މުސްލިމުންނަކީ ރަމަޟާންމަހުގެ ތަރާވީޙް ނަމާދަށާއި ދަމުނަމާދަށް ވަރަށް ބޮޑަށް ސަމާލުކަންދޭބައެކެވެ. ދަމުނަމާދު ނުކުރެވޭ މީހުންވެސް ތަރާވީޙްކުރަން ސަމާލުކަންދެއެވެ. ހުކުރު ދުވަހުގެ ހުކުރުނަމާދަށް ސަމާލަށް ސަމާލުކަންދޭފަދައިން ތަރާވީޙް ނަމާދަށް ގިނަ ބައަކު ސަމާލުކަންދެއެވެ.
ވިސްނައިލަންވީކަމަކީ ރަމަޟާންމަހު ތަރާވީޙްކުރަން ސަމާލުކަންދިން ފަދައިން ރަމަޟާންމަހަށްފަހުގައިވެސް ރޭއަޅުކަމަށް ސަމާލުކަންދޭންވާނެއެވެ. އެގޮތުން ކޮންމެ މީހަކުވެސް ތަރާވީޙް ނަމާދަށް ސަމާލުކަންދިންފަދައިން އެންމެ ކުޑަމިނުން ވިތުރިގެ 3 ރަކްޢަތްކުރާށެވެ. ދަންވަރު ހޭލައިގެން ކުރަން އުނދަގޫމީހުން ޢިޝާ ނަމާދަށްފަހު ވިތުރިކުރާށެވެ. ވިތުރި ނުކޮށް ނުނިދަން ރަސޫލް ﷺ ކުރައްވަވާފައިވާ ވަޞިއްޔަތްފުޅަށް ޢަމަލުކުރާ ބައަކު ކަމުގައިވާށެވެ!
މަސްޖިދުއްނަބަވީގެ އިމާމް الشيخ عبد الله بن عبد الرحمن البعيجان حفظه الله ވިދާޅުވެފައިވެއެވެ.
"އޭ ﷲ ގެ އަޅުތަކުންނޭވެ! ތިޔަބައިމީހުން ރަމަޟާން މަހަށް އަލްވަދާޢު ކިޔައިފިއެވެ.
އެއަށްފަހު ﷲގެ މަގުގައި ޘާބިތުވާށެވެ. އަދި އެއިލާހާ ކުއްތަންވާށެވެ. ކިޔަމަންތެރިކަން އަދާކުރުމުގެ މަތީގައި ސާބިތުވުމަކީ ޢަމަލު ޤަބޫލުވިކަމުގެ ޢަމާލާތްތަކުގެ ތެރެއިންވާ ކަމެކެވެ. އަދި އަޅަކު، ﷲ އާ ކުއްތަންވުމަށްޓަކައި ކުރާ ޢަމަލުތަކުގެ ތެރެއިން، އެއިލާހުގެ ޙަޟްރަތުގައި އެންމެ ލޮބުވެތިކަން ބޮޑު ޢަމަލަކީ އޭނާގެ މައްޗަށް އެއިލާހު ފަރުޟުކުރެއްވި ކަންތައްތަކެވެ. އަދި ސުންނަތްތައް އަދާކުރުމުގެ މަތީ އެއަޅާ ދެމިހުރިހާ ހިނދަކު، އެއަޅާ އެއިލާހާ ކުއްތަންވަމުންދެއެވެ. އެއީ އެއިލާހު އެއަޅާދެކެ ލޯބިވެވޮޑިގެންފުމަށް ދާންދެނެވެ.
ފަހެ، ފަރުޟުތަކަށް ރައްކަތެރިވާށެވެ. އަދި ޤުރުއާން ދޫކޮށްނުލާށެވެ. އަދި ރޭއަޅުކަމަށް ފަރުވާތެރިވާށެވެ."
މިސްބްފުޅުން ފާހަގަކޮށްލާށެވެ!
- ﷲގެ މަގުގައި ޘާބިތުވާށެވެ. އަދި އެއިލާހާ ކުއްތަންވާށެވެ. ކިޔަމަންތެރިކަން އަދާކުރުމުގެ މަތީގައި ސާބިތުވުމަކީ ޢަމަލު ޤަބޫލުވިކަމުގެ ޢަމާލާތްތަކުގެ ތެރެއިންވާ ކަމެކެވެ.
- އަދި އަޅަކު، ﷲ އާ ކުއްތަންވުމަށްޓަކައި ކުރާ ޢަމަލުތަކުގެ ތެރެއިން، އެއިލާހުގެ ޙަޟްރަތުގައި އެންމެ ލޮބުވެތިކަން ބޮޑު ޢަމަލަކީ އޭނާގެ މައްޗަށް އެއިލާހު ފަރުޟުކުރެއްވި ކަންތައްތަކެވެ.
- އަދި ސުންނަތްތައް އަދާކުރުމުގެ މަތީ އެއަޅާ ދެމިހުރިހާ ހިނދަކު، އެއަޅާ އެއިލާހާ ކުއްތަންވަމުންދެއެވެ. އެއީ އެއިލާހު އެއަޅާދެކެ ލޯބިވެވޮޑިގެންފުމަށް ދާންދެނެވެ.
