އީ، ތަނަވަސްވެގެންވާ، މޮޅަށް ދެނވޮޑިގެންވާ ރަސްކަލާނގެއެވެ." (އަލްބަޤަރާ: 115)
--އިސްލާމީ ތިލަފަތުގެ ދަރުސަކުން
