އަހަރެމެންގެ ކައިވެނިކުރެވުނުއިރުވެސް ފިރިމީހާ ކުދިކުދިވިޔަފާރިކުރެއެވެ. ނަމަވެސް މަސައްކަތްކުރަމުން އައީ ވަރަށް ދަތިޙާލުގައެވެ. ކުންފުނި ހިންގާ އިމާރާތުގެ ކުލިވެސް އޮންނަނީ ޤަވާއިދުން ނުދެއްކިފައެވެ. ބިލްތައް ވެސް ހުންނަނީ ނުދެއްކި ފުނިޖެހިފައެވެ.
އަހަރެން ފިރިމީހާއަށް އެހީތެރިވީމެވެ. ފިރިމީހާކުރާ މަސައްކަތުގައިބައިވެރިވީމެވެ. ލިބޭ އޯޑަރުތައް އިތުރުކުރަން މަސައްކަތްކުރީމެވެ. ފިރިމީހާއަށް ކަންކަން ކުރާނެގޮތް ބުނެދީ ވިސްނައިދިނީމެވެ. ނަތީޖާއަކަށްވީ ވިޔަފާރިކުރިއަރަންފެށުމެވެ. 10 ވަރަކަށް އަހަރުގެ ތެރޭގައި ފިރިމީހާގެ ކުންފުނި ވަނީ މިލިއަނުން ފައިދާ ލިބޭ ކުންފުނިތަކުގެ ލިސްޓުގައެވެ.
އެހިސާބުން ފިރިމީހާ ބޭނުންވީ އަހަރެން އޮފީހަށް ނުގޮސް ގޭގައި ދަރިންގާތު މަޑުކުރުމަށެވެ. އަހަރެން އެކަންވެސް ޤަބޫލުކުރީމެވެ. އެގޮތަށް އުޅެންފެށިތާ ދުވަސްކޮޅެއްފަހުން ފިރިމީހާއަށް އަނގައިވެސް ނުލައި އޮފީހަށް ދިއައިމެވެ. ކޮންމެހެން ވަކިކަމެއް ވެގެނެއް ނޫނެވެ. ހަމަދެވުނީއެވެ.
ގޮސް ފިރިމީހާގެ ކެބިނަށް ވަންއިރު ފިރިމީހާ ހުރީ ސެކެޓްރީގެ ގައިގައި ބައްދައިގަނެގެންނެވެ. ދެމީހުން ލޯބިކުރަނީއެވެ. އަހަރެންނަށް ރޯންފެށުނެވެ. އަދި ކައިވެންޏަށް މިހައި ގިނަ ދުވަސްވެ ކަލޭގެ ވިޔަފާރިއަށް މިބޮޑު ކުރިއެރުން ލިބުމުން އަނބިމީހާގެ އިތުރުން މިކުރިއެރުން ހޯދައިދޭން އެންމެ ބޮޑަށް މަސައްކަތްކުރި މީހާއަށް ދޭންފެނުނު އިނާމަކީ ތިއައީތޯ ސުވާލުކުރީމެވެ.
ޖަވާބުގައި ފިރިމީހާ ބުނީ "ކާމިޔާބު ކޮންމެ ވިޔަފާރިވެރިއަކު ވެސް އަނބިމީހާއަށް މަކަރުހަދާނެކަން އެނގެންވާނެ" ކަމަށެވެ.
އަހަރެން ބުނީމެވެ. "ތިއަ ޖަވާބުން ފުދިއްޖެއެވެ. ހަމައެކަނި އެންމެ ވާހަކައެއް ބުނެލާނަމެވެ. ޓެކްސް ދައްކާނެ ފައިސާ ނެތިގެން ބަންދުކުރާ ހާލަތަސް ދިއުމުން ވެޑިންގ ރިންގާއި މައިންބަފައިން އަތުން ލިބުނު ގަހަނާ ވިއްކައި ޓެކްސް ދައްކައިދިންކަމުގެ އަގު ވަރަށް ރަނގަޅަށް ލިބިއްޖެއެވެ. ވެޑިންގ ރިންގުގެ ބަދަލުގަ އެއަށްވުރެ އަގުހުރި ރިންގެއް ދޭނެކަމަސް އެދުވަހު ބުނި ނަމަވެސް އަދިވެސް ނުދެމެއް ނޫންހެއްޔެވެ؟ ވީމާ އެދަރަނިވެސް މާފުކޮށްފީމެވެ. އެއްވެސް އެއްޗެއް އިތުރަށް ބޭނުމެއް ނޫނެވެ. އައިކާރުގެ ތަޅުދަނޑިވެސް މިއޮތީއެވެ. ކޭޝްކާޑުވެސް މިއޮތީއެވެ. ޢުމުރަށް ސަލާމެވެ! އަހަރެން މިދަނީއެވެ!"
ޓެކްސީއަކަށް އަރައިގެން އަހަރެން ދިއައީ މައިންބަފައިންގެ ގެއަށެވެ. ހިތްވަރު އެލުވައެއް ނުލަމެވެ. ތެދަށްބުނާނަމަ އަތުގައި އޮތީ ހަމައެކަނި ދަބަހުގައި ހުރި ވަކި ރިޔާލަކޮޅެވެ.
