"މިސްކިތުގަ އެންމެން ރަނގަޅަށް ސަފުނުހަދާތީ އެންމެން ގޭގައި ނަމާދުކުރަން ވެއްޖެނަމަ މިސްކިތުގަ ހިނގާ ނުބައިކަންތައް ރަނގަޅުކުރެވޭނެ ގޮޮތެއް ނޯންނާނެއެވެ. ވީމާ ޙައްލަކީ ވީހައިގިނަބައަކު މިސްކިތަގެ ޖަމާޢަށް މިސްކިތަށް ގޮސް ރަސޫލުﷲ ޞަލަﷲ ޢަލައިހި ވަސައްލަމަ ގެ އރިޝާދަށް ބޯލަނބައި ކައިރިކައިރީތިބެ ސަފުހަދައިގެން ނަމާދުކުރުމެވެ.
އަދި 2020ގެ ބިދުޢައެއްގެ ގޮތުގައި އުފެދިގެންއުޅޭ "ސޯޝަލް ޑިސްޓޭންސް" ބަހައްޓައިގެން ނަމާދުގެ ސަފު ހެދުމުގެ ކަންތައް ވުޖޫދުން ފޮހެލުމަށް ކޮންމެ މީހަކުވެސް އެމީހެއްގެ ފަރުދީ ޒިންމާ އަދާކުރުމެވެ." ޑރ. މުޙައްމަދު އިޔާމް ޢަބްދުއްލަޠީފް
ޑރ. އިޔާޟް މިފަދަ ބަސްފުޅެއް ވިދާޅުވެފައިވަނީ މިސްކިތުގައި މިހާރު ސަފުހަދާގޮތް ޤަބޫލުނުކުރެވޭތީ ގޭގައި ނަމާދުކުރުމަކީ ރަނގަޅުކަމެއްތޯ މީހަކު ކޮށްފައިވާ ސުވާލެއްގެ ޖަވާބުގައެވެ.
ރާއްޖޭގައި ގައިދުރުކޮށް ސަފުހަދަން ބުނާ މީހުންގެ ކިބައިން މި 2 ސުވާލުގެ ޖަވާބު ބޭނުންވާކަމަށް ބައެއް މީހުން ބުނެއެވެ.
1 ސައިންސްވެރިން ބުނަނީ ކޮރޯނާ ވައިރަސްއަކީ 3 ފޫޓަށް ފުމޭ އެއްޗެއްކަމަށެވެ. ވީމާ ރާއްޖޭގެ މިސްކިތްތަކުގައި މިތިބޭފަދައިން 6 އިންޗި، 1 ފޫޓު ދުރުގައި ތިބީމާ 3 ފޫޓަށް ފުމޭ ވައިރަސް އައިސް އަރައިގަތުމަށް އޮތީ ކޮންހުރަހެއްތޯއެވެ؟
2 ސުންނަތުގައިވާ އިރުޝާދަށް ތަބައެވެ ސަފުހަދާއިރު ޖައްސަނީ ދެފައިތިލައެވެ. ދެން ޖެހުނަސް ޖެހޭނީ ދެމީހުންގެ ދެއަތުގެ ދެއުޅަބޮށި ކޮޅެވެ. ކޮރޯނާ ވައިރަސް އަރާފާނެތީ އެގޮތަށް ހުންނަން ނުކެރިގެން 6 އިންޗި، 1 ފޫޓު ދުރުގައި ހުރެ ނަމާދުކޮށްފައި ފައިބާތަނުން ތިމާއާއި ޖެހިގެން ކައިރީގައި ހުރި މީހާ ރުފިޔާ ބޮނޑިއެއް ދީފިނަމަ ދުއްވައިގަންނާނީ އެއިގައި ހިފަން އަތަށް ލައްވާނެ އަނގިއެއް ހޯދަންތޯއެވެ؟ އަވަސްވެގަންނާނީ ރުފިޔާބޮނޑީގައި ހިފަންތޯއެވެ؟ އުޅަނބޮށިކޮޅުންނާއި ފައިތިލައިން އަރާފާނެކަމަށް ބިރުގަތް ކޮރޯނާ ވައިރަސް، ހަމައެމީހާގެ އަތްތިލައިން ހިފާފައިދޭ ރުފިޔާއިން ނާރާނީތޯއެވެ؟
މި ދެ ސުވާލުގެ ޖަވާބު އަމިއްލަ ނަފްސަށް ދިނުމުން މިހާރު ގިނަ މިސްކިތްތަކުގައި ސަފު މިހެދެނީ ކޮރޯނާ ވައިރަސް އިން ސަލާމަތްވެވޭނެ ގޮތަށް ނޫންކަމާއި އަދި ސުންނަތަށް ގޮންޖެހުމުން ކުރާ ފައިދާއެއްވެސް ނެތްކަން ވަރަށް ރަނގަޅަށް ވިސްނޭނެ ކމަށްވެސް މިހެން ބުނާ މީހުން ބުނެއެވެ.
