އަހަރެން ނިޞްބަތްވަނީ ބޮޑުތިލަދުންމަތީގެ ރަށަކަށެވެ. ކައިވެންޏަށް މިއީ 17 އަހަރެވެ. 4 ދަރިންވަނީ ލިބިފައެވެ. ފެށުނީންސުރެ އަހަރެންނާއި ދަރިން ދިރިއުޅެނީ ރަށުގައެވެ. ފިރިމީހާއަކީ ބޮޑު ކުންފުންޏެއްގައި ރަނގަޅު ވަޒީފާއެއް އަދާކުރާ މީހެކެވެ. ޗުއްޓީ ލިބޭވަރަކުން ރަށަށްވެސް އާދެއެވެ.
ކޮންމެ ދުވަހަކުވެސް 2 ފަހަރު ފޯނުކުރާނެއެވ. ނިދުމުގެކުރިންވެސް ފޯނުކުރާނެއެވެ. ވީޑިއޯ ކޯލްކޮށް އެކުގައި ވަގުތު ހޭދަކުރާނެއެވެ. ކައިވެންޏަށް 11 ވަރަކަށް އަހަރުވީތަނާ މިކަންކަން ބަދަލުވާން ފަށައިފިއެވެ. ފޯނުކޯލުތައް މަދުވަމުން ގޮސް މުޅިން ހުއްޓިއްޖެއެވެ. ނިދުމުގެކުރިން ކުރަމުން އައި ވީޑިއޯކޯލްކުރުން ވެސް ހުއްތިއްޖެއެވެ.
އެއިރު އަހަރެން ހުރީ އެކަމަށް ދެވިހިފައިފައެވެ. އެހެންވެ ކޯލާއި ނުލާ ނިދުން އުނދަގޫކަމަކަށްވިއެވެ. އެހެންވެ އަހަރެން ގުލަމެވެ. ފޯނަށް ޖަވާބުލިބެނީ މަދުރެއަކުއެވެ. ބުނަނީ ބިޒީކަމުން ވަގުތު ނުވަނީކަމަށެވެ. މަޤާމު މަތިވެ މުސާރަ ވެސް ބޮޑުވުމުން ގިނަވަގުތު މަސައްކަތުގައި އުޅެން ޖެހެނީ ކަމަށެވެ. ރަށަށް އާދެވުންވެސް ލަސްވަނީ އެސަބަބުތަކަށްޓަކައި ކަމަށެވެ.
މުސާރަބޮޑުވުމުން ޢާއިލާއަށް ތަނަވަސްކަން އިތުރުވާނެތީ އެކަމަށް އުފާކޮށް ކެތްތެރިވީމެވެ. ނަމަވެސް ޝައްކު އުފެދެންފެށީ އަހަރެމެންނަށް ރަށަށް ފޮނުވާ ފައިސާކޮޅު އެއްވެސް ވަރަކަށް އިތުރުނުވުމުންނެވެ.
އަހަރެންނަކީ ވެސް ދަރިން ލިބެންފެށީންސުރެ ދަމުނަމާދުކޮށް ބޭނުންވާ ކަންކަމަށް އެދި ދުޢާކުރަމުން އައި އަންހެނަކީމެވެ. ފިރިމީހާގެ މައްޗަށް ހިތުގައި ޝައްކުތައް އުފެދެން ފެށުމުން ދުޢާކުރުން އިތުރުކުރީމެވެ. ފިރިމީހާގެ ކިބައިގައި މަކަރުވެރިކަމެއްވާނަމަ އެކަން ހާމަކޮށްދެއްވަވައި އޭނާގެ ކިބައިން ސަލާމަތްކުރައްވަވައި ދެއްވެވުން އެދިއެވެ. އުފާވެރި ޙަޔާތެއް މިންވަރުކުރައްވަވައި ދެއްވެވުން އެދިއެވެ.
