السَّلاَمُ
(ސަލާމަތްކަން ދެއްވާ ރަސްކަލާނގެ)
السَّلاَمُ ގެ މާނައަކީ: އެފަރާތާ އެކަށީގެންނުވާ ހުރިހާ އުނި ސިފަތަކާއި، ކަންކަމުން އެފަރާތުގެ ޒާތުފުޅާއި، ސިފަފުޅުތަކާއި، ޢަމަލުފުޅުތައް ސަލާމަތް ވެގެންވާ ފަރާތެވެ.
ސަލާމަތްކަމާއި، އަމާންކަން ނެގިފައިވަނީ السَّلاَمُ މި ނަންފުޅުންނެވެ. (އެހެންކަމުން السَّلاَمُ އަކީ ސަލާމަތްކަމާއި ރައްކައުތެރިކަން ދެއްވާ ރަސްކަލާނގެއެވެ.) ﷲގެ ދީން އިސްލާމް ނެގިފައިވަނީވެސް އެކަލާނގެ މިނަންފުޅުންނެވެ. މާތްﷲގެ މިނަންފުޅު އައިސްފައިވަނީ ހަމައެކަނި ޙަޝްރު ސޫރަތުގައެވެ.
ޤިޔާމަތް ދުވަހު މުއުމިންނުގެ ތަޙިއްޔަތަކީ (سلام) އެވެ. މާތްﷲ ވަޙީކުރައްވަނީ (تَحِيَّتُهُمْ يَوْمَ يَلْقَوْنَهُۥ سَلَـٰمٌ) ’’އެބައިމީހުން އެކަލާނގެއާ ބައްދަލުވާ ދުވަހުގެ ތަޙިއްޔަތަކީ ސަލާމެވެ.“
މާތްﷲ މުއުމިނު އަޅުންނަށް ތައްޔާރު ކޮށްދެއްވާފައިވާ ގޮވެތީގެ ނަންތަކުގެ ތެރޭގައި ދާރުއްސަލާމް (އަމާންކަމުގެ ގޮވަތި) ހިމެނެއެވެ.
ނަމާދުގައި މުސްލިމުން މުސްލިމުންނަށް ރައްދުކުރާ ތަޙިއްޔަތަކީ ސަލާމެވެ. އެއީ (السلام عَلَيْكَ أيّهاالنبىّ ورحمة الله وبركاته السّلامُ علينا وعلى عباد الله الصّالحين) އެވެ.
ބުނެވޭ ގޮތުގައި ހުން އައުމުން (قُلْنَا يَا نَارُ كُوْنِى بَرْدًا وَسَلاَمًا عَلَى إِبْرَاهِيم) މިއާޔަތް ކިޔެވުމުން ހުމުގެ އުނދަގޫތައް ލުއިކޮށް ދެއްވާނެއެވެ.
މިނަންފުޅުން ދުޢާ ދަންނަވާމީހާ ޝައިޠާނާގެ ވަސްވާހުންނާއި، މަކަރާއި ޙީލަތުން ސަލާމަތް ކޮށްދެއްވާނެއެވެ. ބަލިމީހެއްގެ ގާތުގައި އޭނާއަށް ޝިފާދެއްވުމަށް އެދި 121 ފަހަރު މިނަންފުޅު ކިޔަވައިފިނަމަ އެބަލިން އެމީހަކު ސަލާމަތް ކޮށްދެއްވާނެއެވެ. އެއީ މަރުބަލި ކަމުގައި ނުވާނަމައެވެ.
ބުނެވޭ ގޮތުގައި ކޮންމެ ދުވަހަކު 100 ފަހަރު السلام عليك أيها النبى ورحمة الله وبركاته ކިޔާ އުޅުނު މީހާއަށް މަރުގެ ވޭންތަކެއް ނުދައްކަވާނެއެވެ. އަދި އޭނާއަށް ކުރިމަތިވާ ބުރަކަންތައްތައް ލުއި ކޮށްދެއްވާނެއެވެ. އަދި މާތްﷲގެ އިޒްނަފުޅުން އޭނާއަށް ބުރަކަމެއް ނުޖައްސަވާނެއެވެ.
(މިއީ 1992ވަނަ އަހަރު އަލްއުސްތާޛް އިބްރާހީމް ރަޝީދު މޫސާ ލިޔުއްވާފައިވާ އޮނަސައްތަ އިސްމުފުޅު މި ފޮތުން އުސްތާޛްގެ އިޛުނައާއިއެކު ނަގާފައިވާ ބައިތަކެކެވެ. ދެންހުރި ބައިތަށް ގެނެސްދޭންވެސް މަސައްކަތްކުރާނަމެވެ. އޮނަސައްތަ އިސްމްފުޅު މާނައާއިއެކު އެނގުމަކީ ކޮންމެ މުސްލިމަކަށްވެސް ވަރަށް މުހިންމު ކަމެކެވެ.)
