އެހެން މީހުންނާ ފޮށި މަލާމާތްކޮށް ފުރައްސާރަކުރާ މީހަކަށް އަރާމުގައި ނިދައިވެސް ނުލެވޭނެއެވެ. އެއްކަމަކަށް އަބަދުވެސް ވިސްނޭނީ ކޮންމެވެސް މީހަކާއި ބެހިގަންނާނެ ގޮތަކާއިމެދުގައެވެ. ދެވަނަ ކަމަކަށް އެފަދަ މީހުން ތިބެން ޖެހޭނީ އެހެން މީހުން އެމީހަކަށް ކިޔާނެ އެއްޗަކަށް ބިރުން ޖެހިލުވެފައެވެ.
ވިސްނާލަން ޖެހޭ ކަމަކީ އެހެން މީހުންނާއިބެހި ފޮށި ފުރައްސާރަކުރުމުން ތިމާއަށް ލިބެނީ ކޮން ފައިޑާއެއް ކަމާއިމެދުގައެވެ. ޙަޤީޤަތުގައި އެމީހަކަށް ލިބޭނެ އެއްވެސް ފައިދާއެއް ނެތެވެ. ފައިދާއެއް ނުލިބޭތަނުގައި އެފަދަ މީހުންނަށް ގިނަ ބައެއްގެ ލަޢްނަތް ދާނީ ލިބެމުންނެވެ. އަދި އެމީހަކު ކުރާ އެފަދަ ޢަމަލުތަކަށް ﷲ ތަޢާލާ ޖަޒާވެސް ދެއްވަވާނެތެވެ.
މީސްތަކުންނޭވެ! މިފަދަ ޢަމަލުތައް ނުކުރާށެވެ! ޚާއްޞަކޮށް މީސްމީހުންގެ ޒާތީ ކަންކަމާއިބެހި އެމީހުން ފަޟީޙަތްނުކުރާށެވެ! ކޮންމެ މީހެއްގެވެސް އެތައްބައިވަރު އެކުވެރިންނާއި ރަޙްމަތްތެރިން ތިބޭނެއެވެ. އެމީހަކަށް ތާއީދުކުރާ އެތައް ބައަކު ތިބޭނެއެވެ.
އެންމެ މީހަކާއިމެދު އެފަދަ އަމަލެއް ކުރިނަމަވެސް އެތައް އެއެންމެން ތިބާއަށް ނަފްރަތުކުރާނެއެވެ. ޙަސަދަވެރިވާނެއެވެ. ބަދުދުޢާވެސް ކުރާނެއެވެ! އެތަނުން އެންމެ ބަދުދުޢާ ތިބާއަށް ރައްދުވި ނަމަވެސް ތިބާއަށް ލިބޭނީ ކޮން ފަދަ ބޮޑު ދެރައެއްކަމާއިމެދު ނިކަން ވިސްނައިލަބަލާށެވެ.
- މުފްތީ މެންކުގެ ދަރުސަކުން
