ސުވަރުގެ ދިއުމަށް މަސައްކަތް ކުރާ ކޮންމެ މީހަކަށް ވެސް ސުވަރުގެ ދެވޭނެއެވެ. ސުވަރުގެއިން ދަރަޖަ ލިބޭނީ އެމީހަކު ދުނިޔޭގައި ހުރެ ކުރި މަސައްކަތަކާއި އެއްވަރަށެވެ. އެހެންކަމުން އެންމެންނަށް ސުވަރުގޭގެ އެންމެ މަތީ ދަރަޖަ ޖަންނަތުލްފިރްދައުސް ނުލިބޭނެއެވެ. ނަމަވެސް ސުވަރުގެ ހޯދަން މަސައްކަތްކުރި ކޮންމެ މީހަކަށްވެސް ސުވަރުގެ ލިބޭނެއެވެ. އެމީހަކު މަސައްކަތްކުރި މިންވަރެއްގެ ނިޞްބަތުންނެވެ. ވީމާ ސުވަރުގެ ހޯދަން މަސައްކަތް ކުރި އެއްވެސް މީހަކު މާޔޫސްވާކަށް ނުޖެހޭނެއެވެ.
އަހަރެމެން ދުނިޔޭގައި ތިބެ ކިތަންމެ ގިނައިން ޛިކްރް ކުރި ނަމަވެސް ﷲ ތަޢާލާގެ މަތިވެރިކަން އެއްވެސް ވަރަކަށް އިތުރެއް ނުވާނެއެވެ. އެހެނީ ﷲ ތަޢާލާ އަށް އަބަދުވެސް ވަނީ އެންމެ މަތިވެރިކަން ލިބިވޮޑިގެންފައެވެ. އަހަރެމެން އަޅުކަންކޮށް ޛިކުރުކުރުމުން އެކަމުގެ ފައިދާ އޮތީ އަހަރެމެންނަށެވެ. އެކަންކަމުގެ ސަބަބުން އަހަރެމެންނަށް ސުވަރުގެ ވަދެވޭނެތީއެވެ.
ވިސްނައިލާށެވެ! ކޮންމެ ޤައުމެއްގައި ނަމަވެސް އެ ޤައުމެއްގެ ޤާނޫނު އަސާސީ އާއި ޚިލާފުވުމުން ޤާނޫނު ނުއެނގޭ ކަމަށް ބުނެގެން ސަލާމަތް ވެވޭނެ ހެއްޔެވެ؟ ނުވެވޭނެއެވެ. ޤާނޫނުތައް ދަސްކޮށް އަމަލުކުރުމަކީ އެމީހެއްގެ ޒިންމާއެކެވެ. ހަމަ އެފަދައިން އެއްވެސް މީހަކަށް ކީރިތި ޤްރްއާނުގައި ބަޔާންވެގެންވާ ކަންކަން އަދި ރަސޫލް ﷺ ގެ ސުންނަތް ނުއެނގޭ ކަމަށް ބުނެގެން ސަލާމަތެއް ނުވެވޭނެއެވެ. ކިޔައި ހޯދައި އުނގެނުމަކީ ކޮންމެ މީހެއްގެވެސް ޒިންމާއަކަށްވާތީއެވެ.
އަހަރެމެންނަށް އޮތީ އަހަރެމެންގެ ޒިންމާ އަދާކުރުމެވެ. އަހަރެމެންގެ ޒިންމާ އަދާކޮށްފިނަމަ ސުވަރުގެ ދެވޭނެއެވެ. އެއްވެސް މީހަކާއިމެދު ޒައްރެއްގެ މިންވަރުންވެސް ބޭ އިންޞާފެއް ނުކުރައްވަވާނެއެވެ.
ވަރަށް ގިނައިން މީހުން ކުރާ ސުވާލެވެ. ﷲ ތަޢާލާ ދުނިޔެ އުފެއްދެވި އިރުވެސް އަދި މީސްތަކުން ދުނިޔޭގައި ލެއްވެވިއިރުވެސް އެއިގެ ތެރެއިން ގިނަ ބައަކު ދާނީ ނަރަކައަށްކަން ދެނެވޮޑިގެންވެ ހުންނަވައި މީސްތަކުން އުފެއްދެވީ ކީއްވެގެން ހެއްޔެވެ؟ އެންމެ މީހަކު ނަމަވެސް ނަރަކައަށް ދިއުމަށް އިރާދަކުރައްވަވަނީ ކީއްވެގެން ހެއްޔެވެ؟
މިފަދަ ސުވާލުތައް ކުރަނީ އިސްލާމް ދީން ރަނގަޅަށް ނުއެނގޭތީއެވެ. ﷲ ތަޢާލާ ކޮންމެ މީހަކު ވެސް އުފެއްދެވީ މަލާއިކަތުންނަށްވުރެ މާތް ކުރައްވަވައެވެ. އެހެނީ އަމިއްލަފުޅަށް އެއްވެސް ކަމެއް ކުރެވުމުގެ އިޚްތިޔާރު މަލާއިކަތުންނަށް ދެއްވަވާފައެއް ނުވެއެވެ. އިންސާނުންނަށް މިވަނީ މަލާއިއިކަތުންނަށްވުރެ މާތް ކުރައްވައި އެ މީހަކު ބޭނުން މަގެއް އިޚްތިޔާރު ކުރުމުގެ ފުރުޞަތު ދެއްވަވައިފައެވެ.
އިންސާނުން ކުށް ކުރުމުން އަދަބު ދެއްވަވަނީ ކުށް ނުކުރުމުގެ ފުރުޞަތު ދެއްވަވައިފައެވެ. ކުށް ނުކޮށް އުޅުމުގެ ބުއްދިއާއި ފިކުރުވެސް ދެއްވަވައިފައެވެ. މޮޔައިން ކުރާ ކަންކަމަކަށް ﷲ ތަޢާލާ އަދަބެއް ނުދެއްވަވައެވެ. މާނައަކީ އެއްވެސް އަޒާބެއް ނުދެއްވަވައެވެ.
- ޑރ. ޒާކިރު ނައިކުގެ ދަރުސަކުން
