ނައީޝާ ޢަބްދުﷲ ޢަބްދުލްބާރީ
ފާފައެއްގެމަތީ ތައުބާ ނުވެ ހުއްޓާ ތިބާގެ މަރު އައިސް ބައްދަލުކޮށްފިނަމަ ކޮންފަދަހެއްޔެ ؟ ބޮޑާކަންމަތީ ދުނިޔަވީ އެދުންތަކަށް ބޯލަބައި، މަޖަލާއި ސަކަރާތުގައި ވަގުތުތައް ބޭކާރުކޮށްލަނީ، ﷲ ގެ ޢަޒާބަކީ ކިހާ ވަރެއްގެ އެއްޗެއްކަން ނޭނގޭތީހެއްޔެވެ ؟ ކުޑަ ވަގުތުކޮޅަކަށްވިޔަސް އެކަލާނގެ ދެއްވާ ޢަޒާބަށް ތިބާއަށް ކެތްކުރެވޭނެ ކަމަކަށް ހީކުރަނީހެއްޔެވެ ؟
ކީރިތި ޤުރުއާނުގައި މާތްﷲ ވަޙީކުރައްވާފައިވެއެވެ. "...ފަހެ، كافر ވި މީހުންނަށް އަލިފާނުގެ ފޭރާންތަކެއް ތައްޔާރު ކުރައްވާފައިވެއެވެ. (އަދި) އެއުރެންގެ ބޯތަކުގެ މައްޗަށް ކެކިކެކިހުރި ހޫނުފެން އޮއްސަވާހުށްޓެވެ.އެއިން އެއުރެންގެ ބަނޑުތަކުގައިވާ ތަކެއްޗާއި ހަންތައް ވިރުވާހުށްޓެވެ.އަދި އެއުރެންނަށްޓަކައި، ދަގަނޑު ޗާބޫކުތަކެއް ވެއެވެ" سورة الحج ( 19, 20, 21 )
ތިބާއަށް އެންމެ ހިނދުކޮޅަކުވެސް ނަރަކައިގެ ޢަޒާބަށް ކެއްވާނެކަމަށް ހީކޮށް ޝައިޠާނާގެ ވަސްވާހަށް ހެއްލިގެންނުދާށެވެ. އެތަނުގެ ބިރުވެރިކަމާއި ހުރި ޢަޒާބު ތަކުގެ ބޮޑުކަން އެންމެ މޮޅަށް ދެނެވޮޑިގެންވާނީ ﷲއެވެ.
އަންނުޢްމާން ރިވާކުރެއްވި ޙަދީޘް ބަސްފުޅެއްގައިވެއެވެ. " ނަރަކައިގައި ލިބޭނެ އެންމެ ކުޑަ މިންވަރުގެ ޢަޒާބަކީ، އަނދަ އަނދާ ހުންނަ އަލިފާން އަނގުރުކޮޅެއްގެ މަތީގައި ހިނގަން ޖެހުމެވެ. އަދި އޭގެ ސަބަބުން އޭނާގެ ސިކުނޑި ކެކިކެކި ހުންނާނެތެވެ. "
އޭ އިންސާނާއެވެ ! ﷲ އަށް ބިރުވެތިވާށެވެ. ވަގުތު ފާއިތުނުވަނީސް ތިބާއަށް ކުރެވިފައިވާ ފާފަތަކަށް ތަޢުބާވާށެވެ. ޚުޝޫޢަތްތެރިކަމާއިއެކު ނަމާދުތައް ވަގުތުގައި އަދާކުރާށެވެ. އަދި ތިބާވީ ކޮންމެ ތަނެއްގައިވެސް މަރު ހަނދުމަކުރާށެވެ.އެކަލާނގެއީ ގިނަ ގިނައިން ތަޢުބާ ޤަބޫލުކުރައްވާ، ރަޙީމްވަންތަ ރަސްކަލާނގެއެވެ.
