އެއްވެސް މިންވަރެއްގެ ތަކްލީފެއް އުފުލަންޖެހުމަކީ އެއްވެސް މީހަކު ރުހޭނެ ކަމެއް ނޫނެވެ. ހަމައެފަދައިން އެއްވެސް މިނަވަރެއްގެ ހިތްދަތިކަމެއް އުފުލަން ޖެހުމަކީވެސް އެއްވެސް މީހަކު ކުރަންބޭބުންވާ ކަމެއް ނޫނެވެ. ޤަބޫލުކުރަންޖެހޭ ކަމަކީ ވޭންތައް އުފުލަން ޖެހޭނެ ކަމާއި ހިތްދަތިކަން އިޙްޞާޞްކުރަން ޖެހޭނެ ކަމެވެ. ދިރިއުޅުން މިކިޔަނީ އެކަންކަމާއިއެކު ދުނިޔޭގައި އުޅުމަށް ކަމެވެ.
ބައެއް މީހުންނަށް އެންމެ ބޮޑު ހިތްދަތިކަމެއް ލިބެނީ ބައްޔަކަށް ބޭސްކުރުމުން ފަސޭހަވަމުން އައިސްފައި ކުއްލިއަކަށް އަނެއކާވެސް ބަލި ބޮޑުވުން ފަދަ ކަންކަން މެދުވެރިވުމެވެ. މާޔޫސްނުވާށެވެ! ޙާލަތު އެބަދަލުކުރެއްވެވީ އެންމެ ކުރިން އެންމެ ދުޅަހެޔޮ ޞިއްހަތު މިންވަރުކުރެއްވެވި ﷲ ތަޢާލާއެވެ. އަދި ލުއި ތަކެއް މިންވަރުކުރައްވަވާފައި ބުރަކުރެއްވެވީވެސް ހަމަ ﷲ ތަޢާލާއެވެ.
ކަންބޮޑުނުވާށެވެ! މިފަދަ ޢިބާރާތްތަކުން ދުޢާކުރަމުން ގެންދާށެވެ!
"ޔާ ﷲ! ބަލީގެ ވޭންތަކަށާއި އަދި ހިތުގެ ވޭންތަކަށް ވެސް ޝިފާލިބުންވަނީ ހަމައެކަނި އިނބަ ﷲގެ ޙަޟްރަތުންނެވެ. މިއަޅާއަށް ޝިފާ ދެއްވަވާނެދޭވެ! އަދި ވޭންތަކާއި ދަތިތަކަށް ކެތްތެރިވުމުގު ތައުފީޤް މިއަޅާއަށް ދެއްވަވާނދޭވެ! އިނބަ ﷲ މެނުވީ މިއަޅާއަށް އެއްވެސް އެހީތެރިކަމެއް ފޯރުކޮށްދެއްވޭނެ އެއްވެސް ފަރާތެއް ނުވެއެވެ. މިއަޅާއަށް ރަޙުމްކުރައްވަވާނދޭވެ! އާމީން."
- އިސްލާމީ ތިލަފަތުގެ ދަރުސަކުން
