ރަސޫލުﷲ صلى الله عليه وسلم ޙަދީޘްކުރެއްވިއެވެ.
«زُورُوا الْقُبُورَ فَإِنَّهَا تُذَكِّرُكُمُ الْآخِرَةَ» [رواه ابن ماجه وصححه الألباني]
މާނައީ: "ތިޔަބައިމީހުން ޤަބުރުތަކަށް ޒިޔާތަތްކުރާށެވެ. ފަހެ، ހަމަކަށަވަރުން އެކަމުން ތިޔަބައިމީހުންނަށް އާޚިރަތް ހަނދުމަކޮށްދޭނެއެވެ."
މަރު ހަނދާންކުރުން ގިނަކުރާ މީހާ، ހެޔޮ ކަންކަމުން އޭނާގެ ކަށްވަޅު އާބާދުކުރެއެވެ. އެހެނީ އޭނާ ހެނދުނުވުމުން، ހަވީރަށް އިންތިޒާރު ނުކުރެއެވެ. އަދި ހަވީރުވުމުން ހެނދުނަށް އިންތިޒާރު ނުކުރެއެވެ. ފަހެ، އެދެމެދުގައިވާ ވަގުތު ފަހަނައަޅާދިއުމުގެ ކުރިން އަޅުކަންތައްތައް އަދާކުރުމަށް އަވަސްވެގަނެއެވެ.
ޢަމްރު ބުން އަލްޢާޞް އަށް މައްޔިތަކު ވަޅުލާތަން ފެނިވަޑައިގެންނެވިއެވެ. ފަހެ، އެކަލޭގެފާނު އަވަހަށް މިސްކިތަށް ވަޑައިގެން ދެރަކުޢަތުގެ ނަމާދެއް ކުރެއްވިއެވެ.
އެކަލޭގެފާނަށް ދެންނެވުނެވެ. "މިފަދައިން ކަންތައް ތިޔަކުރެއްވީ ކީއްވެގެން ހެއްޔެވެ؟"
އެކަލޭގެފާނު ވިދާޅުވިއެވެ. "ގަބުރުސްތާނުގެ ސަބަބުންނެވެ! ﷲ ގެ ބަސްފުޅު ހަނދާންވީއެވެ.
﴿وَحِيلَ بَيْنَهُمْ وَبَيْنَ مَا يَشْتَهُونَ﴾ [سبأ: 54]
މާނައީ: "އަދި އެބައިމީހުން އެދޭކަންތަކާއި، އެބައިމީހުންނާދެމެދު ހުރަސްއެޅުއްވިއެވެ"
ތިމަންކަލޭގެފާނާއި ނަމާދާ ދެމެދަށް ހުރަސްއެޅުމުގެކުރިން އެކަމަށް އެދުނީއެވެ".
- الشيخ عبد البارئ بن عواض الثبيتي حفظه الله