ކޮންމެއަކަސް ރަށަށް އެއްގޮތަކަށްވެސް ނައިސް 2 އަހަރެއްހައި ދުވަސް ފާއިތުވުމަށްފަހު އައި ދަތުރެވެ. އާދައިގެމަތިން އަހަރެންގެ ބޭބެމެންނާއިއެކު މަހަށްދިއަ ރެއެކެވެ. ދެވުނީ ހަނދާންނެތި ފޯނު އޭނާގެ އަލަމާރީގައި ބާއްވާފައެވެ. އަހަރެންނަކީ އެހައި ތަނަށް ދުވަހަކުވެސް ފިރިމީހާގެ ފޯނުގައި އަތްލި މީހެއްވެސް ނޫނެވެ. ނަމަވެސް އެރޭ ހަމަ ފޯނުބަލައިލާހިތްވީއެވެ.
ފޯނުނަގައި ބަލައިލިއިރު އޮތީ ލޮކްކޮށްފައެވެ. ފޯނު ހިފަހައްޓައިގެން ހުއްޓާ އައީ ވައިބަރ މެސެޖެކެވެ. ފުރަތަމަ 2 ލައިން ފެނުނެވެ. "ދޮށީ އަނބިގާތަށް ދެވުނީމަ .."
އެހިސާބުން ހަތަރެސްފައިން ވާގިދޫވިއެވެ. ބަސްހުއްޓުނެވެ. ފޯނު ހިފައިގެން ގޮސް އެނދުގައި އިންދާ 2 3، ފަހަރު ފޯނުވިއެވެ. ސޭވްނުކޮށް އިނީތީ ނަންބަރުވެސް އެނގުނެވެ. ހިތުދަސްކޮށްލީމެވެ. އިރުކޮޅަކު މަޑުކޮށްލުމަށްފަހު އެނަންބަރަށް އަހަރެންގެ ފޯނުން ގުޅައިލީމެވެ. އަންހެނަކު ފޯނު ނެގުމުން ފިރިމީހާގެ ނަން ބުނެފައި ދަންނަ ފިރިހިނެއްތޯ ސުވާލުކޮށްލީމެވެ.
ޖަވާބުގައި އެއީ އޭނާގެވެސް ފިރިމީހާކަމަށް ބުނުމުން ބުނީމެވެ. "މަރުޙަބާއެވެ. އަދި ދެމަފިރިންގެ ޙަޔާތަށް ބާއްޖަވެރިކަމަށް އެދި ދުޢާވެސް ކުރީމެވެ. އެއަށްފަހު ފޯނުން ނަމަވެސް ބައްދަލުވިކަމަށްޓަކައި އުފާކުރާކަމަށްބުނެފައި މިއީ ދޮށި އަނބިމީހާކަމަށް ބުނުމުން އޭނާ ފޯނުކަނޑައިލީއެވެ.
ފިރިމީހާ އައުމުން އެއްވެސް ޝަކުވާއެއް ނުކުރަމެވެ. ކަމެއްވީކަމަކަމަކަށްވެސް ނުދައްކަމެވެ. ނަމަވެސް އެރޭ ނިދުމުގެ ވަގުތުގައި އަހަރެންނަށް ވަރަށް ބޮޑަށް ގިސްލާރޮވުނެވެ. ފިރިމީހާ ތަކުރާރުކޮށް ސުާލުކުރުމުން ބުނީމެވެ. "ބިޒީވި ސަބަބު މިހާރު ވަރަށް ބޮޑަށް އެނގިއްޖެއެވެ. ވައްކަން ނުކޮށް ބުނެލއިގެން ކުރިނަމަ މިއަސަރެއް ނުކުރީހެވެ. ކުރިމަތީގައި ރޯކަށްވެސް ނުޖެހުނީހެވެ."
ފިރިމީހާ ބުނީ އެއީ މާލޭގައި ގެދޮރުހުރި ތަނަވަސް އަންހެނަކަށްވުމުން ދިރިއުޅެން ފަސޭހަކޮށްލީ ކަމަށެވެ. އެއްވެސް ޙާލެއްގައި ލޯބިން ކުރިކަމެއް ނޫން ކަމަށެވެ. އަހަރެން ބުނީމެވެ. "އަހަރެންނާއި ބާއްވަމުން އައި ގުޅުން ކަނޑާލައި ފޯނެއްވެސް ނުކުރީމާ ތިއަ ހުރިހާ ކަމެއްގެ ޙަޤީޤަތް އެއޮތީ ފެންނާށެވެ! އަަހރެން ދެކެ ތިއަވަރަށް ލޯބިވާކަމަށްޓަކައި ހަމަ ވަރަށް ބޮޑަށް ޝުކުރިއްޔާއެވެ." އިތުރު ވާހަކައެއް ނުދައްކަމެވެ. އެއްވެސް ޝަކުވާއެއްވެސް ނުކޮށް ޙަޤީޤަތް އެނގުނުކަމަށްޓަކައި ﷲ އަށް ޙަމްދުކުރީމެވެ.
