ސުވަރުގެ ހާޞިލުކުރަން އެދޭ މީހާ ހަމައެކަނި ތިމާ ﷲ ތަޢާލާ ދެކެ ލޯބިވަމެވެ ބުނުމަކުން ނުފުދޭނެއެވެ. އަދި ނަމާދުކޮށް ރޯދަހިފައި ޒަކާތްދީ ޙައްޖުވެ ހުރިހާ އަޅުކަމެއް ކުރުމަކުންވެސް ނުފުދޭނެއެވެ.
ފުދޭނީ ތިމާގެ ފިރިންނާއި އަނބިންނާއި ދަރިންނާއި މައިންބަފައިންނާއި ޢާއިލާ ދެކެ އަދި އެމީހުންގެ އިތުރުން އެންމެހައި މީސްތަކުން ދެކެވެސް ލޯބިވެގެންނެވެ. ވެވުނުވަރަކުން އެހީތެރިވެގެންނެވެ. ހެޔޮ ބަސްބުނެގެންނެވެ. ހިނިތުންވެގެންނެވެ.
ﷲ ތަޢާލާ ދެކެ ލޯބިވުމުގެ މާނައިގައި ﷲ ތަޢާލާ އުފެއްދެވި މަޚްލޫޤުންދެކެ ލޯބިވުން ހިމެނިގެންވެއެވެ. ޚާއްޞަކޮށް އެމީހާ ލޯބިވާންޖެހޭ އެމީހާގެ ޢާއިލާގެ މީހުން، ރަޙިމުގެ ގުޅުންހުރި މީހުން ހިމެނިގެންވެއެވެ. އެއެންމެން ދެކެވެސް ލޯބިވެގެން ނޫނީ ފުރިހަމަ ގޮތުގައި ﷲ ތަޢާލާ ދެކެ ލޯބިވެވޭކަމަކަށް ނުވާނެއެވެ.
މީސްތަކުންނޭވެ! ބަދަލުގެންނާށެވެ! ހެޔޮ ބަދަލު ގެންނާށެވެ! އެކަން މާދަމާއަށް ލަސްނުކުރާށެވެ! މިއަދު އެކަންކުރާށެވެ! މާދަމާ އަކީ ތިބާ އާއި ބައްދަލުކުރާނެ ދުވަހެއް ކަމުގައިނުވެދާނެކަމަސް ވިސްނައިގެން ޢަމަލުކުރުމުން މެނުވީ އާޚިރަތް ކާމިޔާބެއް ނުކުރެވޭނެއެވެ.
- މުފްތީ މެންކުގެ ދަރުސަކުން
