ބޭރުން ދަރިން ގެއަށް އަންނަނީ އެގެއެއްގެ މީހަކު ގެންދިއުމުންއެވެ. ގޭގެ މީހަކު ނުގެންދާނަމަ އެއްވެސް އަންހެނަކުވެސް ފިރިހެނަކުވެސް ދަރިއެއްގެ ގޮތުގައި އެއްވެސް ގެއަކަށް ނުދާނެއެވެ! މިބުނި ބަހުގެ މާނައަކީ ގޭގެ ދަރިއަކު ނުވަތަ އެނޫންވެސް މީހަކު ކައިވެނިކޮށްގެން ގެންދިއުމުން ނޫނީ އެއްވެސް އަންހެން ކުއްޖަކުވެސް ފިރިހެން ކުއްޖަކުވެސް އެގެއެއްގެ ދަރިއެއްގެ ދަރިޖަ ލިބިގެން އެއްވެސް ގެއަކަށް ނުދާނެކަމެވެ.
މިހާރަކަށް އައިސް އެންމެ ގިނައިން މީހުން ކުރާ އެއް ޝަކުވާއަކީ ކައިވެނިކޮށްގެން ގެންދިއުމަށްފަހު ނިކަމެތިކޮށް ހިތުމުގެ ޝަކުވާއެވެ. މާދަށުދަރަޖައިގެ މީހެއްގެ ގޮތުގައި ދެކި އަޅަކަށް ހަދައިގެން ގެންގުޅޭ ވާހަކައެވެ. އެއްވެސް ކަމެއްގައި ރަޙުމާއި ލޯބި ނުލިބޭވާހަކައެވެ. ގޭގެވެރިންގެ ފަރާތުން ނުބައި ބަސްތައް ރައްދުވާ ވާހަކައެވެ.
މިފަދަ އަމަލުތައް ކުރާމީހުން ފުރަތަމަވެސް ވިސްނައިލަންވީ ތިމާގެ އަންހެން ދަރިފުޅު ނުވަތަ ފިރިހެން ދަރިފުޅު އެހެން ގެއަކަށް ދިއުމުން އެދަރިފުޅަށް އެގެއަކުން ދެރަ ނިކަމެތި ގޮތްތައް ހަދާނަމަ ތިމާއަށް ކުރާނެ އަސަރާއިމެދުގައެވެ. އެހެން މީހެއްގެ ދަރިއަކަށް ތިމާ އެފަދަ ކަންކަން ކުރާއިރު ހިތަށް ގެންނަންވީ މިބުނިފަދައިން ތިމާގެ އަމިއްލަ ދަރިފުޅާއިމެދު އެހެން ބައަކު ދެރަކޮށް ހިތުމުން ތިމާއަށް ކުރާނެ އަސަރާއިމެދުގައެވެ. ވިސްނައިލަންވީ ތިމާގެ ދަރިން ދެކެ ތިމާ ލޯބިވާވަރަށް އެހެން މީހުންވެސް އެމީހުންގެ ދަރިން ދެކެ ލޯބިވާނެ ކަމެވެ.
ދަރިއެއްގެ ދަރަޖަދީގެން ގެއަށް ގެންދިއުމަށްފަހު އަމިއްލަ ދަރިންނާއި އެއްވެސް ވަރަކަށް ތަފާތު ނުކުރާށެވެ! ގެއަށް ބޭރުން ގެނެވޭ އަންހެން މީހާއަށްވެސް އަދި ފިރިހެން މީހާއަށްވެސް ހެޔޮކޮށްހިތުމަކީ އަޅުކަމެކެވެ. އެއްވެސް ހާލެއްގައި ގެއަށް ބޭރުން ގެނެވޭ މީހާއަކީ ތިމާމެންނަށްވރެ ދެރަ ނިކަމެތި މީހަކުކަމުގައި ދެކެގެން ނުވާނެއެވެ! ބޭރުން އައީތީ އެމީހަކަށް ދެރަކޮށް ހިތައި ނިކަމެތިކޮށްގެން ނުވާނެއެވެ!
