"މިއަދު ކެހިވެރިވާ މީހަކު ކެހިވެރިވާށެވެ! މާދަމާ ޚަލްޤުތަކުންގެ މެދުގައި ﷲ އެމީހަކު ފަޟީޙަތްކުރައްވާނެތެވެ.
ކީރިތި ރަސޫލާ ޙަދީޘްފުޅު ކުރއްވަވާފައިވެއެވެ! "ހަމަކަށަވަރުން، ޤިޔާމަތް ދުވަހު ކޮންމެ ކެހިވެރިއަކަށް ދިދައެއްވާނެއެވެ. އަދި ގޮވޭނެއެވެ. މިއީ އެވެނި މިވެނި މީހެއްގެ ކެހިވެރިކަމެވެ." متفقٌ عَلَيه"
މީސްތަކުން މިއަދު ދެކެނީ އަނެކާއަށް ކެހިދިނުމަކީ ލިބޭ ބޮޑު އުފަލެއް ކަމަށެވެ. އެކަކު އަނެކަކަށް ކެހިދެމުން ގޮސް ދެމަފިރިން އެކަކު އަނެކަކަށް ކެހިދެނީއެވެ. މައިންބަފައިން ދަރިންނަށް ކެހިދެނީއެވެ. ދަރިން މައިންބަފައިންނަށް ކެހިދެނީއެވެ. އަދި ލޯބިވެރިންކަމަސް ބުނާ މީހުންވެސް އެކަކު އަނެކަކަށް ކެހިދެނީއެވެ.
މިހިސާބުން ނިމެނީއެއް ނޫނެވެ! ﷲ ތަޢާލާއަށާއި ރައްޔިތުންނަށް ތެދުވެރިވާން ﷲ ތަޢާލާ ގަންދީ ހުާކޮށްގެން ތިބޭ ވެރިން ﷲ ތަޢާލާގެ އެންގެވުންތައް ބޮލާލައި ޖަހަނީއެވެ. ހިތުން އިސްލާމްދީނަށް ކެހިދެނީއެވެ. ނަމަވެސް އެއީ ހަމައެކަކަށްވެސް ކުރެވޭނެ ކަމެއް ނޫނެވެ.
އަދި ކީއްހެއްޔެވެ؟ މިބުނިފަދައިން ރައްޔިތުންގެ ކުރިމަތީގައި އެތައް ބައިވަރު ހުވާކޮށްގެން ތިބި ވެރިން އެއްވެސް ބިރެއްނެތި ރައްޔިތުންނަށް ކެހިދެނީއެވެ. ދެކެން ތިބޭށެވެ! ކެހިވެރިންގެ ޢަމަލުތައް ﷲ ތަޢާލާ ފަޟީޙަތްކުރއްވަވާނެ ދުވަސް ދުވަސް އޮތީ ދާދިގާތުގައެވެ.
އެދުވަހުން ދެއްކޭނެ އެއްވެސް ބަހަނާއެއް ނުއޮންނާނެއެވެ! ކަރުގައި ބޮޑެތި ހަރުފަތައް އޮޅާލެވިގެން ތިބޭ ބައަކުވެސް އެދުވަހު ފެންނާނެއެވެ. ބޮޑެތި ބިންތައް ކަރުގައި އޮޅިގެންވާ ބައަކުވެސް ފެންނާނެއެވެ. ސަލާމަތްވާން ފޮޅައިލުމުގެ އެއްވެސް ބާރެއް ލިބިގެނެއް ނުމެވާނެމެއެވެ.
ކެހިވެރިންނޭވެ! ކެހިދިނުން އަވަހަށް ހުއްޓައިލާށެވެ! ޙަދީޘްފުޅުގައިވާފަދައިން ކެހިވެރިކަމުގެ ދިދަ ލިބިގެންވާ މީހަކު ކަމުގައިވެއްޖެ ނަމަ ހުރި ހިތާމައެއްގެ ބޮޑުކަމާއިއެވެ.
- އިސްލާމީ ތިލަފަތުގެ ދަރުސަކުން
