އަހަރެމެންގެ ތެރެއިން ކޮންމެ މީހަކީވެސް ދަމުނަމާދަށް ތެދުވަން ބޭނުންވާނެ މީހެކެވެ. ދަމުނަމާދުކުރަން ބޭނުންވާނެ މީހެކެވެ. ނަމަވެސް ނިދުމުގެ ވައްޓަފާޅި ގެންގުޅެވޭގޮތުންނާއި ތަޤްވާވެރިކަން ކުޑަކަމުން ނުހޭލެވެނީއެވެ. އަދި މިފަދަ ގިނަބައެއްގެ އެންމެ ބޮޑު އެއް މައްސަލައަކީ ވިތުރިވެސް ނުކޮށް ނިދަންތިބޭކަމެވެ.
ބައެއް މީހުން ބުނެއެވެ. "އަހަރެން ވިތުރިކުރަން ބޭނުންވަނީ ދަމުނަމާދުކުރުމަށްފަހުގައެވެ. އެގޮތް ބޭނުންވަނީ ސުންނަތުގައި އޮތީ ވިތުރިއަކީ ރޭގަނޑުކުރާ އެންމެ ފަހު ނަމާދުކަމުގައި ހެދުމަށް ކަމުގައިވާތީއެވެ."
މިފަދަ މީހުންގެ ސަމާލުކަން އެހެރީ އެ ޙަދީޘްފުޅަށެވެ. "ވިތުރި ނުކޮށް ނުނިދަން އަބޫހުރައިރަތުގެފާނަށް ރަސޫލް ﷺ ވަޞިއްޔަތް ކުރެއްވެވިކަން އެމީހުންނަކަށް ނުއެނގެއެވެ. ނުވަތަ އެޙަދީޘްފުޅު ހަނދާނަކު ނުހުރެއެވެ.
ކޮންމެއަކަސް މިރޭ ބުނެލަން ބޭނުންވަނީ ދަމުނަމާދަށް ހޭލަން ޝައުޤުވެރިވާނަމަ ފުރަތަމަ ކަމަކަށް ނިދުމުގެކުރިން ވިތުރިކުރަން ފަށާށެވެ! އެއިރުން ރޭއަޅުކަމުގެ ފުރަތަމަ ބައި އެފުރިހަމަކުރެވުނީއެވެ. އެބައި ފުރިހަމަކުރަން ފެށުމުން އެމީހަކަށް ﷲ ތަޢާލާގެ ލޯބިވެވޮޑިގަތުން ލިބުން އިތުރުވާން ފަށާނެއެވެ. އިސާހިތަކު ދަމުނަމާދަށް ހޭލެވެން ފަށާނެއެވެ. އިން ޝާ ﷲ
ޢިޝާ ނަމާދަށްފަހު ނިދުމުގެ ކުރިން ވިތުރިކުރަން އުނދަގޫވާނަމަ ޢިޝާ ނަމާދުގެ ރަވާތިބު ސުންނަތަށްފަހުގައި ވިތުރިކުރަންފަށާށެވެ! ފަހުން މޮޅަށް ކުރުމުގެ ނިޔަތް އޮވެ، ނުކުރެވުމުން ލިބޭ ދެރަ މާބޮޑެވެ. ވީމާ ފުރަތަމަ ފިޔަވަޅު ފުރަތަމަ އަޅާށެވެ! އެއިރުން ﷲ ތަޢާލާ އެމީހަކަށް ގިނަ ހެޔޮ ގޮތްތައް މިންވަރުކުރައްވަވައި ދެއްވަވާނެތެވެ. އަޅުކަންކުރުމުގައި ހީވާގިވުމުގެ ހިތްވަރުވެސް ދެއްވަވާނެތެވެ! އިން ޝާ ﷲ
- އިސްލާމީ ތިލަފަތުގެ ދަރުސަކުން
