ބައެއް އަންހެނުން ކީރިތި ޤުރްއާން ލިޔެފައިވާ ފަށުފޫ ފަދަ ތަކެތި ފަށުފުލަކަށް ބޭނުންކޮށް ކަރުގައި އެލުވައެވެ. ނަމަވެސް ބައެއް ޢިލްމުވެރިން ބަޔާންކުރައްވާ ގޮތުގައި އެއީ ކުރުން ހުއްދަ ކަމެއް ނޫނެވެ. އެހެނީ ކީރިތި ޤުރްއާން ގައިގައި އެލުވުމެއް ނެތެވެ. އޮތީ ކިޔެވުމެވެ. ރަސޫލާ صلى الله عليه وسلم އާއި އެކަލޭގެފާނުގެ އަޞްޙާބުބޭކަލުންކުރެ އެއްވެސް ބޭކަލަކު އެފަދައިން ޢަމަލުކުރައްވާފައި ނުވެއެވެ.
ފަށުފުލެއްގެ ގޮތުގައި މުޞްޙަފެއް ބޭނުންކުރުމާއިބެހޭގޮތުން ފަޟީލަތުއްޝައިޚް މުޙައްމަދު ބުން ޞާލިޙް އަލްޢުޘައިމީން رحمه الله ވިދާޅުވެފައިވެއެވެ.
"ފަށުފުލެއްގެ ގޮތުގައި މުޞްޙަފެއް ބޭނުމެއް ނުކުރެވޭނެއެވެ. ފަށެއްކަމުގައި ވިޔަސް ނުވަތަ އެހެން އެއްޗެއްގައި އެލުވުމަށްވެސް މުޞްޙަފެއް ބޭނުން ނުކުރެވޭނެއެވެ. އެހެނީ އެފަދަ ކަންކަމަކީ ބިދުޢައެވެ. [އެބަހީ: ދީނަށް އަލަށް ތަޢާރަފުކުރެވޭ ކަންތައްތަކެވެ.] ރަސޫލާ صلى الله عليه وسلم އާއި އަޞްޙާބުބޭކަލުން އެފަދަ ކަންކަން ކުރައްވާފައިނުވެއެވެ. އަދި މުޞީބާތްތަކުން ދުރުހެލިވުމުގެ ގޮތުންނާއި ސަލާމަތްވުމުގެ ގޮތުންވެސް އެކަން ނުކުރެވޭނެއެވެ. އެހެނީ ރަސޫލާ صلى الله عليه وسلم އާއި އެކަލޭގެފާނުގެ އަޞްޙާބުބޭކަލުންކުރެ އެއްވެސް ބޭކަލަކު އެފަދައިން ޢަމަލުކުރައްވާފައި ނުވެއެވެ."
فتاوى منار الإسلام (1/45)
