ﷲ ތައާލާގެ ޙަޟްރަތުން އެއްވެސް ކަމަކަށް ބޭނުންވެއްޖެ ނަމަ ފަހުން، މާމޮޅަށް، މާރީތި ޢިބާރާތުން ދުޢާކުރަން މަޑުނުކުރާށެވެ! ވަގުތުން އެކަމަކަށް އެދި ދުޢާކުރާށެވެ!
މިސާލަކަށް ދުވާލު ކަމެއް ބޭނުންވެއްޖެ ނަމަ ޖެހިގެން އަންނަ ފަރުޟު ނަމާދުކޮށްގެން ނުވަތަ އެރޭގެ ތަހައްޖުދު ނަމާދުގެ ވަގުތުގައި ނުވަތަ ތަހައްޖުދުކޮށްގެން ދުޢާކުރަން މަޑުނުކުރާށެވެ! ވަގުތުން ދުޢާކުރާށެވެ! އެއަށްފަހު ރޭގަނޑުގެ ތަހައްޖުދު ނަމާދުކޮށްގެން ވެސް ދުޢާކުރާށެވެ! އެއް ކަމަކަށް ގިނަގިނައިން ދުޢާކުރުމަކީ އެއްވެސް މައްސަލައެއް ނޫނެވެ. ދުޢާކުރުން ގިނަކުރުމަށް ﷲ ތަޢާލާ ލޯބިވެވޮޑިގެންވެއެވެ.
ކޮންމެ ކަމަކަށް ބޭނުންވި ނަމަވެސް ފުރަތަމަވެސް ދަންނަވާ ފަރާތަކީ ﷲ ތަޢާލާ ކަމުގައި ހަދާށެވެ! އެކަމުން އަންގައިދެނީ ތިބާ އާއި ﷲ ތަޢާލާ އާއި ދެމެދުގައި އޮތް ގުޅުމެވެ. ﷲ ތަޢާލާގެ ޙަޟްރަތުން މަދަދާއި އެހީތެރިކަމަށް އެދޭ މީންވަރެވެ.
ދުޢާ ކުރުމުގައި ފުރިހަމަކުރަންޖެހޭ ކަންތައްތައް އެބަހުއްޓެވެ. އަދި ދުޢާ ޢިޖާބަކުރައްވެވުމަށް ޚާއްޞަވެގެންވާ ވަގުތުތައް އެބަހުއްޓެވެ. އެކަންކަން ފުރިހަމަކުރަންވާނެއެވެ. ނަމަވެސް ކަމަކަށް ބޭނުންވުމުން ހަމަ އެވަގުތު އެތަނެއްގައި ހުރެގެން ދުޢާކުރާށެވެ! އެއަށްފަހު ކަންކަން ފުރިހަމަކޮށްގެން، ދުޢާ ޢިޖާބަ ވަގުތުތަކަށް ސަމާލުކަންދީގެން ވެސް ދުޢާކުރާށެވެ! މުސްލިމުންނަށް ﷲ ތައާލާއަށް ދުޢާނުކުރެވޭނެ ވަގުތެއް އަދި ތަނެއްވެސް ނެތެވެ.
- މުފްތީ މެންކުގެ ދަރުސަކުން
