ފުރިހަމަ ގޮތުގައި އަޅުކަންކުރަން ބޭނުންވާ މީހަކުނަމަ ވަރަށް ބޮޑަށް ސަމާލުކަން ދޭންޖެހޭނެ 2 ކަމެއް ވެއެވެ. ފުރަތަމަކަމަކީ އެކަމަކަށް ދޭންޖެހޭ ސަމާލުކަން ދީގެން ވީހައި ބޮޑަށް އެއް އުޞޫލަކުން ކުރަމުން ގެންދިއުމެވެ. ދެވަނަ ކަމަކީ އެއްފަހަރަށްވުރެ އަނެއްފަހަރު ކުރާ އަޅުކަން ފުރިހަމަކުރަން ގަދައަޅައި މަސައްކަތްކުރުމެވެ.
މި ދެ ކަންތައް ވެސް ނުކުރެވެނީ ޝައިޠޯނާގެ ސަބަބުންނެވެ. ހިތާއި ސިކުނޑީގައި ވަޒަންވެރިވެގެން ދިރިއުޅޭތީއެވެ. މިފަދަ ހާލަތަށް ވަކިހިއްޕާލުންވެސް ކޔައިފާނެއެވެ.
ކޮންމެއަކަސް ކޮންމެ މީހަކު ނަމަވެސް ހެޔޮ ޢަމަލެއް ކުރަން މަސައްކަތްފެށި ނަމަވެސް އެކަމެއްގެ ތެރެއަށް ޝައިޠޯނާ ވަދެގަންނާނެއެވެ. މީހާގެ ވިސްނުން މުޅިން ތަފަތު ކަންކަމަށް ބަދަލުކުރުވާނެއެވެ. އެގޮތުން ވިސްނައި ނުދޭނީ ކޮން ކަމެއް ހެއްޔެވެ؟ އެމީހަކު އެންމެ ކުރަން ޝައުޤުވެރިވާ ކަންކަން ޙާޞިލކުރެވުމުން އަމަލުކުރާނެ ގޮތާ ދައްކާނެ ފޮނިކަންވެސް އެބަ ހިތަށް ވައްދުވައެވެ.
ލޯބި ހުށަހެޅުމުން ޤަބޫލުނުކޮށްގެން އުޅޭ އަންހެނާ އާއި ކައިވެނިކުރެވުމުން ދިރިއުޅޭނެ އުފާވެރިކަން ހިތަށް ވައްދުވައެވެ. އަތުގައި އެންމެ ފައިސާފޮތްޗެއް ނެތް މީހާ މިލިއަނަރަކަށްވެގެން އުދުހޭ މަންޒަރު އެބަ ހިތަށް ވައްދުވައެވެ.
މީސްތަކުންނޭވެ! އޮތީ ހަމަ އެންމެ މަގެކެވެ. އެއީ ޝައިޠޯނާގެ ކިބައިން ސަލާމަތްކަން ލިބިގަންނަން މަސައްކަތްކުރުމެވެ. އެކަމަށް އެދި ކޮންމެ ހެޔޮ އަމަލެއް ކުރަން ފެށުމުގެ ކުރިންވެސް ބިސްމިﷲ ކިޔަންވާނެއެވެ. އަދި އެ އަމަލެއް ﷲ ތަޢާލާ ޤަބޫލުފުޅު ކުރައްވަވާ ފެންވަރުގައި ކުރުމުގެ ކުޅަދާނަކަން ދެއްވެވުން އެދ ދުޢާކުރަންވާނެއެވެ! އަދި ޢަމަލަކޮށް ނިމުމުން އެ އަމަލު ޤަބޫލުފުޅު ކުރެއްވެވުން އެދި ދުޢާކުރަންވާނެއެވެ. ޞަޙާބީން ޢަމަލުކުރެއްވެވީ މިފަދައިންނެވެ.
- އިސްލާމީ ތިލަފަތުގެ ދަރުސަކުން
