ބަނޑުހައިވެފައި ހުންނަ މީހަކު ކާނެ އެއްޗަކަށް ދަހިވާނެ މިންވަރާއި ފެންބޮވައިގަތުމުން ފެނަށް ބޭނުންާނެ މިންވަރު ނިކަން ހިތަށް ގެނެސްބަލާށެވެ! ބަނޑުހައިވެފައި ހުންނަ މީހާއަށް ކާން ލިބުމުން ފުދެއެވެ. ފެންބޮވައިގެންފައި ހުންނަ މީހާއަށް ބޯނެ ފެން ލިބުމުން ފުދެއެވެ.
ނަމަވެސް ނަމާދު ކިތަންމެ ގިނައިން ކުރެއްވެވުނު ނަމަވެސް ރަސޫލް (ޞޢވ) އަށް ފުދިވަޑައެއް ނުގަންނަވައެވެ. އަބަދުވެސް ހުންނަވަނީ ނަމާދެއް ކުރެއްވެވުމުގެ ދަހިވެތިކަމުގައެވެ.
މިއީ ރަސޫލް (ޞޢވ) ވީހައި ގިނަ ނަމާދު ކުރެއްވެވުމަށް ދަހވެވަޑައިގަންނަވާ މިންވަރު އަބޫ ޛައްރަށް ދައްކަވައިދެއްވެވި މިސާލެކެވެ. ނަމާދުކުރެއްވެވުމަށް ދަހިވެތިވެޑައިގަތުމަށް، ނުވަތަ ނަމާދުކުރުން ގިނަކުރެއްވެވުމަށް ހިތްވަރު ދެއްވެވުމަށް މިއަށްވުރެ ވަކިން ފުރިހަމަ މިސާލެއް ވޭހެއްޔެވެ؟
ޢިބްރަތް ޙާޞިލުކުރާށެވެ! ކޮންމެ މުސްލިމަކަށް މިފަދަ މޭރުމުން ޙަދީޘްފުޅުކުރައްވަވަން ރަސޫލް (ޞޢވ) މިއަދަކު ދުނިޔެއަކު ނެތެވެ. ނަމަވެސް މިފަދަ ޙަދީޘްފުޅުތައް ފެންނަން ހުރުމުން ކޮންމެ މުސްލިމަކުވެސް ޤަބޫލުކުރަންވީ މިއީ ހަމަ ތިމާއަށް ކުރައްވަވާފައިވާ ޙަދީޘްފުޅެއް ކަމަށެވެ. ޢަމަލުކުރަން އަވަސްވެގަންނާށެވެ!
- އިސްލާމީ ތިލަފަތުގެ ދަރުސަކުން
