ބައެއް ފަހަރު ކަންކަން ކުރިމަތިވާ ގޮތުން ރިޒްޤް ލިބުމަށް ދަތިވެއެވެ. މާލީ ގޮތުން ދަތިތައް ކުރިމަތިވުމުންނެވެ. ވަޒީފާ ގެއްލުމާއި ލިބޭ އާމްދަނީ މަދުވުން ފަދަ ކަންކަމުގެ ސަބަބުންނެވެ.
މިފަދަ ޙާލަތެއް މެދުވެރިވެއްޖެނަމަ އެކަމުގެ އަސަރު ގޭގެ އެންމެންނަށްވެސް ކުރިމަތިވެއެވެ. ވީމާ އެންމެންވެސް އެކަންކަން ހައްލުކޮށްދެއްވެވުން އެދި ދުޢާކުރުން ގިނަކުރާށެވެ! އަދި ގޭގެ އެންމެން އެކުގައި ތިބެ ﷲ ތަޢާލާ ހަނދުމަކޮށް ޛިކުރުކޮށް ދުޢާކުރާށެވެ! އެފަދަ މަޖިލިސްތަކުގައި މަލާއިކަތުންގެ ފައުޖުތައް ބައިވެރިވެވަޑައިގެން އެބައަކަށްޓަކައި ހެޔޮދުޢާކުރައްވަވަތެވެ!
ގިނަގިނައިން ﷲ ތަޢާލާ ހަނދުމަކުރުމަކީ ކޮންމެހެން ކުރަންޖެހޭ ކަމެކެވެ. އެކަމުގެ ސަބަބުން އެމީހަކަށް އެތައް ގިނަ ރަޙްމަތެއް މިންވަރުކުރައްވަވާ ކަމެކެވެ. މަޖިލިސްތަކުގައި ﷲ ތަޢާލާ ހަނދުމަކުރުމަކީ ރަޙްމަތް އެތައް ގުނައަކަށް އިތުރުކުރައްވަވާ ކަމެކެވެ.
ވީމާ ރިޒްޤް ދަތިވުން ފަދަ ޙާލަތެއް މެދުވެރިވެއްޖެ ނަމަ ގޭގެ އެންމެން ވެސް ދުޢާކުރަންވާނެއެވެ. އަދި ގޭގެ އެންމެން އެކުގައި ތިބެގެންވެސް މިބުނިމަގުން ކަންކަން ކުރަންވާނެއެވެ. މަލާއިކަތުންގެ ދުޢާ އާއިއެކު ރަޙްމަތް އިތުރުެވެގެންދާނެއެވެ. އިން ޝާ ﷲ
- ޝައިޚް އަބޫބަކުރު ޒައުދުގެ ދަރުސަކުން