ދެތިން ދުވަސްފަހުން ފިރިމީހާ ފުރައިގެން މާލެ އަތުވެއްޖެއެވެ. ޚަބަރެއްވެސް ނުވެ ހަފްތާއެއްހައި ދުވަސްވެފައިވަނިކޮށް ކޯޓަށް އަހަރެން ގެންގޮސްފައި ފިރިމީހާ އަހަރެން ވަރިކުރަން ބޭނުންވެގެން ފެމިލީކޯޓަށް ހުށަހަލާފައި އޮތްކަމަށް ބުންޏެވެ. އަހަރެން ހަމަ ވަގުތުން އެކަމަށްވެސް މަރުޙަބާ ކީމެވެ.
ވަރިކުރީތީ ދެރައެއްވެސް ނުވެއެވެ. އުފަލެއްވެސް ނުވެއެވެ. ފިރިމީހާ ކަރަދުކުރުން ހުއްޓާލައިފިނަމަ 4 ކުދިން ބަލާނެ ގޮތަކާއިމެދު ކޮންމެވެސް ވަރަކަށް ކަންބޮޑުވިއެވެ. ނަމަވެސް ރިޒްޤާއި ނިޢުމަތަކީ ﷲ ދއްވަވާ ކަންކަން ކަމުގައިވުމުން އެކަންވެސް މާބޮޑުކަމަކަށް ނުވާނެކަމަށް ޔަޤީންކުރީމެވެ.
ރަށުގައި ހިންގާ ހޮޓަލަކުން ގަންނަން ބުނުމުން ހެދިކާހަދަންފެށީމެވެ. އަހަރެން ހަދާތަކެތި މީހުންނަށް ކަމުދާތީ އޮންނަނީ ބޭނުންވާވަރަސް ނުހެދިފައެވެ. އެހެންވެ ފަހުން އެކުވެރި ބައެއް ކުދިން ބައިވެރިކޮށްގެން މަސައްކަތްފުޅައުކުރުމުން ފިރިމީހާގެ އެހީތެރިކަމާއި ނުލައި އުޅެލެވޭވަރުވެސް ވިއެވެ. އިން ޝާ ﷲ
ކަންކަން މެދުވެރިވީވެސް ހަމައެހެންނެވެ. ހައކަމަސްވީތަނާ ދަރިންނަށް ޚަރަދުކުރުންވެސް ހުއްޓާލައިފިއެވެ. ޚަރަދު ހޯދަން ކޯޓަކަށްވެސް ނުދަމެވެ. ޤިޔާމަތް ދުވަހުގެ އެކައުންޓަށް ޖަމާކުރަން ދޫކޮށްލީއެވެ.
ދެން އޮތީ އަހަރެންކުރި ދުޢާގެ ވާހަކައެވެ. އެކަމުގެ ނަތީޖާ ފެނުނު ގޮތެވެ. އަނބިމީހާ މަރުވެފައި ހުރި އޮޑިވެރިއަކު އަހަރެންގެ ކައިވެންޏަށް އެދުމުން ކައިވެނިކުރީއެވެ. އޭނާ ބޭނުންވީ އަހަރެންނަށް ގޭގައި ހޮޓަލެއް ހުޅުވައިދޭށެވެ. ނަމަވެސް އަހަރެން ބޭނުންވީ އަނބުރާ ދައްކާގޮތަށް ފައިސާ ހޯދައިގެން އެކަންކުޜާށެވެ! އަހަރެންގެ ގޭގައި އެހެން މީހަކު ލައްވާ އެއްވެސް މީހެއްގެ ފައިސާއިން ޚަރަދުކޮށްގެން އިމާރާތެއްކުރަން ބޭނުންނުވާތީއެވެ.
