މީސްތަކުންނޭވެ! ޒަމާން މިވަނީ ބަދަލުވެފައެވެ. ޒަމާނާއި އެއްގޮތަށް ދަރިން ބަދަލުވަމުން މިދަނީ މައިންބަފައިންގެ އިހުމާލުންނެވެ. ދަރިންނަށް އެ ފުރުޞަތުދޭތީއެވެ. އިސްލާމް ދީނުގައިވާމަގުން ދަރިން ތަރުބިއްޔަތު ނުކުރެވޭތީއެވެ. ވީމާ ޒަމާނާއި ދަރިން ކުށްވެރިކުރުމުގެ އެއްވެސް ބޭނުމެއް ނެތެވެ.
މުޖުތަމަޢުގެ ކަންކަން މިއަދު މިއޮތް ޙާލަތަށް ބަލައިފިނަމަ ފުރާވަރަށް އަރާފައި ތިބި އަންހެންދަރިންނާއި އެއުމުރުގެ ފިރިހެންކުދިން ބައްދަލުވެ ގުޅުން ބަދަހިނުކުރާނެ އެއްވެސް ގޮތެއް މިހާރަކު ނުހެދޭނެއެވެ. ކޮލެޖުގަ އާއި ޔުނިވަރސިޓީގައިވެސް ބައްދަލުވެ ގުޅުން އުފައްދާނެއެވެ. އަދި ވަޒީފާގެ މާހައުލުގައިވެސް ގުޅުންތައް އުފެދޭނެއެވެ. އަދި އެނޫން ގޮތްގޮތުންވެސް ގުޅުންތައް އުފައްދާނެއެވެ.
ހިތާމައަކީ މިޙަދީޘް ވެފައި މިއޮންނަނީ އެންމެ ގިނަ ބެލެނިވެރިން ޢަމަލުނުކުރާ ޙަދީޘަށް ކަމެވެ. ބޮލާލައި ޖަހާ ޙަދީޘަށް ކަމެވެ. ރަނގަޅަށް އަޑުއަހާށެވެ! ޙަދިޘްފުޅުގައި އޮތީ ދީންވެރި ޚުލްޤް ރަނގަޅު ފިރިހެނަކު ދަރިފުޅުގެ ކައިވެންޏަށް އެދިއްޖެނަމަ އަވަހަށް ކައިވެނިކޮށްދިނުމަށެވެ. ވީމާ މި 2 ކަންތައް ފުރިހަމަ ފިރިހެނަކު ދަރިފުޅުގެ ކައިވެންޏަށް އެދިއްޖެ ނަމަ އަވަހަށް ކައިވެނިކޮށްދޭށެވެ. ހަމަ އެއާއިއެކު އެފަދަ ފިރިހެނަކު ތިއަ ކަނބަލުންގެ، ތިއަކުދިންގެ ކައިވެންޏަށް އެދިއްޖެ ނަމަ އަވަހަށް ރުހޭށެވެ!
ޔަޤީންކުރަންވީ ކަމަކީ ރަސޫލް ﷺ ގެ ޙަދީޘްފުޅަކަށް ޢަމަލުކޮށްގެން އެއްވެސް މީހަކަށް އެއްވެސް ދެރައެއް ނުލިބޭނެކަމެވެ. ލިބޭނީ ކުރިއެރުންކަމެވެ. ކާމިޔާބުކަމެވެ. މެދުވެރިވާނީ ރަނގަޅު ގޮތްތައް ކަމެވެ.
މީސްތަކުންނޭވެ! ކައިވެންޏަށް އެދިގެން އަންނަ މީހާއާއިމެދު އެހެން ބުނާ ބަސްތަކަށް އިތުބާރުކުރަންވާނީ ޙަޤީޤަތް ހޯދާފައެވެ. އެހެނީ ގިނަ މީހުން މިއަދު މީސްމީހުންނާއިމެދު ބަސްބުނަނީ އެމީހާގެ ކަންކަން އެނގިތިބެގެނެއް ނޫނެވެ. ޔޯލަކޮށްލާފައިވެސް އެބަ ވާހަކަތައް ދައްކައެވެ.
ދަރިފުޅު މިވެނި މީހަކާއި ކައިވެނިކުރަން ބޭނުންވެގެން ބުނެފިނަމަ އުފާކުރާށެވެ! އެކަން އަވަހަށް ކޮށްދޭށެވެ! ފާފަކުރުމުން ދަރިފުޅު ސަލާމަތްކުރެވޭނީ އެއިރުންނެވެ. އަދި މައިންބަފައިންނާއިމެދު ނަފްރަތުކުރުމުންވެސްމެއެވެ. އެހެނަސް ޙަދީޘްފުޅުގައި އެވާ 2 ކަންތައް ފުރިހަކަން ބަލަންވާނެއެވެ. އެއީ ކައިވެނީގެ އެންމެ ބޮޑު ޝަރުޠުކަމުގައި ހަދާށެވެ! ދަރިފުޅަށްވެސް އަދި މައިންބަފައިންނަށްވެސް އުފާވެރިކަން ލިބުންވަނީ އެއިރުންނެވެ. އެކަންކަމަށް ބެލުމުންނެވެ.
- މުފްތީ މެންކުގެ ދަރުސަކުން
