އަބަދުވެސް އަހަރެމެން ދައްކައި މިއުޅެނީ ފާރަލުމުގެ ހުރި ނުބައިކަމުގެ ވާހަކައެވެ. އެއިރުން، ފާރަލުމުން ފާފަވެރިވާ ކަމުގެ ވާހަކައެވެ. އެހެންކަމުން މިރޭ ދެއްކޭތޯ މިބަލަނީ ފާރަވެރިނުވުމުން، ނުވަތަ ފާރަނުލުމުން ތިމާ ފާފަވެރިވާނެ އެއް ޙާލަތުގެ ވާހަކައެވެ.
މިއީ އެގޮތުން ވަރަށް ބޮޑަށް ފާރަލާން ޖެހޭ ޙާލަތެކެވެ! އެއީ ދަރިންގެ ކަންކަމުގައެވެ. ދަރިއަކު ނުރަނގަޅު މަގަކުން ކުރިއަށްދާކަމަށް ޝައްކު ކުރެވޭނަމަ ފުރަތަމަ ކުރަން ޖެހޭނެ ކަމަކީ އެކަމެއް ހިނގާކަން ކަށަވަރުކުރުމެވެ. އެކަމެއް ދަރިފުޅު ކުރާކަން ޔަޤީން ނުކޮށް ފިޔަވަޅު އެޅޭގޮތް ބައެއް ފަހަރު މެދުވެރިވެއެވެ. އެފަދަ ޙާލަތްތަކުގައި މައިން ބަފައިން އިތުބާރު ނުކުރީތީ ދުނިޔޭގައި ހުންނަން ބޭނުން ނުވެގެން ދަރިން އަމިއްލައަށް މަރުވެފައިވެސް އެބަހުއްޓެވެ. ވީމާ ދަރިއަކާއިމެދު އެއްވެސް ފިޔަވަޅެއް އެޅުމުގެ ކުރިން ވަރަށް ބޮޑަށް ބަލަން ޖެހޭނެއެވެ.
މިގޮތަށްވެސް ވިސްނާށެވެ! މީހަކު ތިބާއަށް ދެރައެއް ދީފިނަމަ އެކަން އެނބުރި ތިބާއަށް ލިބޭނީ ފައިދާއެއްގެ ގޮތުގައެވެ. އަނިޔާ ނުވަތަ ގެއްލުން ދިން މީހާގެ ކިބައިން އެކަމަށް ހައްޤު ބަދަލު އެންމެ ފުރިހަމަ ގޮތުގައި ﷲ ތަޢާލާ ތިބާއަށް ހޯއްދަވައިދެއްވަވާނެތެވެ. ނަމަވެސް ތިބާއަށް ބަލަހައްޓަން ޖެހޭ ދަރިއަކު ތިބާ ނުބަލަހައްޓައިގެން މަގުން ކައްސައިލި ނަމަ އެކަމުގެ ޒިންމާ އުފުލަން ޖެހޭނީ ތިބާއަށެވެ. ވީމާ މިއީ މުޅިން ތަފާތު ދެ ޙާލަތެކެވެ.
ދަރިން ބޮޑެތިވެ ތިބާގެ ކިބައިން ބެލެނިވެރިކަން ނެތިގެން ދިއުމުން ފާރަލައިގެން ނުވާނެއެވެ. ބައެއް ޢާއިލާތަކުގައި ދަރިން ބޮޑެތިވެ ކައިވެނިކޮށް އަމިއްލަ ދިރިއުޅުމަށް ފެށުމުން ވެސް އެބަފާރަލައެވެ. އެދެމަފިރުން ދައްކާވާހަކަ ސިއްރުން އެބަ އަޑުއަހައެވެ. މިއީ އެއްވެސް ޙާލެއްގައި ހުއްދަވެގެންވާ ކަމެއް ނޫނެވެ. އެހެންކަމުން އެއީ ދަރިންނަށްވީތީ އެފަދަ ކަމެއް އެއްވެސް ބެލެނިވެރިއަކު ކޮށްގެން ނުވާނެއެވެ. ކޮށްފިނަނަ އެކަން ވާނީ އިމުން ބޭރުވުން ކަމަށެވެ! އެކަމުގެ ސަބަބުން އެކަންކުރި މީހަކު ފާފަވެރިވެސްވާނެއެވެ!
- އިސްލާމީ ތިލަފަތުގެ ދަރުސަކުން