ފިރިމީހާ އަހަރެން އެދުނުގޮތަށް އެއްބަސްވުމުން މައިންބަފައިން އަޅާފައިހުރި ޢިމާރާތަކަށް އޭނާގެ އެހީތެރިކަމާއިއެކު ބައެއް ބަދަލުގެނެސް ހޮޓަލަކަށް ބަދަލުކުރީއެވެ. ދަރިންނަށް ޚަރަދުކުރީ އެމަސައްކަތުން ލިބޭ އާމްދަނީންނެވެ.
މިހާރު 4 ދަރިންވެސް ކިޔަވާ ނިމި ބޮޑެތިވެ ކައިވެނިވެސްކޮށްފިއެވެ. 3 ދަރިންނަށް ދަރިންވެސް ލިބިއްޖެއެވެ. އަހަރެންގެ މިހާރުގެ ޢުމުރަކީ 56 އަހަރެވެ. ﷲ ގެ ރަހްމަތުން ދިރިއުޅެމުން މިދަނީ 4 ދަރިންގެ ފުރިހަމަ ލޯތްބާއި ފިރިމީހާގެ ލޯތްބާއި އަޅައިލުމުގެ އިތުރުން ފރިމީހާއަށް ލިބިފައިތިބި 5 ދަރިންގެ ލޯތްބާއިއެކު ވަރަށް އުފަލުގައެވެ.
ލިބޭ ޚަބަރުތަކަށްބަލާއިރު ކުރީގެ ފިރިމީހާއަށް މިހާރު ވަނީ ބުއި ޒަހަރުގެ ހިތިރަހަ ރަނގަޅަށް ލައިފައެވެ. ލަދުން އެހުންނަނީ ރަށަށް ދަރިންގެ މުރިމައްޗަށް އަންނަންވެސް ނުކުރިފައެވެ. އެކަމާ ހިތާމަވެސް ކުރަމެވެ. ދަރިންނަށް އެކުދިންގެ ބައްޕަގެ ލޯބި ނުލިބުނުތަނުގައި ލޮލަށްވެސް ނުފެންނާތީއެވެ. އެބުނި ތަނަވަސް އަނބިމީހާ ޑްރަގް ޑީލްކުރަން އުޅުނު މައްސަލައެއްގައި 20 އަހަރަށް ޖަލަށްލި ވާހަކަވެސް ނޫސްތަކުން ފެނުނެވެ.
ބޭނުމަކީ އޭނާގެ ޙަޔާތުގެ ވާހަކަ ދެއްކުމެއް ނޫނެވެ. އަހަރެންގެ ޙަޔާތުގެ ވާހަކަ މިއަދުނޫހުގެ ކިޔުންތެރިންނާއި ހިއްޞާމިކުރީ އަނިޔާވެރި ބޭވަފާތެރިންނާއިއެކު ދިރިއުޅުމުގެ އަގުހުރި ވަގުތުތައް ނަގާނުލައި އަހަރެމެން އަންހެނުންނަކީ ވެސް އަމިއްލަ މަސައްކަތުން ދިރިއުޅެން މަސައްކަތްކުރުމުން ﷲ ވާގިފުޅާއިއެކު ކާމިޔާބުކުރެވޭނެ ބައެއްކަން ސާބިތުކޮށްދިނުމެވެ. އެކަމަށް ބޭނުންވަނީ ހިތްވަރާއި ސާބިތުކަމާއި ނަމާދާއި ޚާއްޞަކޮށް ދަމުނަމާދާއި ދުޢާކަން ބަޔާންކުރުމެވެ.
"ޙަޤީޤީ ހާދިސާ"އަށް މައުލޫމާތު ހިއްޞާކުރާ އެހެން މީހުން ފަދައިން އަހަރެންވެސް ބުނެލަން އޮތީ އަހަރެންގެ ޙަޔާތުންވެސް ކިޔުންތެރިންނަށް ޢިބްރަތްލިބި މާޔޫސްކަމުން ސަލާމަތްވެ ހަށިފޮޅާލަން ހިތްވަރު ލިބޭނެ ކަމަށް އުންމީދުކުރާ ކަމަށެވެ.
- "ޝަމީމާ"/ މިއަދުނޫހުގެ ކިޔުންތެރިއެއް