އަހަރެންގެ ބޮޑުބޭބެއަކީ ވެސް ތަނަވަސް މީހެކެވެ. އޭނާގެ ކިބައިން ވަޒީފާއަކަށް އެދުމުން އޭނާ އަހަރެންނަށް އެހީތެރިވިއެވެ. އަމިއްލައަށް މަސައްކަތެއް ފެށުން މާރަނގަޅުވާނެކަމަށްބުނެ ފަސައިގަނެވޭވަރުގެ ކުޑަ ކެޕިޓަލެއް އަނބުރާދައްކާގޮތަށް ދިނެވެ.
މަސައްކަތް ފެށިތާ 3 ވަނަ އަހަރު އެއްދުވަހު މެންދުރު ގެއަށްދާން ނުކުތްއިރު މަގުމަތގައި ފިރިހެނަކު ބަލަހައްޓައިގެން ހުއްޓެވެ. ފިރިމީހާ އާއި ވަރަށް ވައްތަރެވެ. ނަމަވެސް މާހިއްކެވެ. ލައިގެންވެސް ހުރީ ވަރަށް އާދައިގެ ޓީޝާޓެކެވެ. އެހެންވެ އެއީ ފިރިމީހާކަމަސް ނުވާނެކަމަށް ބަލައި ސަމާލުކަންވެސް ނުދީ ހިނގައިގަތުމުން އެމީހާ ފަހަތުން އައިސް ވާހަކަ ދައްކަން ފެށިއެވެ.
"ޚަލީލާއެވެ. އަހަރެންނަށް މާފުކުރާށެވެ! އަަހރެންނަށް ކަންކަން ކުރެވުނީ ވަރަށް ގޯސްކޮށެވެ. ކުށްވެރިއަކި އަހަރެންނެވެ. އެކަމުގެ ޝަޒާއަކީ އަހަރެން ބަނގުރޫތުވެސްވުމެވެ. މިއަދު އަހަރެންގެ އަތަކު އެއްވެސް މުދަލެއް ފައިސާއެއް ނެތެވެ. ސެކްޓްރ އަހަރެންގެ ތަނަވަސްކަން ބޭނުންކޮށްލާފައި ފިލައިފިއެވެ."
"ތިއައީ އަަހަރެންނާ އެއްވެސް ވަރަކަށް ބެހޭ މައްސަލައެއް ނޫނެވެ. ތިއަ މައްސަލަ ހައްލުކުރަން ސެކެޓްރީ ހޯދައިގެން މަޝްވަރާކުރާށެވެ! ތެދުވެރި ކޮންމެ އަންހެނަކާއިއެކުގައިވެސް ﷲ ވޮޑިގެންވެއެވެ! ﷲ އަށް ތެދުވެރިވީމާ އަނިޔާވެރިންނަށް އަނިޔާއެއް ނުދެވޭނެއެވެ."
އަހަރެންގެ އިންތިޒާރުގައި އަހަރެންގެ ކާރު އޮތެވެ. އެއީ އަހަރެން ވަރަށް ފަހުން ގަތް އެންމެފަހުގެ މާސީޑެޒް ބެންޒް އެންމެ އަގު ބޮޑު ކާރެކެވެ. ކާރަށް އަރަން ފެށުމުން އެއީ ހަމަ އަމިއްލަ ކާރެއްތޯ ސުވާލުކުރުމުން "ދާދިފަހުން ގަތް ކާރެއް" ކަމަށްބުނެފައި ހެޔޮދުޢާކުރަމުން އަހަރެން ދިއައީ ގެއަށެވެ.
ފިރިމީހާ ފަޤީރުވިކަން އެނގުމުން ކާރު ފޮނުވައިގެން 2 ދަރިން އަހަރެންގެ ގެއަސް ގެނެސްފީމެވެ. އެކަމަށް ފިރިމީހާ ދެކޮޅެއްވެސް ނުހަދައެވެ. މިހާރު ދިރިއުޅެމުން މިދަނީ 2 ދަރިންނާއިއެކު އަމިއްލަ ގޭގައެވެ. މިގޭގައި ފިރިމީހާއަށް އެއްވެސް ޖާގައެއް ނެތެވެ. ނުވެސް ދޭނަމެވެ. އިން ޝާ ﷲ
ލޮބުވެތި އުޚުތުންނޭވެ! ރަނގަޅު ފިރިން ވެސް ތިބޭނެއެވެ! ނަމަވެސް އަނިޔާވެރި ފިރިއަކު ލިބިއްޖެނަމަ އަވަހަސް ސަލާމަތްވާށެވެ! " ތެދުވެރި ކޮންމެ އަންހެނަކާއިއެކުގައިވެސް ﷲ ވޮޑިގެންވެއެވެ! ﷲ އަށް ތެދުވެރިވީމާ އަނިޔާވެރިންނަށް އަނިޔާއެއް ނުދެވޭނެއެވެ. ރިޒްޤް ދެނީ ފިރިމީހާއެއް ނޫނެވެ! ރިޒްޤްވެސް ތަނަވަސްކަން ދެއްވަވަނީ ﷲ އެވެ." މި ބަސް އަބަދުވެސް ހަނދާނުގައި ބަހައްޓާށެވެ! ހިތާމަކުރާކަށް ނުޖެހޭނެއެވެ! އިން ޝާ ﷲ
