ރޭގެ ފަތިސް ނަމާދަކީ އެމިސްކިތުގެ އަހުލުވެރިންނަށް ވަރަށް އާދައާޚިލާފް ނަމާދަށްވެގެންދިއައެވެ. އެހެނީ ކޮރޯނާ ރާއްޖެއައިފަހުން މިސްކިތުގެ ނަމާދުވަގުތު އަންގައިދޭ ގަޑިން ގަމަތްދިނުމަށް އެލާމްވާނީ ފަތިސްނަމާދުވަގުތުވުމުން އެ މިސްކިތުގައި ބަންގި ގޮވައި ސުންނަތްކޮށް ނަމާދުވެސް ފަށައި ދިގުކޮށް ކިޔަމުން މިގެންދާ ޤުނޫތު ނިމެންގާތްވެފައިވަނިކޮށެވެ.
މިކަމަށް ހެކިވެވަޑައިގަންނަވާނެ އެއް ބޭފުޅަކީ ފަޟީލަތުއްޝައިޚް ޢަލީ ޒާހިރު ބިން ސަޢީދު ޤާސިމްއެވެ.
އެންމެ ރެއަކު ނޫނެވެ. ހަމަކޮންމެ ރެއަކުއެވެ. މައުލޫމާތު ލިބެނީ ރަވާތިބު ސުންނަތްކުރަން ފުރުޞަތުދީ ސުންނަތާއި އެއްގޮތަށް ފަތިސްނަމާދު ކުޑަކޮށް ދިގުކޮށްލައިފިނަމަ ކޮރޯނާ ވަދެގަނެ އެންމެން އަތުލައިގެންފާނެކަމުގެ ބިރަށް އިސްލާމިކް މިނިސްޓްރީން އަންގާފައި އޮންނަ ގޮތަށް ރައްކައުތެރިކަމުގެ ފިޔަވަޅުތައް އަޅަނީ ކަމަށެވެ.
ރޭ އިމާމްވެ ފަތިސްނަމާދުކުރީ ބަދަލުގައި ދިއަ އިމާމެކެވެ. ޤަމަތް ދިނީ ހަމަ ޤަމަތް ދިނުމުގެ އެލާމް ގަޑިއެޅުމުންނެވެ. ކިޔެވީ ވެސް ސުންނަތާއިއެއްގޮތަށް މެދުމިނަށެވެ. އެހެންކަމުން މިސްކިތުގެ އަހުލުވެރިންނަށް އިޙްޞާޞްކުރެވުނީ ކުޑަވަރެއްގެ ޢީދެއްގެ ގޮތުގައެވެ. އިމާމަށް ހެޔޮ ރަޙްމަތް ލެއްވެވުން އެދި ގިނަ ބައަކު ދުޢާވެސް ކުރިއެވެ.
ކޮންމެއަކަސް ރޭ އެމިސްކިތުގައި ފަތިސްނަމާދުކުރި އެއްވެސް މީހަކުގެ ބަލިހާލު މިވަގުތާއި ހަމައަށް ބޮޑުވިކަމެއް އަދި އެނގިފައެއް ނުވެއެވެ. އިރާދަކުރެއްވިއްޔާ ކޮރޯނާއަށް އެއިން ހަމައެކަުވެސް އަތުލައެއ ނުގަނެވޭނެއެވެ. އިން ޝާ ﷲ. އެމިސްކިތުގައި ރޭ ފަތިސްނަމާދު ކުރި އެއްވެސް މީހަކަށް ކުރިއަށް މިއޮތް 15 ދުވަހުގެ ތެރޭގައި ކޮރޯނާ ޖެހިއްޖެ ނަމަ އެކަން މިއަދުނޫހާއި ޙިއްޞާކޮށްލަދެއްވުން އެދެމެވެ. (ފޯން: 7788020)
އެމިސްކިތަކީ 70 ނަންބަރުކުރިމަތީ މަޖީދީމަގުގައި ހުންނަ މިސްކިތެވެ!
