ބައެއް މީހުން ޤަބޫލުކުރަނީ ނޫނެކެވެ ބުނަމަކީ ގުޅުން ކެނޑޭކަމެއް ކަމަށެވެ. އެހެންވެ ނޫނެކެވެ ބުނަން ޖެހިލުންވެއެވެ. އަދި ނޫނެކެވެ ބުނަން ލަދުގަންނަ މީހުންވެސް އުޅެއެވެ.
އާނއެކެވެ ބުނުމުގެކުރިން 10 ފަހަރު ވިސްނާށެވެ! ނޫނެކެވެ ބުނަން ޖެހޭ ކަންކަމުގަ ނޫނެކެވެ ބުނުމުގެ ޤާބިލުކަން ލިބިފައިނުވާނަމަ އަބަދުވެސް އުޅެންޖެހޭނީ ބުނެވޭ އާނއެކެވެ ތަކުން ސަލާމަތްނުވެވިގެންނެވެ. އެކަމުގެ އަޅަކަށްވެގެންނެވެ. އާނއެކެވެ ބުނެވެން ނެތް ކަންކަމުގައި ނޫނެކެވެ ބުނުމަށްވުރެ ފައިދާހުރި ގޮތެއް ނޯންނާނެއެވެ!
ޙަޤީޤަތުގައި ކަންބޮޑުވާންވީވެސް ލަދުގަންނަންވީވެސް ނޫނެކެވެ ބުނަން ޖެހޭ ޙާލަތުގައި އާނއެކެވެ ބުނުމަށެވެ. ނޫނެކެވެ ބުނަން ޖެހޭ ޙާލަތުގައި އާނއެކެވެ ބުނުމަކީ ދެފަރާތުގެ ގުޅުން ކެނޑިގެންދާ ކަމެކެވެ. އިތުބާރުވެސް ގެއްލިގެންދާ ކަމެކެވެ. ވީމާ ދެފަރާތަށްވެސް އެންމެ ފައިދާކުރާނެ ގޮތަކީ ނޫނެކެވެ ބުނަންޖެހޭ ޙާލަތުގައި ނޫނެކެވެ ބުނުމެވެ. އާނއެކެވެ ނުބުނުމެވެ.
މިއީ އިސްލާމް ދީނުގައިވެސް މިކަން އޮތްގޮތެވެ. ވަޢުދެއް ވެއްޖެ ނަމަ ފުއްދަންޖެހޭނެއެވެ. އެއީ ކުރުން ލާޒިމްކަމެކެވެ. ނޫންނަމަ އެކަން ދަރަންޏަކަށްވެގެންވެސް އެބަދެއެވެ. ވީމާ ބުނާ ބަހާއި އަމަލު ދިމާކުރާށެވެ! ވައުދެއް ވެއްޖެ ނަމަ ފުއްދާށެވެ! ނުފުއްދޭނެ ކަންކަމުގައި ވައުދު ނުވާށެވެ!
- އިސްލާމީ ތިލަފަތުގެ ދަރުސަކުން
