ﷲ ތަޢާލާ ލޯބިވެވޮޑގެން ނުވަނީ ފާފަކުރުމަށެވެ. ފާފަ ފުއްސަވައި ދެއްވެވުމަށް ލޯބިވެވޮޑިގަންނަވައެވެ.
ޙަދީޘްފުޅުން އެނގެން އެބައޮތެވެ. އޭނާއަކީ ފާފަކުރެވޭ މީހެކެވެ. ނަމަވެސް ފާފައެއް ކުރެވޭއިރަށް އިސްތިޣްފާރުކުރެއެވެ. ކުރެވުނު ފފަ ފުއްސަވައިދެއްވެވުން އެދި ދަންނަވައެވެ. އެމީހާ 10 ވަނަ ފަހަރު އޭނާގެ ފާފަ ފުއްސަވައި ދެއްވެވުން އެދި ދެންނެވުމުން މަލާއިކަތުން ހެކިކުރައްވަވައި އޭނާގެ ފާފަފުއްސަވައިދެއްވެވިއެވެ.
ކިތަންމެ ކުޑަ ހުސްވަގުތުކޮޅެއް ލިބުނު ނަމަވެސް އަސްތަޣްފިރުﷲ ކިޔައިލާށެވެ! ފަސޭހަ އަދަދަކަށެވެ. އެއިރުން އެނގިގެން އެދަނީ އޭނާގެ ނިކަމެތިކަން އޭނާ ޤަބޫލުކުރާކަމެވެ. އޭނާގެ ފާފަތައް ފުއްސވައި ނުދެއްވަވައިފިނަމަ ސަލާމަތްވެވޭނެ މަގެއް ނެތްކަން ޤަބޫލުކޮށް ﷲ ތަޢާލާއަށް ބިރުވެތިވާކަމެވެ.
މީސްތަކުންނޭވެ! ފާފަކުރެވޭނެއެވެ. މުހިންމީ ފާފައެއް ކުރެވިއްޖެނަމަ ވަގުތުން އިސްތިޣްފާރުކޮށް ކުރެވުނު ފާފަ ފުއްސަވައި ދެއްވެވުން އެދި ދެންނެވުމެވެ. އަދި ވިއްދައިގެން ހެޔޮ ޢަމަލެއް ކުރުމެވެ. އެހެނީ ހެޔޮ ޢަމަލުކުރުމަކީ ފާފަފުހެވޭ އެއްކަންތަކެވެ. އެކަން ޙަދީޘްފުޅުން އެނގެން އެބައޮތެވެ.
މީސްތަކުންނޭވެ! ކޮންމެ ކަމަކަށް ބޭނުންވި ނަމަވެސް އިސްތިޣްފާރުކުރުން ގިނަކުރާށެވެ! އެކަމުގެ ސަބަބުން ނުލިބޭނެ ނިޢްމަތެއް ނެތެވެ. އެހެނީ ފާފަފުއްސަވައިދެއްވެވުން އެދި ދެންނެވުން ގިނަކުރިވަރަކަށް ﷲ ތަޢާލާގެ ލޯބިވެވޮޑިގަތުން އިތުރުވެއެވެ. ﷲ ތަޢާލާގެ ލޯބިވެވޮޑިގަތުން ލިބިއްޖެ ނަމަ އެމީހެއްގެ ބޭނުންތައް ދުނިޔެއާއި އާޚިރަތުގައިވެސް ފުއްދަވައިދެއްވަވާނެތެވެ! އިން ޝާ ﷲ
- އިސްލާމީ ތިލަފަތުގެ ދަރުސަކުން
