ޔޫނުސް عليه السلام އާމެދު ދަންނައެވެ. އެކަލޭގެފާނުގެ ޤައުމުގެ އެންމެން އީމާންވިއެވެ. އެއީ އެކަލޭގެފާނު އެބައިމީހުންގެ ތެރެއިން ނުކުމެވަޑައިގެންނެވުމުން، އެބައިމީހުންގެ މައްޗަށް އޮތް ޢަޛާބު އެބައިމީހުންނަށް ފެނުމުން ﷲ ގެ ޙަޟްރަތަށް ރުޖޫޢަވެ، ދުޢާކުރުމުން، އެބައިމީހުންގެ ކިބައިން އެޢަޛާބު އުފުއްލެވިއެވެ.
﴿فَلَوْلَا كَانَتْ قَرْيَةٌ آمَنَتْ فَنَفَعَهَا إِيمَانُهَا إِلَّا قَوْمَ يُونُسَ لَمَّا آمَنُوا كَشَفْنَا عَنْهُمْ عَذَابَ الْخِزْيِ فِي الْحَيَاةِ الدُّنْيَا وَمَتَّعْنَاهُمْ إِلَى حِينٍ﴾ [يونس: 98]
މާނައީ: "ފަހެ، ރަށެއްގެ މީހުން، އެބައިމީހުންގެ އީމާންކަމުން މަންފާކުރާނޭ ގޮތުގައި، އީމާންވީނަމަ ކިހާރަނގަޅު ހެއްޔެވެ! އެހެނެއްކަމަކު، ޔޫނުސްގެފާނުގެ ޤައުމުގެމީހުން އީމާންވުމުން، ތިމަންއިލާހު އެބައިމީހުންގެ ކިބައިން ދުނިޔޭގެ ޙަޔާތުގައި ނިކަމެތިކަމުގެ ޢަޛާބު ދުރުކުރެއްވީމެވެ. އަދި އެބައިމީހުންގެ އަޖަލު ޖެހިއްޖައުމަށް ދާނދެން، އެބައިމީހުން އަރާމުގައި އުޅުމަށް ލެހެއްޓެވީމެވެ".
މިއަދުވެސް ވޮޑިގެންވަނީ "-- ޔޫނުސްގެފާނުގެ ޤައުމުގެމީހުން އީމާންވުމުން، އެބައިމީހުންގެ ކިބައިން ދުނިޔޭގެ ޙަޔާތުގައި ނިކަމެތިކަމުގެ ޢަޛާބު ދުރުކުރެއްވެވި" ﷲ ތައާލާއެވެ. "އަދި އެބައިމީހުންގެ އަޖަލު ޖެހިއްޖައުމަށް ދާނދެން، އެބައިމީހުން އަރާމުގައި އުޅުމަށް ލެހެއްޓެވި" ﷲ ތައާލާއެވެ. ވީމާ އަމިއްލަ ދިރިއުޅުމުގައި ކުރިމަތިވާ މުޞިބާތްތަކުންވެސް އަދި ކޮރޯނާ ވައިރަސްއިން ވެސް ސަލާމަތްވެވި އުފަލުގައި ތިބެން އެދޭނަމަ އޮތީ ﷲ ތަޢާލާއަށް ފުރިހަމަ ގޮތުގައި އީމާންވުމެވެ.
- އިސްލާމީ ތިލަފަތުގެ ދަރުސަކުން
