އަހަރެމެން ކޮންމެ މީހަކުވެސް އެންމެ ބޮޑަށް ބޭނުންވާނެ އެއްކަމަކީ ކުރިދީދުވަސް ނުވަތަ އިއްޔެއަށްވުރެ މިއަދުގެ ކަންކަން ރަނގަޅުވުމެވެ. އުފާވެރިވުމެވެ. އެހެންވެ އަހަރެމެން ކޮންމެ ދުވަހަކުވެސް މަސައްކަތް މިފަނީ އެކަމުގެ އުންމީދުތަކާއިއެކުގައެވެ.
ގިނަ ބައަކަށް އެންމެ ބޮޑު އެއްމައްސަލައަކަށްވެފައި އޮންނަނީ ދުވަސްފަށާ ހިސާބެވެ. ގިނަ ބައަކު ދުވަސްފަށާ ހިސާބުކަމަށް ކަނޑައަޅަނީ ފަތިސް ނަމާދެވެ. އެއީ ދުވަހުގެ ފުރަތަމަ ފަރުޟު ނަމާދުކަމަށްވުމުންނެވެ. އަދި ދުވަހުގެ މަސައްކަތްތައް ކާމިޔާބުކުރަން ކުރަންޖެހޭ މަސައްކަތްތަކާއި ފަތިސް ނަމާދާއި ގުޅިފައިވާ މިންވަރު ބޮޑުކަމުންނެވެ.
ނަމަވެސް އަހަރެން ވިސްނާގޮތުން ދުވަސްފެށުން އެއިގެ ކުރިއަށް ޖައްސައިލަން އެބަޖެހެއެވެ. ދުވަސްފަށާ ހިސާބާއި ކުރީ ދުވަސް ނިންމާހިސާބާއި ގުޅުވާލަން އެބަޖެހެއެވެ. މިބުނަނީ ކުރީ ދުވަސް ނިންމައި ހިސާބެވެ!
ރަސޫލް (ޞޢވ)ގެ ޙަދީޘްފުޅުގައި އޮތީ މުހިންމު މަސައްކަތެއް ނުވަތަ މުހިންމު ކަމެއް ދމާވެގެން ނޫނީ ޢިޝާ ނަމާދަށްފަހު ހޭލައި ނުހުރުމަށެވެ. އެއީ އަވަހަށް ނިދައި އަވަހަށް ނިދުމަކީ ދަމުނަމާދަށާއި ފަތިސްނަމާދަށް ހޭލުމަށްޓަކައި ކޮންމެހެން ކުރަންޖެހޭ ކަމަކަށްވާތީއެވެ. ހޭލެވޭނީ ކުރިޢާލައި ނިދައިގެންކަމަށްވާތީއެވެ.
ފަތިސް ނަމާދަށް ހޭލުމުގ ނިޔަތުގައި ނިދިނަމަވެސް ސޯނާކޮށްގެން ނިދިނަމަވެސް ގިނަބައަކަށް މިއުޅެނީ ފަތިސްނަމާދަށް ނުހޭލެވިގެންނެވެ. ސޯނާވުމުން ސޯނާވުން ކަނޑާލާފައިވެސް ނިދޭތީއެވެ. ސަބަބަކީ ރަސޫލް (ޞޢވ)ގެ ޙަދީޘްފުޅަށް ޢަމަލުނުކުރެވޭކަމެވެ. ނުނިދައި ވަގުތުތައް ބޭކާރުކުރެވޭކަމެވެ. ގޭމްކުޅުމާއި ފިލްމްބެލުމާއި ރައްޓެހިންނާއިއެކު ބޭކާރު ކަންކަމުގައި ވަގުތު ހޭފަކުރުމާއި އެނޫންވެސް ތިމާއަށް އެއްވެސް ފައިދާއެއް ނުކުރާނެ ގޮތުގައި ވަގުތުތައް ނުނިދައި ބޭކާރުކޮށްލެވޭތީއެވެ.
ދުލުން ބުނަނީ ރަސޫލް (ޞޢވ) ދެކެ ނިހާޔަތަށް ލޯބިވާކަމަށެވެ. ނަމަވެސް މިވަރުކަމެއްގައިވެސް ޙަދީޘްފުޅަށް ޢަމަލުކުރަން ބެނުމެއް ނުވެއެވެ. ވީއިރު ރަސޫލް (ޞޢވ) ދެކެ ލޯބިވާކަމަށް ތިއަ ބުނަނީ ކޮންގޮތަކަށް ލޯބިވާތީހެއްޔެވެ؟
މިފަދަ ކަންކަމަށް ވިސްނައި ދިރިއުޅުމުގެ ކަންކަން އިޞްލާޙްކުރުމަކީ މިއަދަށްވުރެ މާދަމާ ރަނގަޅުވުމަށް އުންމީދުކުރާ މީހާ ކޮންމެހެން ކުރަންޖެހޭނެ ކަންކަމެވެ. ނުހަނު ލުއިފަސޭހަކަމާއިއެކު ކުރެވެން ހުރި ކަންކަމެވެ. ފަތިސްނަމާދަށް ނުހޭލައި ނިދާފައި އޮންނަ މީހާ، އެދުވަހުގެ ކަންކަން ރަނގަޅުވުމަށް އެދެވޭނީވެސް ކޮން ގޮތަކުން ހެއްޔެވެ؟
- މުފްތީ މެންކުގެ ދަރުސަކުން
