މަރަކީ ބިމުގައިވާ ކޮންމެ މަޚްލޫޤެއްގެ ނިމުމެވެ. އަދި އެއީ މިދުނިޔޭގައި ދިރިހުރި ކޮންމެ އެއްޗެއްގެ ވެސް ނިމުމެވެ. ﷲ ތަޢާލާ ވަޙީކުރެއްވިއެވެ.
﴿كُلُّ مَنْ عَلَيْهَا فَانٍ [26] وَيَبْقَى وَجْهُ رَبِّكَ ذُو الْجَلَالِ وَالْإِكْرَامِ [27]﴾ [الرحمن: 26، 27]
މާނައީ: "އެ ބިންމަތީގައިވާ ކޮންމެ އެއްޗަކީ، ފަނާވެދަނިވި އެއްޗެކެވެ. [26] އަދި ކަލޭގެފާނުގެ ވެރި، ކީރިތިވަންތަކަމާއި، މާތްވަންތަކަމުގެ ވެރިރައްބުގެ ވަޖުހުފުޅު ދެމިވޮޑިގެންވެއެވެ. [27]"
މަރަކީ ދުނިޔޭގެ ޙަޔާތުގެ ނިމުމެވެ. އަދި އާޚިރަތުގެ ގޮވަތީގެ ފެށުމެވެ. އެހިސާބުން ދުނިޔޭގެ ޙަޔާތާ ގުޅުން ކެނޑެއެވެ. ބޮޑުވެގެންވާ ނިޢުމަތް ނުވަތަ ވޭންދެނިވި ޢަޛާބު މަރުވުމަށްފަހު ފެންނާނެއެވެ.
މަރަކީ ﷲ عزّ وجل ގެ ކުޅަދުންވަންތަކަމާ އަދި އެއިލާހުގެ މަޚްލޫޤުންގެ މައްޗަށް ގަދަވެވޮޑިގެންވާކަން ދަލީލުކުރާ އާޔަތްތަކުގެ ތެރެއިން އާޔަތެކެވެ. ﷲ ތަޢާލާ ވަޙީކުރެއްވިއެވެ.
﴿وَهُوَ الْقَاهِرُ فَوْقَ عِبَادِهِ وَيُرْسِلُ عَلَيْكُمْ حَفَظَةً حَتَّى إِذَا جَاءَ أَحَدَكُمُ الْمَوْتُ تَوَفَّتْهُ رُسُلُنَا وَهُمْ لَا يُفَرِّطُونَ﴾ [الأنعام: 61]
މާނައީ: "އަދި އެއިލާހީ، އެއިލާހުގެ އަޅުތަކުންގެ މައްޗަށް ގަދަވެވޮޑިގެންވާ އިލާހެވެ. އެއިލާހު ތިޔަބައިމީހުންގެ މައްޗަށް ރައްކާތެރިކުރަނިވި މަލާއިކަތުން ފޮނުއްވަވަތެވެ. ތިޔަބައިމީހުންގެ ތެރެއިން މީހެއްގެ ގާތަށް މަރު އަތުވެއްޖެނަމަ، އެހިނދު ތިމަންއިލާހު ފޮނުއްވަވާ މަލާއިކަތުން އެމީހެއްގެ ފުރާނަ ހިއްޕަވަތެވެ. އެ މަލާއިކަތުން (އެކަމުގައި) ލަހެއް ފަހެއް ނުކުރައްވާނެތެވެ".
މަރަކީ ﷲ ސުބުޙާނަހޫ ވަތަޢާލާގެ ޢަދުލުވެރިކަމުގެ ތެރެއިންވާ ކަމެކެވެ. ހުރިހާ މަޚްލޫޤުން އެކަމުގައި ހަމަހަމަ ވެގެންވެއެވެ. ﷲ ތަޢާލާ ވަޙީކުރެއްވިއެވެ.
﴿كُلُّ نَفْسٍ ذَائِقَةُ الْمَوْتِ ثُمَّ إِلَيْنَا تُرْجَعُونَ﴾ [العنكبوت: 57]
މާނައީ: "ކޮންމެ ނަފްސަކީވެސް، މަރުގެ ރަހަ ލިބިގަންނާނޭ އެއްޗެކެވެ. ދެން ތިޔަބައިމީހުން އެނބުރި ރުޖޫޢަކުރައްވާހުށީ، ތިމަންއިލާހުގެ ޙަޟްރަތަށެވެ"
- الشيخ علي بن عبد الرحمن الحذيفي – حفظه الله
