ނޭވާ އެތެރެކޮށް ބޭރުކުރާ ފަދައިން މާޒީ ހަށިގަނޑުން ބޭރުކޮށްލައި މުސްތަޤްބަލު އެތެރެކުރާށެވެ! މާޒީން ކުރާނެ އެއްވެސް ފައިދާއެއް ނެތެވެ. ހިތިނަމަ އެވަނީ ހިތިވެ ނިމިފައެވެ. އަލުން ފފޮންޏެއް ނުކުރެވޭނެއެވެ. މަސައްކަތުން ވެސް ފޮނިކުރެވޭނީ މުސްތަޤްބަލެވެ.
ވީމާ އެހެންވީ ކީއްވެ؟ ފަދަ ސުވާލުތައް ކުރުމުގެ އެއްވެސް ބޭނުމެއް ނެތެވެ. މިވެނިހެންވީނަމަ— ހިތަށް ގެނައުމުގެވެސް އެއްވެސް ބޭނުމެއް ނެތެވެ. އެކަންކަމަށް ކިތަންމެ ވަރަކަށް ވިސްނި ނަމަވެސް އެއްވެސް ފައިދާއެއް ނުކުރާނެއެވެ!
މާޒީގެ ހަމައެކަނި ބޭނުމަކަށްވާންވާނީ ލިބުނު ފިލާވަޅުން ޢިބްރަތް ޙާޞިލުކޮށް މުސްތަޤްބަލް އުޖާލާކުރުމެވެ. މާޒީއަކީ ﷲ ތަޢާލާ ތިބާއަށް މިންވަރުކުރެއްވެވި އަގުހުރި ފިލާވަޅެއް ކަމުގައި ނޫނީ ނުދެކޭށެވެ. ބުއްދިވެރިންނަކީ އެ ފިލާވަޅުން ޢިބްރަތް ޙާޞިލުކޮށް މުސްތަޤްބަލް އުޖާލާކުރާ މީހުންނެވެ.
ޚުލާޞާ:
މާޒީގައި އަޅުކަން ނުކުރެވުނީތީ އަދި ފާފަކުރެވުނީތީ އެކަމަށް ވިސްނަން މުސްތަޤްބަލް ނަގައިނުލާށެވެ! ކިތަންމެ ވަރަކަށް ވިސްނިނަމަވެސް މާޒީގައި އަމަލުކުރެވުނު ގޮތް ބަދަލެއް ނުވާނެއެވެ! ކުރެވުނު ފާފަތައް ނުކުރެވޭ ކަމަކަށް ނުވާނެއެވެ! ނުކުރެވުނު އަޅުކަން ކުރެވުނުކަމަކަށްވެސް ނުހެދޭނެއެވެ.
ވީމާ ކުރަންވީ ކަމަކީ ޢުމުރުން ބާކީ އޮތް ދުވަސްކޮޅު ވީހައި ގިނަ އަޅުކަންކުރަން މަސައްކަތްކުރުމެވެ. އެއްވެސް ފާފައެއް ނުކުރަން ހިތްވަރުކުރުމެވެ. އާޚިރަތަށް އެއްވެސް ފައިދާއެއްކުރާނީ އެއިރުންނެވެ!
- އިސްލާމީ ތިލަފަތުގެ ދަރުސަކުން