ގެއެއްގެ އަހުލުވެރިންގެ ސަބަބުން ގޭގައި އުޅޭ މީހަކަށް ހިތާމައާއި ހިތްދަތިކަން ލިބޭނަމަ އެމީހަކު ހިތާމަކޮށް ކަރުނައަޅާނެއެވެ. އެ ކަރުނައިގެ ސަބަބުން ގޭގެ ބަރަކާތް ކެނޑިގެންދިއުމަކީ ދުރުކަމެއް ނޫނެވެ! ﷲ ތަޢާލާގެ ރަޙްމަތްފުޅުން އުނިވުމަކީވެސް ހަމަ ވުން އެކަށީގެންވާ ކަންކަމެވެ. ވީމާ ގެއަށް ބޭރުން ގެނެވޭ މީހުންނަށް ހެޔޮކޮށް ހިތާށެވެ! އެކަމުގެ ސަބަބުން ﷲ ތަޢާލާގެ ރަޙްމަތް އިތުރުވުމަށް އުންމީދުކުރާށެވެ!
ހިތާމައަކީ މިފަދަ ކަންކަމަށް ވިސްނައި ނުލެވޭކަމެވެ. އަދި އެކަންކަމަށް ވިސްނައިނުލުމުން ޚުދު ތިމާމެންގެ ދިރިއުޅުން ހަލާކުވެ، ނިކަމެތިވެގެންދާކަންވެސް ވިސްނައިނުލެވޭ ކަމެކެވެ. އެއީ ވަރަށް ހިތާމަހުރިކަމެކެވެ.
ގޭގެ މަސައްކަތްކުރަން މުސާރަދީގެން ގެންނަ މީހުންނަށްވެސް ހެޔޮކޮށްހިތަންޖެހެއެވެ. އެމީހުންގެ ޙައްޤުތައް ފުރިހަމަކުރަންޖެހެއެވެ. ވީއިރު ބޭރުން ގެއަށް ގެނެވޭ ދަރިންނަށް ހެޔޮކޮށްހިތައި އެމީހުންނަށް އުފާވެރިކަން ހޯދައިދޭން މަސައްކަތްކުރަންޖެހޭނެ މިންވަރަށް ވިސްނާށެވެ!
ވީމާ އެދަރިންނަށް ނުއުފުލެވޭވަރުގެ ތަކްލީފްތައް ނުޖައްސާށެވެ! އަމިއްލަދަރިންނާއި ހަމަކުރާށެވެ! އެހެން މީހަކަށް ހެޔޮކޮށް ހިތައި ހިނިތުންވުން ގެނެސްދޭން މަސައްކަތްކުރާ މީހާއަށް ނުވަތަ ބައަކަށް ﷲ ތަޢާލާ ރަނގަޅު ގޮތްތައް މިންވަރުކުރައްވަވާނެތެވެ! އުފާވެރިކަން ދެއްވަވާނެތެވެ! އިން ޝާ ﷲ
މިމޭރުމުން މިކަންކަން މީގެކުރިންވެސް ވާނީ އެތައް ފަހަރަކު ފާހަގަކޮށްފައެވެ. އެތައް ދަރުސެއްގައި މިނަޞޭޙަތް ދީފީމެވެ. ހިތާމައަކީ ލިބޭ ޝަކުވާ މަދުނުވާކަމެވެ. އެކަމުން އެނގެނީ މިފަދަ މައްސަލަތައް މަދުނުވާކަމެވެ. އެހެންކަމުން އަދިވެސް ބުނަން އޮތީ މިކަންކަމަށް ވިސްނާށެވެ. ކަންކަން މިބުނެދިން މަގުން އިޞްލާޙްކޮށް ދަރުމަ ލިބިގަންނާށެވެ!
- މުފްތީ މެންކުގެ ދަރުސަކުން
