ހަމަ ކޮންމެ މަންމައަކާއި ބައްޕައަަކުހެން މިއަދު ބުނެއުޅެނީ އެމީހުންގެ ދަރިން އިސްލާމް ދީނާއި ދުރުހެލިވާތީ ކަންބޮޑުވާ ކަމަށެވެ. ކިތަންމެ ލޯބިން ގެންގުޅުނު ނަމަވެސް ދަރިން މައިންބަފައިން ދެކކެ ލޯބިނުވާކަމަށެވެ. ނަމަވެސް އެކަން އެގޮތަށްވުމަށް މެދުވެރިވާ ސަބަބާއިމެދު ވިސްނާލަން ބޭނުންވަނީވެސް ވަރަށް މަދު މީހެކެވެ.
ލޮބުވެތިމައިންބަފައިންނޭވެ! ޓީޗަރުބުނާކަންކަން ކުރުވަން، ނުވަތަ ސްކޫލުން އަންގާ ކަންކަން ކުރުވަން ކޮންމެ ގޮތަކުންވެސް ދަރިން ފަތިހު ހޭލައްވަމުއެވެ. ނުނިދައި ތިބެގެންވެސް އެކަން ކުރުވަމުއެވެ. ނަމަވެސް އަަހަރެމެން އުފައްދަވައި އަހަރެމެންނަށް ރިޒްޤް ދެއްވަވައި އަދި އެންމެހައި ނިޢްމަތްތައް މިންވަރުކުރައްވަވާ ﷲ ތަޢާލާގެ އެންގެވުމަކީ އެއްވެސް އެއްޗަކަށް ނުހަދަމުއެވެ. މައިންބަފައިންވެސް ފަތިސްނަމާދެއް ނުކުރަމުއެވެ. ދަރިންވެސް ފަތިސް ނަމާދަށް ހޭނުލައްވަމުއެވެ.
ކުދިން އެހައި ފަތިހާ ހޭލެއްވުމުން ކުދިންނަށް ހަމަ ނިދިނުލިބި ކުދިންގެ ޞިއްޙަތަށް ގެއްލުން ލިބޭތީ، ކްލާހުގައިދޭ ފިލާވަޅުތައް ފަހުމް ނުވެ ނިދާފައި އިނދެދާނެތީ ކަމަށްވެސް އެބަ ބުނަމުއެވެ. ހަޤީޤަތަކީ މިއަށްވުރެ ކޮށި، ތާކުންތާކު ނުޖެހޭ ވިސްނުމެއް ނުވެސް ގެންގުޅެވޭނެކަމެވެ. އަދދި މިއީ މައިންބަފައިން ހަދާ ބޮޑު ދޮގެއްކަން ތިއަ ސާބިތުކޮށްދެނީ ހަަމަ އެފަދައިން ބުނާ މައިންބަފައިންނެވެ.
އެކަމުގެ ހެކި:
ކުޅިވަރު މުބާރާތަކަށް ތައްޔާރުކުރުވަން އަަހަރު ދުވަހު ފަތިހު ހޭލެއްވިނަމަވެސް ކުދިންނަށް އެއްވެސް ގެއްލުމެއް ލިބޭކަމަށްނުވެއެވެ. ފަތިސް ނަމާދަށް ހޭލައްވައިފިނަމަ ގެއްލުން ލިބެނީީއެވެ. ވީމާ ތިއަ ބުނެވެނީ ކުދިންގެ ޞިއްޙަތަށް ދުޅަހެޔޮކަން ހޯދައިދެނީ ކުޅިވަރުކަމަށެވެ. ﷲ ތަޢާލާ ދެއްވެވުމުން ނޫންކަމަށް ނޫން ހެއްޔެވެ؟
މިހެން ބުނަމުންވެސް ތިއަ ބުނަނީ ތިމާއަކީ ހަމަ ﷲ ތަޢާލާއަށް ބިރުވެތިވާ އަދި ކިޔަމަންތެރިކަން އަދާކުރާ މުސްލިމެއް ކަމަށްހެއްޔެވެ؟ ކީރިތި ޤުރްއާނާއި ސުންނަތް ޤަބޫލުކުރާ މީހެއް ކަމަށެވެ. މިއުޅެނީ ދަރިފުޅު ވެސް ގޮވައިގެން ސުވަރުގެދެވޭތޯ ކަމަށް ހެއްޔެވެ؟
ނިކަން ބުނެބަލާށެވެ! ތިއަ މަސައްކަތްކުރަނީ ދަރިން އިސްލާމް ދީނާއި ދުރުކޮށް އެދަރިން ނަރަކައަށް ވައްދުވަން ނޫންހެއްޔެވެ؟ ވީމާ އެދަރިން އިސްލާމް ދީނާއި ދުރުވުމުން ކަންބޮޑުވާކަމަށް ބުނުމުގެ އޮތީ ކޮން ޙައްޤެއް ހެއްޔެވެ؟
ލޮބުވެތި މައިންބަފައިންނޭވެ! ފުރަތަމަކަމަކަށް ތިއަބައިމީހުން ފަތިސްނަމާދަށް ހޭލައި އެނަމާދުގެ ވަގުތުގައި ނަމާދު ކުރާށެވެ! ދަރިން ހޭލައްވައިި ދަރިންލައްވައި ވެސް ފަތިސްނަމާދުކުރުވާށެވެ! އެންމެ ރަނގަޅި ދަރިން ގޮވައިގެން ނަމާދުކުރުމެވެ. މިސްކިތަށްދާ ބައްޕައިން ދަރިންގެ އަތުގައި ހިފައިގެން ގޮވައިގެންދާށެވެ!
ދަރިންގެ އަތުގައި ހިފައިގެން މިސްކިތަށް ހިނގުމަކީ ދަރިންގެ ހިތުގައި މައިންބަފައިންނަށް ލޯބި އިތުރުކުރައްވަވާ ސަބަބަކަށް ވެގެންދާކަން ތަޖުރިބާއިން ދަނީ އެނގި ސާބިތުވަމުންނެވެ. ހިތްވަރު ހުރިނަމަ ނިކަން ތަޖުރިބާކޮށްލައިބަލާށެވެ! ތަފާތު ފެނިގެންދާނެކަން ޔަޤީނެވެ! އިން ޝާ ﷲ
ފަސްޖެހެންވީ ކީއްވެގެން ހެއްޔެވެ؟ ދަރިން ނަމާދަށް އަހުލުވެރިކުރުވުމަކީ މައިންބަފައިންގެ މައްޗަށް އޮތް މަތިވެރި ވާޖިބެކެވެ. ޤިޔާމަތްދުވަހު ޖަވާބުދާރީވާންވެސް ނުޖެހި ނުދާނެ ކަމެކެވެ.
- އިސްލާމީ ތިލަފަތުގެ ދަރުސަކުން
