ކީރިތި ޤުރްއާނަށް ޢަމަލުކުރުމުގެ ވާހަކަ ދެކެވޭއިރަށް ބައެއް މީހުން ބުނަނީ ވެރިކަމުގެފަރާތުން ޤުރްއާނަށް ޢަމަލުނުކުރާ ވާހަކައެވެ. ނަމަވެސް އެއީ ޤުްރްއާނަށް ޢަމަލުނުކުރަން ދެއްކޭނެ ޙުއްޖަތެއް ނޫނެވެ. ވެރިކަމުގެފަރާތުން ޢަމަލުކޮށް ކީރިތި ޤުރްއާނާއި އެއްގޮތަށް ޙުކުމްނުކުރާނަމަ އެކަމުގެ ޒިންމާ އުފުލަންޖެހޭނީ ވެރިކަމުގައި ތިބި ބައެކެވެ. ތިމާކުރާ ޢަމަލުތައް ޤުރްއާނާއި އެއްގޮތަށް ނުކުރުމުން އެކަމުގެ ޒިންމާ އުފުލަންޖެހޭނީ އެމީހެކެވެ.
ﷲ ތަޢާލާގެ ވަހީބަސްފުޅުގައިވަނީ މިފަދައިންނެވެ.
"އެބައިމީހުންގެ ތެރޭގައި އެ ޤުރުއާނަށް އީމާންވާ ބަޔަކުވެއެވެ. އަދި އެބައިމީހުންގެ ތެރޭގައި އެ ޤުރުއާނަށް އީމާންނުވާ ބަޔަކުވެސްވެއެވެ. ކަލޭގެފާނުގެ ވެރިރައްބަކީ ފަސާދަކުރާމީހުން އެންމެ މޮޅަށް ދެނެވޮޑިގެންވާ އިލާހެވެ." (ޔޫނުސް: 40)
ކީރިތި ޤުރްއާނުގައި ބަޔާންކުރައްވަވާފައިވާ ޙުކުމްފުޅުތައް ޤަބޫލުނުކޮށް އެއަށް ބަދަލުގެންނަން އުޅޭ މީހުން އެދަނީ ޖާހިލިއްޔަ ޒަމާނުގައި މުޝްރިކުން ދިއަ މަގުންނެވެ. ޢަމަލު އެކުރަނީ މުޝްރިކުން ޢަމަލުކުރި ގޮތަށެވެ.
ޤުރްއާން ބަދަލުކުރަން އެދޭ މީހުންނަށް އޮތް ޖަވާބުވެސް މިއޮތީ ކީރިތި ޤުރްއާނުން ފެންނާށެވެ! ކީރިތި ޤުރްއާނަށް ޢަމަލުކުރުމަކީ ހަމައެކަނި ރަސޫލް ﷺ އަށް އޮތްކަމެއް ނޫނެވެ. އެއީ އެންމެންގެ މައްޗަށް އޮތް ވާޖިބެކެވެ. ﷲ ތައާލާގެ ގަދަފަދަ ޢަޛާބުން ސަލާމަތްވެވޭނީ ޢަމަލުކުރި މީހަކަށެވެ.
﴿وَإِذَا تُتْلَى عَلَيْهِمْ آيَاتُنَا بَيِّنَاتٍ قَالَ الَّذِينَ لَا يَرْجُونَ لِقَاءَنَا ائْتِ بِقُرْآنٍ غَيْرِ هَذَا أَوْ بَدِّلْهُ قُلْ مَا يَكُونُ لِي أَنْ أُبَدِّلَهُ مِنْ تِلْقَاءِ نَفْسِي إِنْ أَتَّبِعُ إِلَّا مَا يُوحَى إِلَيَّ إِنِّي أَخَافُ إِنْ عَصَيْتُ رَبِّي عَذَابَ يَوْمٍ عَظِيمٍ [15] قُلْ لَوْ شَاءَ اللَّهُ مَا تَلَوْتُهُ عَلَيْكُمْ وَلَا أَدْرَاكُمْ بِهِ فَقَدْ لَبِثْتُ فِيكُمْ عُمُرًا مِنْ قَبْلِهِ أَفَلَا تَعْقِلُونَ [16]﴾ [يونس: 15، 16]
މާނައީ: "އަދި އެބައިމީހުންނަށް ތިމަންއިލާހުގެ އާޔަތްތައް ބަޔާންވެގެންވާ ގޮތުގައި ކިޔަވައިދެއްވާހިނދު، ތިމަންއިލާހާ ބައްދަލުވުމަށް ނޭދޭމީހުން ބުނެއެވެ. ތިޔަ ނޫން އެހެން ޤުރުއާނެއް ގެނެސްދެއްވާށެވެ! ނުވަތަ އެޤުރުއާނަށް ބަދަލުގެނެސް ދެއްވާށެވެ! ކަލޭގެފާނު ވިދާޅުވާށެވެ! ތިމަންކަލޭގެފާނު އަމިއްލަފުޅަށް އެބަދަލުކުރުމަކީ، ތިމަންކަލޭގެފާނަށް އޮތްކަމެއް ނޫނެވެ. ތިމަންކަލޭގެފާނަށް އިއްވަވާ ވަޙީއަށް މެނުވީ، ތިމަންކަލޭގެފާނު ތަބާވެވަޑައެއް ނުގަންނަވަމެވެ. ތިމަންކަލޭގެފާނުގެ ވެރިރައްބަށް ތިމަންކަލޭގެފާނު