އެންމެ ފައިދާހުރި ވިޔަފާރިކަމަށް ގިނަ ބައަކު ދެކެނީ އެންމެ ގިނަ ފައިށާ ޖީބަށް ވެއްދޭ ވިޔަފާރިއެވެ. ނަމަވެސް ކަމުގެ ޙަޤީޤަތަކީ އެއީއެއް ނޫނެވެ. ކުރެވޭ އެންމެ ފައިދާހުރި "ވިޔަފާރި"އަކަށް ވާނީ މިދުނިޔޭގައި އަގު ދައްކައި އާޚިރަތް ދުވަހުން މުދައު ލިބޭ ގޮތަށް ކުރެވޭ ވިޔަފާރިއެވެ. މާނައަކީ އާޚިރަތް އެދިގެން ކުރާ ހެޔޮ ޢަމަލުތައްކަމެވެ.
ގިނަ ބައަކު އާޚިރަތް ދުވަހު ނުހަނު ބޮޑު ޘަވާބު ލިބޭނެ ޢަމލުތައްކރުމަށްފަހު އެކަން އެބަ އަމިއްލައަށް ނަގައިލައެވެ. މިސާލަކަށް "އަހަރެންނަށް ޖެހެނީ އަބަދުވެސް އެހެން މީހުންނަށް ކަންކަން ކޮށްދޭށެވެ. ނަމަވެސް އެއްވެސް މީހަކު އަހަރެންނަށް ހަމަ އެއްވެސް ކަމެއް ކޮށެއް ނުދެއެވެ. މިއީ ދެން އިންޞާފެއް ހެއްޔެވެ؟ އަބަދުވެސް ކަންކަން ކޮށްދޭން ޖެހެންވީ އަހަރެންނަށް ހެއްޔެވެ؟" މިފަދަ ބަސްތައް ބުނާ މީހުން އުޅެއެވެ. މިއީ އެމީހުންގެ ހިތުގައި އުފެދޭ ޝުޢޫރުތަކެކެވެ. އުފެދޭ ސުވާލުތަކެކެވެ.
ކަމުގެ އަސްލަށް ބަލައިލަމާ ހެއްޔެވެ؟ ފުރަތަމަ ކަމަކީ ތިބާ އެއްވެސް މީހަކަށް އެއްވެސް ކަމެއް ކޮށްދޭން ޖެހޭނީ އެމީހެއްގެ ކިބައިން އެއްވެސް ކަމަކަށް އެދިގެނެއް ނޫނެވެ. ހަމަ ﷲ ތަޢާލާއަށްޓަކައެވެ. ވީމާ އެއްވެސް މީހަކު ތިބާއަށް ކަމެއް ކޮށްނުދީގެން ޝަކުވާއެއް ކުރުމުގެ އެއްވެސް ޙައްޤެއް ތިބާއަކަށް ނެތެވެ.
ދެވަނަ ކަމަކީ ﷲ ތަޢާލާއަށްޓަކައި ކުރާ އެއްވެސް ކަމެއް ގެއްލިގެން ނުދާނެކަމެވެ. ދާނީ ބަރާބަރަށް އާޚިރަތުގެ އެކައުންޓަށް ޖަމާވަމުން ކަމެވެ. ތިބާއަށް އެންމެ ބޮޑަށް ބޭނުންޖެހޭ ވަގުތު ބޭނުންކުރަން ލިބޭނެއެވެ. އެއީ ޤިޔާމަތް ދުވަހު ހިސާބު ބެއްލެވޭ ވަގުތެވެ. އެންމެ ހެޔޮ އަމަލެއް ނަމަވެސް އިތުރުވޭތޯ ކަންބޮޑުވެ ތެޅި ފޮޅެންޖެހޭ ވަގުތެވެ.
ވީއިރު މިދުނިޔެއިން އުންމީދުކުރަންވީ ކޮންކަމަކަށް ހެއްޔެވެ؟ މީހަކަށް ކަމެއް ކޮށްދޭއިރު އެމީހާގެ ކިބައިން މިދުނިޔެއިން ބަދަލަކަށް އެދެވޭނަމަ އެކަން އެހިސާބުން "ބެލެންސްވެ" އެ ނިމުނީއެވެ. އާޚިރަތް ދުވަހުން ލިބޭނެ އެއްވެސް ފައިދާއެއް ނުއޮންނާނެއެވެ. ވީމާ އަހަރެމެންނަށް ކުރެވޭ އެންމެ ފައިދާހުރި "ވިޔަފާރި"އަކަށް ވާނީ މިދުނިޔޭގައި އަގު ދައްކައި އާޚިރަތް ދުވަހުން މުދައު ލިބޭ ގޮތަށް ކުރެވޭ ވިޔަފާރި ނޫން ހެއްޔެވެ؟
- މުފްތީ މެންކުގެ ދަރުސަކުން
