ވަކި ގޮތަކަށް ހެދުން އަޅަން ބުނެފިނަމަ ބައެއް ރުޅި އާދެއެވެ. އަދި ތިބާއަކީ ތިމާއަށް ގޮތްކޔައިދޭން ކާކުތޯވެސް ސުވާލުކޮށްފާނެއެވެ. އެއީވެސް މައްސަލައެއް ނޫނެވެ. އެހެންވެ ވަކި ގޮތަކަށް ހެދުން އަޅަން އަހަރެން ނުބުނަމެވެ. ނަމަވެސް ބަލަންޖެހޭ ކަމެއް އެބަ އޮވެއެވެ.
އެއީ ހެދުން އަޅައި އުޅުމަށް ﷲ ތަޢާލާ ވަކިގޮތެއް އަންގަވާފައިވޭތޯއެވެ. އެކަން ކީރިތި ޤުރްއާނުގައި ވަޙީކުރައްވަވާފައިވޭތޯއެވެ! އެކަންކަން ބަލާށެވެ! ޔަޤީންވާކަމަކީ ތިބާގެ އީމާންކަން ފުރިހަމަވާނީ ﷲ ތަޢާލާ ވަޙީކުރައްވަވާފައިވާ ގޮތަށް ޢަމަލުކުރުމުން ކަމެވެ. ވީމާ ފުރަތަމަކަމަކަށް ފޭރާންލުމަށް ނުވަތަ ނިވާކުރުމަށް ކީރިތި ޤުރްއާނުގައި ބަޔާންކުރައްވާފައިވާ މިންގަނޑަށް ޢަމަލުކުރާށެވެ! އެއަސްވުރެ އިތުރުކުރުކުރުމަކީ އެމީހެއްގެ އިޚްތިޔާރުގައި އޮތްކަމެކެވެ. އެއީ އެމީހާގެ އޚްލާޞްތެރިކަމެވެ.
ފިރިހެނުންވެސް އަދި އަންހެނުންވެސް ކީރިތި ޤުރްއާނުގައި ބަޔާންވެގެންވާ ފަދައިން ހެދުން އެޅުމުން ދެދުނިޔޭގައިވެސް އެމީހަކަށް ވަނީ މަތިވެރި ނިޢްމަތްތަކެވެ. އަދި އެއީ މުސްލިމުްގެ ކުރިމަތީގައި މީހާގެ ދަރަޖަ އުފުލިގެންދާ ކަމެއްކަންވެސް ވަޙީ ބަސްފުޅުން އެނގެން އެބައޮތެވެ. އަދި އެއީ އެހެން މީހުންގެ ކިބައިން ތިމާއަށް ރައްކައުތެރިކަން ލިބިގެންވާ ކަމެއްވެސްމެއެވެ. އެކަންވެސް ހަމަ ޤުރްއާނުން އެނގެން އެބައޮތެވެ.
ﷲ ތަޢާލާއަށް ކިޔަމަންތެރިވުމުގެ ގޮތުން ﷲ ތަޢާލާ އަންގަވާފައިވާ މިނުގައި ހެދުން އެޅުމަކީ އެމީހާ ﷲ ތަޢާލާއަށް ބިރުވެތިވާ މިންވަރުވެސް އަންގައިދޭ ކަމެކެވެ. ކޮންމެ މީހަކު ކޮންމެ ކަމެއް ކުރިނަމަވެސް ނިޔަތް ދެނެވޮޑިގެންވަނީ ހަމައެކަނި ﷲ ތަޢާލާއެވެ. ވީމާ އެއްވެސް މީހެއްގެ ނިޔަތުގެ މައްޗަށް ވާހަކަދެއްކުމެއް ނެތެވެ.
ކުރިންވެސް ބުނިފަދައިން ފިރިހެނުންވެސް އަންހެނުންވެސް ހެދުން އަޅަންވީ މީހަކު ބުނާ މިނަކަށް، މީހަކު ބުނާ ގޮތަކަށް ނޫނެވެ. ﷲ ތަޢާލާ އަންގަވާފައިވާ ގޮތަށެވެ. އީމާންކަން ފުރިހަމަވާންއޮތީ އެކަންކޮށްގެންނެވެ.
- މުފްތީ މެންކުގެ ދަރުސަކުން
