ކައިވެންޏަށްފަހުވެސް ދެމަފިރިންނަށް ކުރުން ޙަރާމްވެގެންވާ 2 ކަމެއް ވެއެވެ.
ފުރަތަމަ ކަމަކީ ފުރަގަސްފަރާތް ބޭނުންކުރުމެވެ. މިއީ ހަމަ އެންމެ ބޮޑުވެގެންވާ ޙަރާމަކަމެކެވެ.
ދެވަނަ ކަމަކީ އަނބިމީހާއަށް މައްސަރުކަންތައް ޖެހިފައިވަނިކޮށް ޖިމާޢުވުމެވެ.
ދެމީހުން ބޭނުންނަމަ ގައިގައި ބީހި ދޮންދިނުން ފަދަ ކަންކަން ކުރެވިދާނެއެވެ. އެކުގައި ނިދޭނެއެވެ. ޖުމުލަކޮށްލާފައި ބުނާނަމަ ދެމީހުން ބޭނުންވެއްޖެ ނަމަ ޖިމާޢުވުން ނޫން ހުރިހާ ކަންކަން ވެސް ކުރެވޭނެއެވެ. ނަމަވެސް ޖިމާޢުވުން ހުއްދަވާނީ ޙައިޟުން ޠޯހިރުވެ ހިނައިގަތުމަށްފަހުގައެވެ.
ރަސޫލް ﷺ ޢާއިޝަތުގެފާނާއި ކައިވެނިބައްލަވައިގެން ރޭކުރައްވަވަން ފެށްޓެވިތާ ވަރަށް ކުރީކޮޅު އެކަމަނާ ޙައިޟުވުމުން ލަދުފުޅުން އެހެން ތަނަކަށް އަވަހާރަފުޅު ލައްޕަވަން ވަޑައިގަތުމުން ރަސޫލް ﷺ ޙަދީޘްފުޅު ކުރެއްވެވިއެވެ. "ހެދުންކޮޅު ބަދަލުކުރައްވަވައިގެން ވަޑައިގެން މިތަނުގައި (ތިމަންކަލޭގެފާނުގެ އަރިއަހުގައި) އޮންނަވާށެވެ!" ވީމާ މިކަމުން އެނގިގެންދަނީ އެކުގައި ނިދައިހެދޭނެކަމެވެ.
ޙަރާމްކަންކަން ކަމުގައި މިބަޔާންކުރި 2 ކަންތަކަކީ ކީރިތި ޤުރްއާނާއި އެތައް ބައިވަރު ޞައްޙަ ޙަދީޘްފުޅުތަކުން ސާބިތުވާންހުރި ކަންކަމެވެ. ވީމާ ކައިވެނިކުރިނަމަވެސް ޙަރާމްކަމެއް ވާނީ ހަމަ ޙަރާމްކަމަކަށެވެ. އަހަރެމެންނަށް އޮތީ ﷲ ތަޢާލާއަށް ބިރުވެތިވެ އެފަދަ އެންމެ ކަމެއްވެސް ނުކުރުމެވެ.
- ޑރ. ޔާސިރު ޤާދީގެ ދަރުސަކުން