އަދިވެސް ވަރަށް ގިނަ މީހުން ބުނެއެވެ.
"ޤަމަތް ދިނުމަށްފަހު ނަމާދަށް ޙަރަމްބަނުމާއި ދެމެދަށް މުސައްލަ އިލްތިމާސްލުމުން ކުރާ ފައިދާއެއް ނުފެނެއެވެ. އެއިރު މިސްކިތުގައި ތިބި ބައަކު ފައިބައިގެން މުސައްލައެއް ހޯދާކަށް ނުދާނެއެވެ. އަދި އެ އިލްތިމާސްގެ ސަބަބުން ސިކުނޑީގެ މިސްރާބު ބަދަލުވެއެވެ. ފައިދާކުރާނީ ބަންގިގޮވުމުގެ ކުރިން ހަނދާންކޮށްދިނުމުންނެވެ."
"ގިނަމީހުން ނަމާދަށްދާއިރު މުސައްލަ ނުގެންދަނީ ބޭރުގައި އުޅެމުން މިސްކިތަށް އަރާތީއެވެ. ހުކުރު ނަމާދަށް ގިނަމީހުން ދަނީ މުސައްލަ ހިފައިގެންނެވެ. ވީމާ ހޭލުންތެރިކަން ކުޑައީ ނޫންކަން އެބައެނގެއެވެ. ވީމާ ޙައްލަކީ އިސްލާމިކް މިނިސްޓްރީން ފުރަތަމަ އިއުލާނުކުރި ފަދައިން ކޮންމެ ނަމާދަކަށް މިސްކިތުގެ ނަމާދުކުރާ ސަރަހައްދު އެކަނި ނަމަވެސް މޮޕްލައި ޑިސްއިންފެކްޓްކުރުމެވެ."
އަނެއްބައަކު ބުނެއެވެ.
"އަހަރެމެންނަކީ މެންދުރު ނަމާދުގެކުރިއަށް ސުންނަތުގެ 4 ރަކްޢަތް ކުރަން އާދަވެފައި ތިބި ބައެކެވެ. މިހާރު އެކަމަށްލިބޭ ވަގުތުކޮޅު ކުރުކޮށްލުމުން ވަރަށް އުނދަގޫވެއެވެ. އަދި ފަތިސް ނަމާދު ފަށަން މިސްކިތުގަޑިން ޕީޕީ ލައްވާއިރު ނަމާދު ކުރުކޮށްލައި ޤުނޫތުކިޔައި ނިމޭހިސާބަށް ނަމާދުކުރުކޮށްލާ އިމާމުން ޤުނޫތު ކިޔަން ނަމާދުކުރަން ނެގި ވަގުތަށްވުރެ ގިނަ ވަގުތު ނަގާތީ ބޮލަށް ފަސޭހައެއް ނޫނެވެ. ނަމާދު އެހައި ކުރުކޮށްލައި ކުރުކުއްލިއަށް ނަމާދުކުރާތީ ހިތަށް ވަރަށް އުނދަގޫވެއެވެ."
މީގެ އިތުރުން ބޮޑު އަގުގައި ތަކެތި ގަނެފައި ޤައުމު އޮތް ނުރައްކާތެރިހާލަތުގެ ވާހަކަ ދައްކައިގެން ފޫބައްދަން މަސައްކަތްކުރާ އުޞޫލުން ނަމާދާއިމެދު ވެސް ޢަމަލުކުރެވޭތީ ވަރަށް ދެރަވާކަމަށާއި މިޙާލަތުން އަރައިގަނެވޭނީވެސް ނަމާދުފުރިހަމަކުރުމުން ކަމަށް ބުނާ މީހުންވެސް މަދެއް ނޫނެވެ.
ބައެއް އިމާމުން ކަންކަންކުރާގޮތާއިމެދު މިފަދަ ޚިޔާލުތައް ހުރިނަމަވެސް ބައެއް އިމާމުން ވަރަށް ފުރިހަމައަށް ނަމާދުގެ ކަންކަން ކުރިއަށް ގެންދާކަންވެސް ފާހަގަކުރެވެއެވެ. އެޗްޕީއޭ އާއި އިސްލާމިކް މިނިސްޓްރީގެ އިލްތިމާސް ބަލައިގަނެ މާސްކް އެޅުން ފަދަ ކަންކަން ކޮށް ސަބަބުތަކުގައި ހިފަހައްޓައިގެން ތިބުމަށް ގިނަ ބައަކު އެއްބާރުލުން ދެމުންގެންދާކަންވެސް މިސްކިތްތަކުން ފާހަގަކުރެވެއެވެ.
