ދުނިޔޭގައި ކަން ހިނގަމުންދާ ގޮތަށް ބަލާށެވެ! ކިރިޔާވެސް ތަނަވަސްކަމެއް ލިބިއްޖެނަމަ، މަތީ ވަޒީފާއެއް ލިބިއްޖެ ނަމަ މިސްކިތަށް ދިއުމަށް ލަދުގަނެއެވެ. އެފަދަ މީހުންނަށް ތިމާގެ ތަނަވަސްކަމާއި ތިމާގެ ހައިބަތު މިސްކިތަށްވުރެ މަތިވެރި ނުވަތަ މިސްކިތަށްވުރެ މާބޮޑު ކަމަށް ޤަބޫލުކުރެވެނީ ކަމަށް ވެދާނެއެވެ.
މިފަދަ މީހުން އެނާއަށް ތަނަވަސްކަމާއި މަތީ މަޤާމާއި ޢިއްޒަތް ދެއްވެވީ ﷲ ތަޢާލާކަމާއި އެ ނިޢްމަތްތައް ދެއްވެވީ އިމްތިޙާނަކަށްކަން ހަނދާނަކު ނުހުރެއެވެ.
އެމީހަކަށް ﷲ ތަޢާލާ ނިޢްމަތްތައް ދެއްވެވުމުން ބޮޑާވެގަންނަ މީހަކުނަމަ އެމީހަކު އެހިސާބުން ފއެހެރީ މަގުފުރެދިފައެވެ. ﷲ ތަޢާލާ ދެއްވެވި ނިޢްމަތްތަކަށް ޝުކުރުވެރިވުމުގެ ބަދަލުގައި އެމީހަކު އެވަނީ ބޮޑާވެ ކިބުރުވެރިވެފައެވެ.
އެމީހާ އިމްތިހާނުން ފާސް ނުވީއެވެ. އެހާލަތުގައި ބައެއް މީހުން އިމްތިޙާން ކުރެއްވެވުން އެހެން ގޮތަކަށް އެބަ ބަދަލު ކުރައްވަވައެވެ. ދަތި އުނދަގޫ ހާލަތްތައް އެބަ ކުރިމަތިކުރައްވަވައެވެ. އެއީވެސް އޭނާއަށް ކަންކަން ވިސްނި ﷲ ތަޢާލާގެ މަގަށް އެނބުރި ރުޖޫޢަވުމުގެ ފުރުޞަތު ދެއްވެވުމަށެވެ. މޮޅަށް ދެނެވޮޑިގެންވަނީ ﷲ އެވެ!
- އިސްލާމީ ތިލަފަތުގެ ދަރުސަކުން