އުރެދިއްޖެނަމަ، ބޮޑުވެގެންވާ ދުވަހެއްގެ ޢަޛާބަށް ހަމަކަށަވަރުން ތިމަންކަލޭގެފާނު ބިރުވެތިވެވަޑައިގަންނަވަމެވެ. [15] ކަލޭގެފާނު ވިދާޅުވާށެވެ! ﷲ އިރާދަކުރެއްވިނަމަ، ތިމަންކަލޭގެފާނު އެއާޔަތްތައް ތިޔަބައިމީހުންނަށް ކިޔައެއް ނުދެއްވީމުހެވެ. އަދި އެއިލާހު ތިޔަބައިމީހުންނަށް އެއާޔަތްތަކެއް ނުވެސް އެންގެވީހެވެ. ފަހެ، މީގެކުރިން ތިޔަބައިމީހުންގެ ތެރޭގައި އެތައްދުވަހެއް ވަންދެން (އެބަހީ: ސާޅީސް އަހަރު ވަންދެން) ހަމަކަށަވަރުން ތިމަންކަލޭގެފާނު ހުންނެވީމެވެ. (މިބާވަތުގެ ވާހަކައެއް ނުދައްކަވަމެވެ.) ފަހެ، ތިޔަބައިމީހުންނަކަށް ނުވިސްނޭހެއްޔެވެ؟ [16]"
﴿وَمَا كَانَ هَذَا الْقُرْآنُ أَنْ يُفْتَرَى مِنْ دُونِ اللَّهِ وَلَكِنْ تَصْدِيقَ الَّذِي بَيْنَ يَدَيْهِ وَتَفْصِيلَ الْكِتَابِ لَا رَيْبَ فِيهِ مِنْ رَبِّ الْعَالَمِينَ [37] أَمْ يَقُولُونَ افْتَرَاهُ قُلْ فَأْتُوا بِسُورَةٍ مِثْلِهِ وَادْعُوا مَنِ اسْتَطَعْتُمْ مِنْ دُونِ اللَّهِ إِنْ كُنْتُمْ صَادِقِينَ [38] بَلْ كَذَّبُوا بِمَا لَمْ يُحِيطُوا بِعِلْمِهِ وَلَمَّا يَأْتِهِمْ تَأْوِيلُهُ كَذَلِكَ كَذَّبَ الَّذِينَ مِنْ قَبْلِهِمْ فَانْظُرْ كَيْفَ كَانَ عَاقِبَةُ الظَّالِمِينَ [39] وَمِنْهُمْ مَنْ يُؤْمِنُ بِهِ وَمِنْهُمْ مَنْ لَا يُؤْمِنُ بِهِ وَرَبُّكَ أَعْلَمُ بِالْمُفْسِدِينَ [40]﴾ [يونس: 37- 40]
މާނައީ: "ﷲ ނޫން ފަރާތަކުން ހަދައިގެން ގެންނަ އެއްޗަކަށް މި ޤުރުއާން ނުވެއެވެ. އެހެނެއްކަމަކު (އެ ޤުރުއާން ބާވައިލެއްވީ) އޭގެކުރީގައިވާ ފޮތްތައް ތެދުކުރުމަށާއި، ފޮތުގައިވާ ޙުކުމްތައް ތަފްޞީލުކޮށްދެއްވުމަށެވެ. އެ ފޮތާމެދު ޝައްކެއް ނެތެވެ. (އެ ފޮތް ބާވައިލެއްވީ) ޢާލަމްތަކުގެ ވެރިރައްބުގެ ޙަޟްރަތުންނެވެ. [37] އަދި ކިއެއްތަ! (އެ ޤުރުއާން) އެއީ، އެކަލޭގެފާނު ހައްދަވައިގެން އުޅުއްވާ އެއްޗެއްކަމަށް އެބައިމީހުން ބުނަނީހެއްޔެވެ؟ ކަލޭގެފާނު ވިދާޅުވާށެވެ! ފަހެ، ތިޔަބައިމީހުން ތެދުވެރިން ކަމުގައިވަނީނަމަ، ﷲ ފިޔަވައި ތިޔަބައިމީހުންނަށް ކުޅަދާނަވީހައި ބަޔަކަށް ގޮވައިގެން ނަމަވެސް، އެއާ އެއްފަދަ ސޫރަތެއް ނިކަން ގެނެސްބަލާށެވެ! [38] އަދި ކިއެއްތަ! އެ ޤުރުއާނުގައިވާ އެއްޗެއް އެބައިމީހުންނަށް ނޭނގެނީސް، އަދި އޭގެ މާނަ އެބައިމީހުންނާ ހަމައަށް ނާންނަނީސް، އެބައިމީހުން އެ ޤުރުއާން ދޮގުކުރިއެވެ. ހަމަ އެފަދައިން އެބައިމީހުންގެ ކުރީގެ މީހުންވެސް (އެބައިމީހުންގެ ރަސޫލުން) ދޮގުކުރިއެވެ. ފަހެ، އަނިޔާވެރިންގެ ނިމުންވަނީ، ކޮންފަދައަކުންކަން ކަލޭގެފާނު ދެކެވަޑައި ގަންނަވާށެވެ! [39]
- އިސްލާމީ ތިލަފަތުގެ ދަރުސަކުން
