ބައެއް މީހުން ވަރަށް ފަސޭހައިން ބުނެއެވެ. "ޞަހާބީންނަށް އެންމެ ދަރަޖަ ލިބިވަޑައިގަންނަވަނީ ރަސޫލް (ޞޢވ) ގެ ޒަމާނުގައި އިތުރުއެކަލޭގެފާނުގެ އަރިއަހުގައި އުޅުއްވެވުނީތީ"އެވެ. މިއީ ވަރަށް ބޮޑުކުށްހީއެކެވެ.
ޙަދީޘްފުޅުގައިވަނީ ރަސޫލް (ޞޢވ)ގެ ޒަމާނުގައި އުޅުއްވެވި 50 ޞަޙާބީންނަށްވުރެ ފަހުން އުޅޭ އެންމެ މުސްލިމެއްގެ ހެޔޮކަން ބޮޑުވާނެ ކަމަށެވެ.
ރަސޫލް (ޞޢވ) ބަޔާން ކުރެއްވެވި ދުވަސް މިއަދު މިވަނީ އަހަރެމެންނާއި ބައްދަލުކޮށްފައެވެ.
ރަސޫލް (ޞޢވ) ގެ ޒަމާނުގައި ފާފަތައް ކުރުން އެހައި ފަސޭހައެއް ނޫނެވެ. މީސްކޮޅު މަދުކަމުންނާއި ވަސީލަތް މަދުކަމުންނެވެ. ފާފައެއް ކޮށްފިނަމަ އެކަން ބޭޒާރުވުން ކައިރިކަމުންނެވެ.
ނަމަވެސް ކަންކަން މިއަދު މިވަނީ މުޅިން ބަދަލުވެފައެވެ. ކިތަންމެ ސިއްރުން ފޮރުވިގެން ތިބެމެ ފާފަތައް ކުރެވޭނެ ފަސޭހަމަގުތައް މިވަނީ ފަހިވެފައެވެ. މިސާލަކަށް ޒިނޭކުރަން އަންހެނަކު ހޯދަން ނުވަތަ ފިރިހެނަކު ހޯދަންވެސް އެއްވެސް ތަނަކަށް ދާކަށް ނުޖެހެއެވެ. ފޯނުކޮށްލައިގެން ހުރިތަނަކަށް ގެނުވައިގެން ބޭނުންކަމެއް ކުރަންވީއެވެ. ބޭނުން ކޮންމެ ކަމެއް ކުރެވޭ ގޮތަށް އެކަނި ދިރިއުޅެވޭނެ ގޮތް މިވަނީ ހަމަޖެހިފައެވެ. އޮފީސްތަކުގައިވެސް ކުރަންވީއެވެ. މިފަދަ ބޮޑެތި ލުއިފަސޭހަތަކެއް އެ ޒަމާނަކު ނެތެވެ. އެޒަމާނުގައި ޒިނޭކުރާ އަންހެނުން ތިބެނީ ވަކިފޭލިގެތަކެއްގައެވެ. ވަދެއްޖެ ނަމަ ހމަނުވެއެއް ނުދާނެއެވެ.
އީމާންތެރިކަން އެހައި ވަރުގަދަ 50 ޞަޙާބީންނާއި މިހާރު ފާފައެއް ނުކުރާ އެންމެ މީހަކާއި އެއްވަރުވެގެން އެދަނީ އެ ސަބަބަށްޓަކައެވެ. މިހައި ފަސޭހައިން ފާފަތައް ކުރެވެން ހުރިއިރު ވެސް ﷲ ތަޢާލާއަށް ބިރުވެތިވެ ފާފައަކަށް އަރައި ނުގަންނާތީއެވެ!
ވީމާ 50 ޞަޙާބީންގެ ދަރަޖަ ލިބެން އޮތް މިފުރުޞަތު އެއްގޮތަކަށްވެސް ދޫކޮށްނުލާށެވެ! ﷲ ތަޢާލާ އެކަމަށް ދެއްވަވާނެ މަތިވެރި ސަވާބަށް އެދޭށެވެ! ސުވަރުގޭގެ އެންމެ މަތިވެރި ދަރަޖައިގައި ރަސޫލް (ޞޢވ) އާއި އެންމެ އަރިއަހުގައިވުމަށް އުންމީދުކުރާށެވެ!
- އިސްލާމީ ތިލަފަތުގެ ދަރުސަކުން
