އެއްވެސް ކަމެއް ކުރުމުގައި މީހުން ބުނާހައި ގޮތަކަށް ކަންކަން ކުރަން މަސައްކަތްނުކުރާށެވެ! ﷲ އަންގަވާފައިވާ މަގުން ކަންކަން ކުރާށެވެ! އާޚިރަތް ދުވަހު އެއްވެސް މީހަކަށް އަނެކާއަށް ކޮށްދެވޭނެ ހަމަ އެއްވެސް ކަމެއް ނެތެވެ. ހުރިހާ ކަމެއްވެސް ނިންމަވާނީ ﷲ އެވެ!
ކަމެއް ވަކިގޮތަކަށް ކުރުމުން މީހުން ދައްކާނެ ވާހަކައަށް ބިރުނުގަންނާށެވެ! ކޮންމެވެސް ބައަކު ތިބާ އާއި ދެކޮޅަށް ވާހަކަ ނުދައްކާނެ ގޮތަކަށް އެއްވެސް ކަމެއް ނުކުރެވޭނެއެވެ. ﷲ ތަޢާލާގެ ރުހިވޮޑިގަތުން ލިބޭނެ ގޮތް އިޚްތިޔާރުކުރުމުން މީހުން ދައްކާ ވާހަކައަކުން ލިބޭނެ އެއްވެސް ގެއްލުމެއް ނުއޮންނާނެއެވެ!
ހަމައެކަނި 5 ނަމާދުކުރުމަކުން ނުނިމެއެވެ. ކުރާ ކޮންމެ އަމަލަކީ ﷲ ތަޢާލާ އަންގަވާފައިވާ ގޮތަށްކުރާ ޢަމަލަކަށް ހަދަން އެބަޖެހެއެވެ. ނޫންނަމަ ނަމާދުކުރުމުން ލިބޭ ޘަވާބަށްވުރެ ﷲ ތަޢާލާ ރުހިވޮޑި ނުގަންނަވާ ގޮތަށް ކުރެވޭ ޢަމަލުތަކުން ލިބޭނެ ފާފަ މާބޮޑުވެދާނެއެވެ!
ﷲ ތަޢާލާއަށް ފުރިހަމަ ގޮތުގައި ކިޔަމަންތެރިވުމަކީ ކުރާ ކޮންމެ އަމަލެއްވެސް ﷲ ތަޢާލާ އަންގަވާފައިވާ ގޮތަށް ކުރަން މަސައްކަތްކުރުމެވެ. އެންެ ފުރިހަމައަށް އެކަމެއް ނުކުރެވުނު ނަމަވެސް ކުޅަދާނަވީ އެންމެ މަތިވެރި މިންވަރަކަށް ޢަމަލުކުރަން މަސައްކަތްކުރާށެވެ! އިޚްލާޞްތެރިކަމާއިއެކު އެގޮތަށް މަސައްކަތްކުރަމުން އުނިވާބައި ޢަފޫކުރައްވަވައި ދެއްވެވުން އެދި ދުޢާކުރަމުން ގެންދާށެވެ! ޤަބޫލުފުޅު ކުރައްވަވާނެއެވެ! ކާމިޔާބު ކުރެވޭނެއެވެ! އިން ޝާ ﷲ
- އިސްލާމީ ތިލަފަތުގެ ދަރުސަކުން
