ދަތި އުނދަގޫ ޙާލަތު މެދުވެރިވުމުން އެއީ މުޞީބާތެއްކަމަށް ދުށުމަކީ ހަމަ އެއްގޮތަކަސްވެސް ކޮށްގެންވާނެ ކަމެއް ނޫނެވެ. އެހެނީ އެކަމަކީ ތިބާއަށް ސުވަރުގެ ވަދެވޭ ސަބަބުކަމުގައިވެސް ވެދާނެއެވެ. އުންމީދުކޮށް ޔަޤީންކުރަންވީ އެގޮތަށެވެ.
މިސާލަކަށް ބުނާނަމަ ތިބާއަށް ލިބުން ޙައްޤުވެގެންވަނީ ސުވަރުގޭގެ މަތިވެރި ދަރަޖައެއް ކަމަށްވެދާނެއެވެ. ތިބާ ދުނިޔޭގައި ހުރީ ހުރިހައި ކަންކަން ފުރިހަމަވެފައި ކަމަށްވާނަމަ ތިބާއަށް ﷲ ތައާލާގެ މަތިން ހަނދުމަކުރެވޭ މިންވަރު މަދުވެދާނެއެވެ. ފަރުޟު އަދާކުރުމުގައި ފަރުވާކުޑަކުރެވިދާނެއެވެ. ސުންނަތް ކުރުމުގައި އިހްމާލް ވެވިދާނެއެވެ. ޛިކުރުކުރުންމަތިން ހަނދުމަވެސް ނެތިދާނެއެވެ. ތިބާއަށް ކުރެވޭ އަޅުކަން މަދުވެދާނެއެވެ. މިއީ ހަމަ އިންސާނުންނަށް މެދުވެރިވާ ކަންކަމެވެ.
އެއިގެ ބަދަލުގައި ތިބާއަށް ކުރިމަތިވެފައިވަނީ ދަތި އުނދަގޫ ހާލަތެއް ކަމަށް ވެއްޖެނަމަ ތިބާއަށް ﷲ ތަޢާލާގެ މަތިން ހަނދުމަ ކުރެވޭ މިންވަރު އިތުރުވެދާނެއެވެ. މިބަޔާންކުރި ކަންކަން ކުރެވޭ މިންވަރު ގިނަވެދާނެއެވެ. އެކަމުގެ ސަބަބުން ތިބާއަށް ސުވަރުގޭގެ މަތީ ދަރަޖައަކަށް ވާސިލުވެވުމުގެ ފުރުޞަތު ފަހިވެގެންދާނެއެވެ. މޮޅަށް ދެނެވޮޑިގެންވަނީ ހަމަ ﷲ ތަޢާލާއެވެ.
ދަތި އުނދަގޫ ހާލަތެއް ކުރިމަތިވާ ކޮންމެ ފަހަރަކު ނުވަތަ ދަތި އުނދަގޫ ހާލަތެއްގައި އުޅެން ޖެހިއްޖެ ނަމަ އެއީ ﷲ ތަޢާލާ ދެއްވެވި ޢަޛާބެއް ކަމަށް ނުދެކޭށެވެ! އެއީ ތިބާއަށް މިންވަރު ކުރެއްވެވި ނިޢްމަތެއް ކަމަށް ދެކޭށެވެ! އެއިރުން އެއްވެސް ކަމަކާއިމެދު ހިތް ހަމަ ނުޖެހި ކަންބޮޑުވެ މާޔޫސްވާކަށް ވެސް ނުޖެހޭނެއެވެ.
ދަތި އުނދަގޫ ކޮންމެ ޙާލަތެއް ކުރިމަތިވި ނަމަވެސް ބައެއް މީހުން ދެކޭ ގޮތުގައި އެއީ ﷲ ތަޢާލާ ދެއްވަވާ ޢަޛާބެކެވެ. ނަމަވެސް ދަތި އުނދަގޫ ކޮންމެ ޙާލަތަކީ ޢަޛާބެއް ނޫނެވެ. އެއީ ތިބާއަށް ސުވަރުގެއިން ލިބޭ ދަރަޖަ މަތިވެރިކުރެއްވުމަށް ލެއްވެވި ސަބަބުކަމުގައި ޔަޤީންކުރާށެވެ
ބަލިމަޑުކަމެއް، މާލީ ދަތިކަމެއް ނުވަތަ ކާރިސާއަކުން ގެއްލުމެއް ލިބުނު ނަމަވެސް ބައެއް މީހުން ދެކެނީ އެއީ ﷲ ތަޢާލާ ދެއްވެވި ޢަޛާބެއް ކަމަށެވެ. އަދި ބައެއް ފަހަރު އެކަންކަމަށް ޝަކުވާވެސް އެބަ ކުރެވެއެވެ. އެފަދަ މީހުން އިތުރަށް ވިސްނައިލުން ރަނގަޅުވާނެއެވެ.
ހަމަ އެއާއިއެކު ބައެއް މީހުންނަށް މުޅި އުމުރުގައިވެސް ދަތި އުނދަގޫ ހާލަތްތަކުގައި އުޅެން އެބަޖެހެއެވެ. އެފަދަ މީހުންނަށް ދުނިޔޭގައި އުޅެންޖެހިފައި އޮންނަނީ ވަރަށް ގިނަ ތަކްލީފްތަކާއި އެކުގައެވެ. މިއިން ކޮންމެ ހާލަތެއްގައި ވެސް ދެވަނަ ވިސްނުމަކުން ވިސްނައިލާށެވެ. މިބަޔާންކުރި މަގުން ވިސްނައިލުމުން އުފަލުން ފުރިގެންދާނެއެވެ! އިން ޝާ ﷲ
- އިސްލާމީ ތިލަފަތުގެ ދަރުސަކުން
