އެކަކު އަނެކަކާއި ބައްދަލުވާހިނދު ފުރަތަމަ ކަމެއްގެ ގޮތުންވެސް ނުވަތަ ބައްދަލުވުން ނިންމައިލުމުގެ ކުރިން ތަޤްވާވެރިކަން އިތުރުވާނެ ހެޔޮ ބަހެއް ބުނެލުމަކީ ކުރަން ޙަދީޘްފުޅުން އެނގެން އޮތް ކަމެކެވެ. ޞަޙާބީން އެކަން ކުރެއްވެވިއެވެ.
ތަޤްވާވެރިކަން އެއީ އެންމެ މުހިންމުކަންތައް ކަމުގައިވެގެންދަނީ ތަޤްވާވެރިކަމަކީ އެމީހަކާއި ﷲ ތަޢާލާގެ ޢަޛާބާއިދެމެދު ލެވިގެންދާ ފާރަކަށް ނުވަތަ ހުރަހަކަށްވާތީއެވެ. ތަޤްވާވެރިކަމުގެ މާނައަކީ ﷲ ތަޢާލާ ކުރުމަށް އަހަރެމެންނަށް އަމުރުފުޅު ކުރެއްވެވި އެންމެހައި ކަންކަން ކުރުމާއި ނަހީކުރެއްވެވި އެންމެހައި ކަންކަމުން ދުރުހެލިވެ ހުރުމެވެ.
މިދެކަންތައް ފުރިހަމަނުވާނަމަ އެމީހެއްގެ ކިބައިގައި ތަޤްވާވެރިކްމެއް ނުވެއެވެ. އަޅުކަންކުރަމުން ފާފަކުރާމީހުންނަކީ ތަޤްވާވެރިންކަމުގައި ނުވަނީ އެސަބަބަށްޓަކައެވެ. ވީމާ އަހަރެމެންގެ މުޅި ޙަޔާތް ނުވަތަ ޙަޔާތުގެ ހުރިހާ ކަންކަން ހަދަންޖެހޭނީ ﷲ ތަޢާލާގެ ރުހިވޮޑިގަތުން ލިބިގަންނަން މަސައްކަތްކުރާ ދުވަސްތަކެއް ކަމުގައެވެ.
މީސްތަކުންނޭވެ! އާދަމްގެފާނުގެ ދެކަނބަލުންނަށް އެބޮޑު ފާފަކުރެއްވެވުނު ހިނދު ވަގުތުން ޢަޛާބު ދެއްވެވީއެއް ނޫނެވެ. އަދި ކީއްހެއްޔެވެ؟ ފާފަފުއްސަވައި ދުނިޔޭގައި އެކަލާނގެ ރަޙްމަތުގައި ލެއްވެވީއެވެ. މިކަމުން އެނގިގެންދަނީ އެންމެހައި މީސސްތަކުންނަށްވެސް އޮތީ ފާފައެއް ކުރެވުމުން ﷲ ތައާލާއަށް ބިރުވެތިވެ، ކުރެވުނު ކުށް ޤަބޫލުކޮށް ތަޢުބާވުން ކަމެވެ.
މީސްތަކުންނޭވެ! ދުވާލުގ ކޮނަމެ ވަގުތަކީވެސް ތައުބާވުމަސް އޮތް ވަގުތެވެ. އެންމެ މާތް ވަގުތަކީ ރޭގަނޑުގެ ފަހު ދަންފަޅިކަމަށްވުން އެގަޑީގައި ނުވަތަ އެންމެ މާތް ދުވަހަކީ ހުކުރު ދުވަސްކަމަށްވުމުން ހުކުރު ދުވަހު ތައުބާވާން މަޑުނުކުރާށެވެ! ވަގުތުން ތައުބާވަމުން ގެންދާށެވެ!
ފުރަތަމަ ކަމަކަށް އަޢުރަނިވާކުރާށެވެ! ނަމާދު އެނަމާދުގެ ވަގުތުގައި ކުރަމުންގެންދާށެވެ! ތައުބާވުމާއި ހެޔޮ ޢަމަލުތައް ކުރުމަކީ އަޅުކަމުގެ މޫސުމުގައި ނުވަތަ އެންމެ ރަނގަޅު ވަގުތުގައި ކުރާކަމަކަށް ނުހަދާށެވެ! ފާފައެއް ކުރެވުމުން ބިރުވެތިވެ ވަގުތުން ތަޤްވާވެރި ނުވެވޭނަމަ އެއީ ﷲ ތަޢާލާ ދެކެ ލޯބިވުން ކަމަކަށް ނުވާނެއެވެ! ބިރުވެތިވުމާއި ތަޤްވާވެރިވުން ކަމަކަށްވެސް ނުވާނެއެވެ!
ރޭގަނޑުގެ ފަހުބައިގައާއި ހުކުރު ދުވަހު އަޅުކަންކުރުމާއި ދުޢާކުރުން ގިނަކުރާށެވެ! ފާފައެއް ކުރެވުމުން ވަގުތުން އެކަމަށް ބިރުވެތިވެ ތައުބާވާ މީހުން ދެކެ ﷲ ތައާލާ ލޯބިވެވޮޑިގަންނަވާއިރު ދުޢާކުރުމުގެ ކުރިން (ކޮންމެ ފާފައެއް ކުރެވުމުން ވަގުތުން) ތައުބާވަމުން ގެންދާ މީހާގެ ދުޢާ ޢިޖާބަކުރެއްވެވުމަށް އޮތް ފުރުޞަތު ބޮޑުވެގެންދާނެ މިންވަރު ނިކަން ހިތަށް ގެނެސްބަލާށެވެ!
ވީމާ ހެޔޮކަންބޮޑުވެގެންވާ ވަގުތުތަކުގައި ދުޢާކުރަން ތައްޔާރުވާން ފުރިހމަކުރަންޖެހޭ ފުރަތަމަ މަރުޙަލާ ފުރިހަމަކުރަމުން ގެންދާށެވެ! އެއީ ފާފައެއް ކުރެވިއްޖެ ނަމަ ވަގުތުން ތައުބާވުމެވެ. ނަމާދުކުރަން ސަމާލުކަންދިނުމެވެ.
- މުފްތީ މެންކުގެ ދަރުސަކުން
