ދުނިޔޭގައި އުޅުނުއިރު ތިމާމެން މިތިބީ ﷲ ތަޢާލާއަށް އީމާންވެގެން ކަމަށް ބުނި ނަމަވެސް ޤިޔާމަތް ދުވަހު ޞިރާޠުމަގު ހުރަސްކުރުމަކީ ތަޤްވާވެރިންނަށް ނޫނީ ކުރެވޭނެ ކަމެއް ނޫނެވެ. ތަޤްވާވެރިން ނޫން މީހުންނަށް ޖެހޭނީ ރޮއި އާދޭސްކުރަން މަޑުކޮށްގެން ތިބޭށެވެ!
އެމީހުންނާއިއެކުގައި އެކުގައި ދުނިޔޭގައި އުޅުނު ތަޤްވާވެރިންނަށް ޤިޔާމަތް ދުވަހު ﷲ ތަޢާލާ ދެއްވަވާ ނޫރުގެ ބޭނުންކޮށްގެން ތަޤްވާވެރިން ޞިރާޓުމަގު ހުރަސްކުރަން ތަޤްވާވެރިން ދަތުރުފެށުމުން އެމީހުންގެ ފަހަތުން ދިއުމަށް މަސައްކަތްކުރާނެއެވެ. އަދި އެމީހުންނަކީ ތިމަންމެންގެ އެކުވެރިންކަމަށްބުނެ އަޑުއުފުލާނެތެވެ. ނަމަވެސް އެވަގުތު މަލާއިކަތުން ވަޑައިގެން އެމީހުން ހުއްޓުވާނެތެވެ. ކުރިއަށްދާނެ ފުރުބަތެއް އެމީހުންނަކަށް ނުދެއްވަވާނެތެވެ.
ދެން ބަލައިލަންވީނ ތަޤްވާވެރިންނަކީ ކޮބައިތޯއެވެ؟ އެމީހުންނަކީ ﷲ ތަޢާލާ ނަހީކުރައްވަވާފައިވާ ކަމެއްކުރަން އެމީހާގެ ނަފްސް އެދޭހިނދު ﷲ ތަޢާލާއަށް ބިރުވެތިވެ އެކަމެއް ނުކުރާ މީހުންނެވެ! އެކަން ޙަރާމްކުރެއްވެވީ ކީއްވެގެންކަން ހޯދަން މަސައްކަތްކުރަން އެމީހުން ބޭނުމެއް ނުވާނެއެވެ. ނަހީކުރައްވަވާފައިވާކަން އެނގުމުން އެމީހުންނަށް ފުދޭނެއެވެ.
ހަމައެއާއިއެކު އެކަމެއ ކުރަން ﷲ ތަޢާލާ އަމުރުފުޅު ކުރައްވަވާފައި އޮތްކަމެއް ނުކުރަން އެމީހާގެ ނަފްސް ކިތަންމެ ވަރަކަށް އެދުނު ނަމަވެސް ﷲ ތަޢާލާގެ އަމުރުފުޅަށް ކިޔަމަންތެރިވެ އެކަމެއް ކުރާނެތެވެ. އެކަން ކުރުމަށް އަމުރުފުޅުކުރެއްވެވީ ކީއްވެގެންކަން ހޯދަން މަސައްކަތްކުރަން އެމީހުން ބޭނުމެއް ނުވާނެއެވެ. ކުރަން އަމުރުފުޅު ކުރައްވަވާފައިވާކަން އެނގުމުން އެމީހުންނަށް ފުދޭނެއެވެ.
- ބިލާލް އައްސަދުގެ ދަރުސަކުން
