ދަމުނަމާދުކުރަން ބޭނުންވާ މީހާ ކޮންމެހެން ރޭގނޑު 2 ޖަހާއިރު ތެދުވަންޖެހޭނެތޯ އާއި ވިތުރި ކުރަން އެންމެ ރަނގަޅުވަގުތާއިބެހޭ ގޮތުން ގިނަބައަކު ސުވާލުކުރެއެވެ.
ވިތުރި ކުރުމުގެ ފުރަތަމަ ގޮތަކީ ނިދުމުގެ ކުރިން ވިތުރި ކުރުމެވެ. ފަހުން ހޭލައިގެން ދަމުނަމާދާއި ވިތުރި އެކުގައި ކުރަން އެދޭ މީހާ އެފަދައިން އަމަލުކުރާނީއެވެ.
ދަމުނަމާދާއި ވިތުރި ފަތިސް ނަމާދާއި ގާތްކޮށްވެސް ކުރެވޭނެއެވެ. މިސާލަކަށް ފަތިސްނަމާދު ވަގުތުވަނީ 5 ޖަހާއިރު ނަމަ 4 ޖަހާއިރު ހޭލާށެވެ! ފާޚާނާކޮށް ވުޟޫކޮށްލަން 15-20 މިނިޓު ބޭނުންކުރާށެވެ. އެއިރުންވެސް ފަތިސް ނަމާދަށް ގޮވުމާއި ދެމެދު ތިބާ ތަހައްޖުދު ނަމާދާއި ވިތުރިކުރަން 40 ވަރަކަށް މިނިޓް ލިބޭނެއެވެ. ނަމާދުތައް ކުރުމަށްފަހު ކީރިތި ޤުރްއާން ކިޔެވުމާއި ދުޢާ ކުރުމުގައި ވަގުތުކޮޅެއް ހޭދަކޮށްލެވުން ކިހައި ފުރިހަމަ ވާނެހެއްޔެވެ؟
މިބަޔާންކުރި ފަދައިން ރޭގަނޑުގެ 1 ގަޑިއިރު ހޭދަކުރާނަމަ އެ އެއްގަޑިއިރު ވެގެންދާނީ ތިބާގެ ހަޔާތަށް އެންމެ ފައިދާކުރާނެ ވަގުތުކޮޅަށެވެ. ލިބޭނެ ބައެއް ފައިދާ:
1 ﷲ ތަޢާލާ ދެއްވަވާ ދައުވަތު ޤަބޫލުކޮށް ނިދީން ހޭލައި ތަހައްޖުދު ނަމާދުކުރެވޭކަން. އަދި ވިތުރިވެސް ކުރެވޭކަން
2 އެދޭ ކޮންމެ ކަމަކަށް އެދި ދުޢާކުރަން ލިބޭ އެންމެ މުހިންމު، އެންމެ ފަހި ވަގުތުގައި ދުޢާކުރެވޭކަން
3 އެއްވެސް އިތުރު އަޑެއްބަޑެއް ނުއިވޭ މާހައުލެއްގައި ހިތްހަމަޖެހިލައިގެން އިނދެ، ﷲ ތަޢާލާގެމަތިން ހަނދުމަކޮށް ޛިކުރުކޮށް ދުޢާކުރެވޭކަން
4 މިފަދައިން މި 1 ގަދިއިރުގެ ބޭނުންހިފަން ފަށައިފިނަމަ އެމީހަކީ ފިރިހެނަކު ނަމަ ޖަމާޢަތުގައި ފަތިސްނަމާދުކުރެވޭ މީހަކަށްވެގެންދާނެއެވެ. އަދި އަންހެނަކު ގޭގައި ކުރާނަމަ ވަގުތު ޖެހުމުން ފަތިސްނަމާދުކުރެވޭ މީހަކަށްވެގެންދާނެއެވެ.
5 މުޅި ދުވަސް ﷲ ތަޢާލާގެ ހިމާޔަތާއި ރައްކައުތެރިކަމުގައި ހޭދަކުރެވި ރިޒްޤް ލިބުމަށް މަގުފަހިވެގެންދާނެއެވެ. އިން ޝާ ﷲ
އެންމެ ފައިޑާކުރާނެ އެއްގަޑިއިރު ކަމަށް މިބުނީ އަޅުކަމަށް ތައްޔާރުވާން ހޭދަކުރާ ވަގުތަށްވެސް ﷲ ތަޢާލާ ޘަވާބު ދެއްވަވާތީއެވެ. އިން ޝާ ﷲ
- އިސްލާމީ ތިލަފަތުގެ ދަރުސަކުން
