މުސްލިމުންނަކީ ހުރިހާ އުފާތަކެއް ދޫކޮށްލައިގެން ތިބެންޖެހޭ ބައެއް ނޫނެވެ. ނަމަވެސް އިންތަކެއްގައި ހިފަހައްޓަންޖެހޭ ބައެކެވެ. މުސްލިމުންނަށް އޮތީ ކޮންމެ ކަމެއްގައިވެސް ﷲ ތަޢާލާގެ ޙައްޤުފުޅުތައް ކުރިއަށް ނެރުމެވެ. ﷲ ތަޢާލާގެ ޙައްޤުފުޅުތައް އަދާކުރަމުން މުންކަރާތަކަށް އަރައިނުގަނެ ދިރިއުޅުމުގެ އެންމެހައިކަންކަންކުރުމެވެ. އަދި އުފާވެސް ކުރަންވީ ހަމަ އެމަގުންނެވެ.
މަސްޖިދުއްނަބަވީގެ އިމާމް الشيخ عبد الله بن عبد الرحمن البعيجان –حفظه الله ވިދާޅުވެފައިވެއެވެ.
"ހިތްހަމަ ޖައްސާލުމަށްޓަކާކުރާ ކަންކަމާމެދު ދަންނައެވެ. އިސްރާފުކުރުމަކާ ނުލައި އަދި މުންކަރާތްތަކަށް އަރައިގަތުމަކާ ނުލާ އެކަންކަންކުރުމަކީ މައްސަލައެއް ނޫނެވެ. އަދި ވާޖިބުވެގެންވާ ޙައްޤުތަކަށް ފަރުވާ ކުޑަކޮށްގެންވެސް ނުވާނެއެވެ. އެފަދައިން ޢަމަލުކުރުމަކީ މުބާހުކަމެކެވެ. އަދި އޭގެ ސަބަބަން ހަށިގަނޑަށް އާރޯކަން ލިބިގެންދެއެވެ. އެހެނަސް އަގުހުރި ގިނަވަގުތުތަކެއް އެކަމުގައި ހޭދަކޮށް ނުލާށެވެ. އަދި އެއީ ދާއިމީކޮށް އުޅޭ ގޮތްކަމުގައި ހަދާ ޣާފިލުވިޔަ ނުދޭށެވެ. އުންމަތް މިވަނީ އުންމަތުގެ ދަރިންގެ ވަގުތާއި ބާރުވެރިކަމަށް ނުހަނު ބޭނުންޖެހިފައެވެ.
ބުއްދިވެރިއަކީ ދުނިޔަވީ ޙަޔާތުގެ ކަމެއްގައި ނުވަތަ އުޚްރަވީ ޙަޔާތުގެ ކަމެއްގައި މެނުވީ އޭނާގެ ވަގުތުތައް ހޭދަނުކުރާ މީހާއެވެ. ހުސްވަގުތަކީ ރަނގަޅަށް ބޭނުން ހިފިއްޖެނަމަ ނިޢުމަތެކެވެ. އަދި ގެއްލުވާލައިފިނަމަ ޢުޤޫބާތެކެވެ.
* އިބްނު ޢައްބާސް ގެ އަރިހުން ރިވާވެގެން އައިސްފައިވެއެވެ. ރަސޫލުﷲ صلى الله عليه وسلم ޙަދީޘްކުރެއްވިއެވެ.
"نِعْمَتَانِ مَغْبُونٌ فِيهِمَا كَثِيرٌ مِنَ النَّاسِ: الصِّحَّةُ وَالفَرَاغُ» [رواه البخاري]
މާނައީ: "މީސްތަކުންގެ ތެރެއިން ގިނަ ބަޔަކު ޣާފިލުވެފައިވާ ދެނިޢުމަތެއްވެއެވެ. އެއީ ފުރިހަމަ ޞިއްހަތާއި ހުސްވަގުތެވެ."
ފަހެ، ވަގުތުތައް އިސްރާފުކުރުމަކީ ދީންވެރިކަމުގައިވާ އުނިކަމެކެވެ. އަދި ރައުޔުގައިވާ ބަކިކަށިކަމެކެވެ. އެއީ އެކަމުގައި ވަރަށް ގިނަމީހުން އިމްތިޙާނު ކުރެއްވިގެންވާ ކަމެކެވެ. ފަހެ، ތިޔަބައިމީހުން ތިޔަބައިމީހުންގެ އަމިއްލަ ނަފްސުތަކާއި ތިޔަބައިމީހުންގެ ބެލުމުގެ ދަށުގައިވާ މީހުންނާމެދު ﷲ އަށް ތަޤުވާވެރިވާށެވެ. އަދި ފުރުޞަތުތައް ޣަނީމާކޮށް އެއަށް ރައްކާތެރިވާށެވެ.
އިބްނު ޢައްބާސް رضي الله عنهما ގެ އަރިހުން ރިވާވެގެންވެއެވެ. އެކަލޭގެފާނު ވިދާޅުވިއެވެ. ރަސޫލުﷲ صلى الله عليه وسلم، މީހަކަށް ނަސޭހަތްދެއްވަމުން ޙަދީޘްކުރެއްވިއެވެ.
"اغْتَنِمْ خَمْسًا قَبْلَ خَمْسٍ: شَبَابَكَ قَبْلَ هِرَمِكَ، وَصِحَّتَكَ قَبْلَ سَقَمِكَ، وَغِنَاءَكَ قَبْلَ فَقْرِكَ، وَفَرَاغَكَ قَبْلَ شُغْلِكَ، وَحَيَاتَكَ قَبْلَ مَوْتِكَ» [رواه الحاكم والبيهقي وصححه الألباني]
މާނައީ: "ފަސްކަމެއް ތިބާއާއި ކުރިމަތިވުމުގެ ކުރިން ފަސްކަމެއްގެ ފައިދާ ހެޔޮގޮތުގައި ލިބިގަންނާށެވެ. މުސްކުޅިވުމުގެ ކުރިން ޒުވާންކަމުގެ ފައިދާ ހެޔޮގޮތުގައި ލިބިގަންނާށެވެ. އަދި ބަލިވުމުގެ ކުރިން ދުޅަހެޔޮކަމުގެ ފައިދާ ހެޔޮގޮތުގައި ލިބިގަންނާށެވެ. އަދި ފަޤީރުވުމުގެ ކުރިން މުއްސަނދިކަމުގެ ފައިދާ ހެޔޮގޮތުގައި ލިބިގަންނާށެވެ. އަދި މަޝްޣޫލުވުމުގެ ކުރިން ހުސްވަގުތުގެ ފައިދާ ހެޔޮގޮތުގައި ލިބިގަންނާށެވެ. އަދި މަރުވުމުގެ ކުރިން ޙަޔާތުގެ ފައިދާ ހެޔޮގޮތުގައި ލިބިގަންނާށެވެ."
- އިސްލާމީ ތިލަފަތުގެ ދަރުސަކުން
