މިއަދަކީ ސަރުކާރު ބަންދު ދުވަހެކެވެ. ރަސޫލާ ﷺ ގެ ޢީދު މީލާދު ދުވަސްކަމަށްވެގެންނެވެ.
ސުވާލަކީ ސަރުކާރު ބަންދުކޮށްފައި ގޭގައި ތިބެ ޗުއްޓީކުރީމާ ރަސޫލާ ﷺ މަތިވެރިކުރެވޭ ހެއްޔެވެ؟ މިއަދަކީ ޗުއްޓީ ދުވަހަކަށް ހެދުމުން ލިބޭނެ ޘަވާބެއް އެބަ އޮތްހެއްޔެވެ؟ ޗެއްޓީ ދުވަހަކަށް ހަދައިގެން ކުރާނެ އަޅުކަމެއް އޮތީ ހެއްޔެވެ؟ ވީއިރު ދުވަސް ޗުއްޓީކޮށް މިކުރެވޭކަމަކީ ޞަލީބީން ކްރިސްމަސް ފާހަގަކުރާތީ އެއްގޮތްވާން ކުރާ ކަމެއް ނޫންހެއްޔެވެ؟
ރާއްޖޭގައި މިއަދު ކަމެއް ކރެވުނު ކަމަށްވީހީ ސަރުކާރުގެ ކަމާއިބެހޭ އިދާރާތަކުގެ ހުރިހާ މުވައްޒިފުން ނުކުމެ މިހާރު ހުށަހެޅިފައި ހުރި ﷲ ތަޢާލާ އާއި ރަސޫލާ ﷺ އަށާއި އިސްލާމް ދީނަށް ފުރައްސާރަކުރުމުގެ މައްސަލަތައް ބަލައި ޙުކުމްކޮށްވެސް ނިންމި ނަމައެވެ.
އެއިގެ ތެރޭގައި އިތުރުޞާޙިބާގެ ޤަދަރުކުޑަކުރަން ރައްޔިތުންގެ މަޖިލީހޭ މިކިޔާ މަޖިލީހުން ހިންގާ ޖަރީމާތަކުގެ މައްސަލަވެސް ބެލި ނަމައެވެ. ޤާނޫނުގައި އޮތް ގޮތުން ފުލުހުންނަށް އެ މައްސަލަ ނުބެލުނު ނަމަވެސް ޤައުމީ ސަލާމަތާއިބެހޭ މައްސަލައެއްގެ ގޮތުގައި ސިފައިންނަށް ބެލޭނެއެވެ.
މިފަދަ އެއްވެސް ކަމެއް ކުރަން ނުކުޅެދޭ ހާލު ދުވަސް ބަންދުކޮށްގެން ގޭގައި ތިބމުގ ބޭނުމަކީ ކޮބައި ކަމާއިމެދު ގިނަ ބައަކު ސުވާލުކުރެއެވެ.
