ބައެއް މީހުން ރުޅިއައުމުން ވަރަށް ފަސޭހައިން ބުނެއުޅެއެވެ. ތިބާ ދެން އިތުރަށް ދެކެންވެސް ބޭނުމެއް ނޫނެވެ. އަދި ސުވަރުގެއިން ވެސް ތިބާ ދެކެންވެސް ބޭނުމެއް ނޫނެވެ.
މިފަދަ ބަސްތައް ބުނާ މީހުންނާއި ކޮށްލަން ބޭނުންވާ ފުރަތަމަ ސުވާލަކީ ތިބާއަށް ސުވަރުގެ ލިބޭނެ ކަމުގެ ގަރަންޓީ ދިނީ ކާކުހެއްޔެވެ؟
ރަނގަޅަށް ވިސްނާށެވެ! އެފެންވަރަށް ރުޅިއަންނަނަމަ ތިބާއަކީ ޝައިޠޯނާގެ ޝިކާރައަކަސްވެފައިވާ މީހެކެވެ. ޝައިޠޯނާ އެވަނީ ތިބާ ވަރަށް ވަރުގަދައަށް ކަސްތޮޅު އަޅުވައިފައެވެ.
ދެވަނަ ކަމަކީ ސުވަރުގޭގައި އެއްވެސް ރުޅިވެރިކަމެއް އަދި ހަސަދަވެރިކަމެއް ނުވެއެވެ. ވީމާ އެއްވެސް މީހަކަށް އެހެން މީހަކު ދެކެ ރުޅިއައިސް ހަސަދަވެރިވުމެއް ސުވަރުގެއަކު ނުވެއެވެ. އެންެން ތިބޭނީ އިންތިހާއަށް އުފަލުގައެވެ. ﷲ ތަޢާލާ މަތިވެރިކުރުންމަތީގައެވެ. އެހެންކަމަށްވާއިރު ތިބާ ދާން ތިއަ އުޅެނީ އަހަރެމެން މުސްލިމުން ދިއުމަށް އުންމީދުކުރާ ސުވަރުގެއަކަށް ނޫނެވެ. އެހެން ކޮންމެވެސް ތަނަކަށެވެ.
ނަޞޭޙަތަކީ ރުޅި ކޮންޓްރޯލްކުރުމެވެ. ރުޅިއައި ނަމަވެސް ދުލުން މިފަދަ ނުބައި ބަސްތައް ނުބުނުމެވެ. އެކަކު އަނެކަކަށް މާފުކުރމުގައި ދެމިތިބުމެވެ. އެކުގައި ދިރިއުޅެވެން ނެތް ޙާލަތަކަށް ކަންކަން ހިނގައްޖެ ނަމަ ދެމަފިރިން ވަރިވި ނަމަވެސް އެކުވެރިކަމާއިއެކު އެކަން ކުރުމެވެ.
- އިސްލާމީ ތިލަފަތުގެ ދަރުސަކުން
