ތިމާއާއި އެކުގައި އުޅޭ އެއްވެސް މީހަކީ ތިމާއަށް އެއްވެސް ދެރައެއް ނުދޭނެ މީހެއްކަމަށް ނުދެކޭށެވެ. އަދި ކިތަންމެ ބޮޑު ދެރައެއްވެސް ދީފާނެ މީހެއްކަމަށް އަބަދުވެސް ވިސްނަންވާނެއެވެ!
މިބުނި ބަހުގެ މާނައަކީ ކޮންމެހެން ހުރިހާ އެކުވެރިންނަށް ޝައްކުގެ ނަޒަރުން ބަލައި އަބަދު ހުރުމެއް ނޫނެވެ. ނަމަވެސް ކިތަންމެ ބޮޑު ދެރއެއްވެސް ދީފާނެ ކަމަށް ވިސްނައިގެން ހުރެ އެކުގައި އުޅުމެވެ. އެއްވެސް މީހަކަށް ހުރިހާ ކަންކަމުގައި އެންމެ ބޮޑަށް އިތުބާރުނުކުރުމެވެ.
ޚާއްޞަކޮށް ފައިސާގެ ކަންކަމުގަ އާއި ބައިވެރިޔާގެ ކަންކަމުގައި އެއްވެސް މީހަކަށް މާބޮޑަށް އިތުބާރުނުކުރާށެވެ! އިންސާނުންގެ ދަހިވެތިކަން އެންމެ ބޮޑީ އެކަންކަމުގައެވެ. ރަނގަޅަށް ހުންނަން، ތެދުވެރިކަމުގައި ސާބިތުވާން ނިޔަތްގަނެގެން ތިބޭ އެތައް ބައަކުވެސް ފުރުޞަތު ލިބުމުން އެދެކަންތަކުގައި ގޯޅިއަޅައެވެ. މަގުން ކައްސައިލައެވެ. އަޚްވަންތަކަން ހަނދާންނެތިގެންދެއެވެ.
އެއްވެސް މީހަކަށް ދަރަންޏަށް ފައިސާ ދޭނަމަ ލިޔެކިޔުން ފުރިހަމަކުރަން ދީނުގައި އޮތީ އެހެންވެގެންނެވެ. ހަމައެއާއިއެކު އަނބިމީހާގެވެސް ފިރިމީހާގެވެސް ކަންކަން ކިތަންމެ ގާތް މީހަކާއި ނަމަވެސް ޙަވާލުކުރުމެއް ނެތެވެ. އެކަމުގެ ތެރެއިން ހިނގައިފާނެ ނުބައިކަމަކަށްޓަކައެވެ! ކިތަންމެ ބޮޑު ދެރައެއްވެސް ލިބިދާނެކަމަށްޓަކައެވެ.
ދެމަފިރިންގެ މެދަށް އެންމެ ގާތް އެކުވެރިޔާ ވަނުމަކީ ހަމަ ވަރަށް ގިނައިން ކުރިމަތިވާ ކަމެކެވެ. ވީމާ މިއީ ވަރަށް ބޮޑަށް ވިސްނަން ޖެހޭނެ ކަމެކެވެ. އެންމެ ގިނައިން ކުރިމަތިވާ އެއްކަމަކީ ތިމާއަށްވުރެ އުފާވެރި ދިރިއުޅުމެއް އެހެން ދެމަފިރިއަކު އުޅޭތަން ފެނުމުން ޙަސަދަވެރިވެވުމެވެ. އެކަމުގެ ނޭދެވޭ އަސަރު ކުރާކަމެވެ. ވީމާ އެންމެ ގާތް މީހުންނާއިވެސް ދިރިއުޅުމުގެ ހުރިހާ އުފާތަކެއް ހިއްޞާނުކުރާށެވެ! ކިތަންމެ ގާތް އެކުވެރިއެއް ނަމަވެސް ވަކި އިމެއްގައި ބަހައްޓާށެވެ!
- އިސްލާމީ ތިލަފަތުގެ ދަރުސަކުން
